Əli Orucov: "Erməni cəmiyyətinin böyük çoxluğu Bakı və Ankara ilə konfrantasiyanı yox, əməkdaşlığı normal münasibətlərin qurulmasını istəyir"
Erməni mediasında dərc edilən məqaləyə görə, Türkiyənin Xarici İşlər naziri Hakan Fidan bildirib ki, 2026-cı ilin iyunun əvvəlində Ermənistanda keçiriləcək parlament seçkiləri regionda stabilliyə və normallaşma prosesinə mühüm təsir göstərəcək. Fidan qeyd edib ki, Ermənistan Baş naziri Nikol Paşinyan hazırda sorğu nəticələrinə görə liderdir və onun konstruktiv rolu bu prosesi dəstəkləyir.
Hazırkı şəraitdə Fidanın Paşinyanı regionda normallaşma üçün konstruktiv və sorğularda lider kimi təqdim etməsi Ermənistanda fərqli reaksiyalar doğura bilər. Paşinyanı dəstəkləyən elektorat üçün bu açıqlama onun beynəlxalq səviyyədə qəbul edilən və real aktor olduğunu göstərərək reytinqinə müsbət təsir edə bilər. Lakin müxalif düşərgə və Türkiyəyə etimadsızlıqla yanaşan seçicilər üçün bu, Paşinyanın “xarici güclərin maraqlarına uyğun” siyasət apardığı arqumentini gücləndirə bilər. Nəticədə açıqlama mövcud siyasi parçalanmanı dərinləşdirən, tərəfdarlarını daha da səfərbər edən, amma əleyhdarlarını mövqelərində sərtləşdirən faktor kimi çıxış edir.
Politoloq Əli Orucovun fikrincə, 2026-cı ilin iyununda keçiriləcək seçkilər Ermənistanın gələcək taleyini müəyyənləşdirmək baxımından önəmlidir. Əgər revanşist qüvvələr qalib gəlsə, bu yeni eskalasiya riskini artıraraq regionda gərginliyə səbəb ola bilər. Lakin hazırkı baş nazir N.Paşinyan seçkilərin favoriti sayılır, özünü Ermənistanın xilaskarı və dialoqa açıq siyasətçi kimi təqdim edə bilib, Qərb də onu etibarlı tərəfdaş hesab edir.
Paşinyan Moskva ilə yumşalma xətti tutmaqla yanaşı, Ankara və Bakı ilə dialoq mühiti yaratmağa çalışır. Ermənistanla Azərbaycan arasında sülh sazişi ötən il ABŞ-ın vasitəçiliyi ilə paraflanıb, nəqliyyat və daşımalar bərpa olunur, Zəngəzur dəhlizi ilə bağlı aktiv iş aparılır. Bu baxımdan Paşinyanın hakimiyyətdə qalması normallaşma proseslərinin davam etdirilməsi üçün uyğundur.
Nəticə olaraq, Fidanın açıqlamaları müxalifət tərəfindən seçki kampaniyasında əks arqument kimi istifadə edilə bilər, lakin ümumi ictimai rəy Paşinyanın regionda stabillik və əməkdaşlıq siyasətini dəstəkləyir ki, bu da onun reytinqinə müsbət devidendlər gətirə bilər.
Akif NƏSİRLİ
