Bəhruz Quliyev: “Gültəkin Hacıbəylinin Türkiyədən deportasiyası ətrafında yaranmış vəziyyət...”
Türkiyə məhkəməsi Azərbaycan Milli Məclisinin keçmiş deputatı, Milli Şuranın üzvü Gültəkin Hacıbəylinin şikayətini təmin etməyib. Bunu o, sosial şəbəkə hesabında yazıb. Onun sözlərinə görə, ötən gün İstanbul İdarə Məhkəməsi barəmdəki deportasiya qərarının dayandırılması ilə bağlı müraciətimə baxaraq şikayətimi təmin etməyib.
“Bu gün (15 yanvar) isə Ankara İdarə Məhkəməsi üzərimə qoyulmuş G-82 kodunun götürülməsi ilə bağlı müraciətim əsasında İstanbul Valiliyinə sorğu göndərilib. Xatırladım ki, G-82 kodu mənim guya hansısa terror təşkilatına üzv olmağım şübhəsinə görə verilib”, - G.Hacıbəyli söyləyib.
Xatırladaq ki, G.Hacıbəyli 2025-ci il noyabrın 30-da Türkiyədə saxlanılıb. Mediada o və Milli Şuranın digər üzvü, AXCP sədri Əli Kərimlinin Prezident Administrasiyasının sabiq rəhbəri Ramiz Mehdiyevin dövlət çevrilişinə cəhd planında yer aldığı barədə məlumatlar yer alıb.
Bu qərar Gültəkin Hacıbəylinin Azərbaycana deportasiyası üçün kifayət edəcək?
“Türkiyənin mövqeyi, məhkəmələrin qərarları və təhlükəsizlik kodları bir daha göstərir ki...”
“Gültəkin Hacıbəylinin Türkiyədən deportasiyası ətrafında yaranmış vəziyyət artıq təkcə miqrasiya və ya inzibati məhkəmə müstəvisindən çıxaraq daha geniş siyasi və təhlükəsizlik kontekstində dəyərləndirilməlidir. Burada əsas sual ondan ibarətdir ki, Türkiyə tərəfinin verdiyi qərarlar sırf formal hüquqi prosedurdur, yoxsa arxa planda daha ciddi məlumatlar mövcuddur?
Mediada dövriyyəyə buraxılan və təkzib olunmayan iddialardan biri Gültəkin Hacıbəylinin Milli Şura daxilində fəaliyyəti ilə paralel olaraq, Prezident Administrasiyasının sabiq rəhbəri Ramiz Mehdiyev ətrafında formalaşmış qeyri-rəsmi siyasi şəbəkə ilə mümkün əlaqələridir. Azərbaycan siyasi praktikasında bu cür əlaqələr təsadüfi xarakter daşımır və adətən müəyyən siyasi ssenarilərin, xüsusilə də dövlətçiliyə qarşı yönəlmiş planların tərkib hissəsi olur. Bu kontekstdən də Gültəkin Hacıbəylinin də Ramiz Mehdiyevlə əlbir olması ciddi nüanslardan xəbər verir” Bu fikirləri sualımıza cavab olaraq baki-xeber.com-a “Səs” qəzetinin baş redaktoru, siyasi ekspert Bəhruz Quliyev deyib.
Ekspert əlavə edib ki, Türkiyədə onun üzərinə qoyulmuş G-82 kodu da məhz bu kontekstdə oxunmalıdır. Bu kod adi mühacirət pozuntusu deyil, potensial təhlükə və qeyri-müəyyən siyasi fəaliyyət şübhəsi deməkdir. Türkiyə kimi təhlükəsizlik məsələlərinə həssas yanaşan bir dövlətdə belə bir kodun tətbiqi ciddi kəşfiyyat məlumatları olmadan mümkün deyil. "Gültəkin Hacıbəylinin Bakıya qayıtmaq istəməməsi məsələsi isə artıq açıq siyasi davranışdır. Əgər onun fəaliyyəti sırf müxalif siyasi mövqedən ibarət olsaydı, hüquqi mexanizmlər çərçivəsində ölkəyə qayıdıb mövqeyini müdafiə etmək imkanları mövcud idi. Lakin real vəziyyət göstərir ki, o, mümkün hüquqi məsuliyyətdən, istintaq suallarından və daha geniş araşdırmalardan yayınmağa çalışır.
Bakıda həbs ehtimalına gəlincə, bu risk realdır və sırf siyasi baxışlara görə deyil. Söhbət dövlət təhlükəsizliyi, xarici təsir mexanizmləri, qeyri-konstitusion çağırışlar və mümkün çevriliş planları ilə bağlı iddialardan gedirsə, istənilən hüquqi dövlət belə hallara biganə qala bilməz. Heç bir ölkə öz dövlətçiliyinə qarşı fəaliyyət göstərmiş və ya belə şübhələr altında olan şəxslərə toxunulmazlıq tanımır.
Düşünürəm ki, Gültəkin Hacıbəyli məsələsi fərdi tale deyil, siyasi məsuliyyət məsələsidir. Türkiyənin mövqeyi, məhkəmələrin qərarları və təhlükəsizlik kodları bir daha göstərir ki, regional dövlətlər destruktiv siyasi fəaliyyətə qarşı ortaq mövqedən çıxış edirlər. Bu baxımdan, onun Azərbaycana qayıtmaqdan yayınması da baş verənlərin mahiyyətini dolayısı ilə təsdiqləyən davranış kimi qiymətləndirilməlidir, "-deyə, B.Quliyev bildirib.
İradə SARIYEVA
