Qasım Hacıyev: “Əli yüzlərlə azərbaycanlının qanına batan, Xocalı soyqırımında, Şuşanın işğalında yaxından iştirak edən bir caninin, separatçının saxta abidəsinin Xankəndidə qalması böyük ədalətsizlik olardı”
Azərbaycan torpaqları işğal altında olduğu dövrlərdə ermənilər əli azərbaycanlıların qanına batan bütün terrorçulara heykəl qoydular, onları “qəhrəman” kimi qələmə verməyə başladılar. Əslində isə onların hər biri müharibə canisi idi.
Ermənilərin “qəhrəmanlaşdırdığı”, abidəsini qoyduğu canilərdən, terrorçulardan biri də Qarabağda azərbaycanlılara qarşı saysız cinayətlər törədən terrorçu, separatçı “Bekor” ləqəbli Aşot Qulyan olub ki, onun da abidəsi 2024-cü ilin fevralında Xankəndi şəhərində sökülüb. Ermənilər buna öz aləmlərində “cinayət” donu geydirməyə çalışırlar. Bekorun heykəlinin sökülməsindən narazı qalıblar, guya onun abidəsi Azərbaycan ərazilərində qalmalı imiş.
Bəs görək A.Qulyan hansı cinayətlərə “imza atıb”?
Bekor (şüşə qırığı) ləqəbli Aşot Qulyan 1959-cu ilin 5 oktyabr tarixində Bakı şəhərində anadan olub. 1975-ci ildə Qulyanlar ailəsi əvvəlcə Ağdam rayonunun Xındırıstan kəndinə, daha sonra isə Xankəndi şəhərinə köçüblər. Qarabağda yaşadığı dövrdə sürücü, dərzi və bənna kimi müxtəlif işlərdə çalışan Bekor bu yolla ailəsini dolandırıb. Hərbi biliklərinin olmasına görə, müharibənin başlamasından az əvvəl kustar üsulla hazırlanmış əl qumbaralarının düzəldilməsində yaxından iştirak edib.
Qarabağ müharibəsinin başladığı 1991-ci ildən etibarən Bekor Aşot əmək fəaliyyətinə son verərək döyüşlərə qatılıb. Xankəndi şəhərinin işğal olunmasında canfəşanlıq edib, daha çox qan töküb, baş kəsib “ fərqlənib” və bundan sonra Ermənistan rəhbərliyinin diqqətini çəkərək hərbi döyüşlərdə de-fakto səhra komandiri olaraq xidmət edib. Aşot Qulyan ölümünə qədər apardığı döyüşlərdə bir necə dəfə yüngül və ağır güllə yaraları aldığı üçün döyüşçü yoldaşları tərəfindən Bekor (şüşə qırığı) ləqəbi ilə tanınırdı.
Şuşanın işğalı zamanı şəhərə daxil olan erməni batalyonlarından birinə rəhbərlik edən Bekor Aşot Xocalı faciəsinin törədilməsində də yaxından iştirak edib. O, ümumiyyətlə Qarabağ müharibəsi dövründə öz batalyonu ilə birlikdə Əsgəran, Hadrut, Aşağı Ağcakənd, Daşaltı, Xocavənd və Xocalı məntəqələrinin işğal olunması əməliyyatlarında iştirak etməklə yanaşı, bəzi döyüşlərə də rəhbərlik edib.
Aşot Qulyanın artan nüfuzuna baxmayaraq, terrorçu 1992-ci ilin 24 avqust tarixində Ağdərə rayonunun Ballıqaya kəndində Azərbaycan ordusunun snayperi tərəfindən açılan atəşlə öldürülüb. Ölümündən sonra Ermənistanın və qondarma rejimin bir necə medal və ordenlərinə layiq görülüb. Həmin medallardan Hərbi Xaçı qeyd etmək olar. Xankəndi şəhərində abidəsi mövcud olub və 2024-cü ildə sökülüb.
Ermənilərin Xankəndidə icazəsiz olaraq “Bekor” adı verdikləri parkda Aşota qoyduqları heykəl artıq yoxdur, ekspertlər yaxşı deyirlər, Qarabağın müxtəlif ərazilərində işğal vaxtı ucaldılan separatçı və terrorçulara məxsus müxtəlif tipli barelyef, abidə kompleksi, monumental abidə , büst və heykəllərin torpaqlarımız azad olunduqdan sonra sökülməsi Azərbaycan dövlətinin halal haqqıdır.
Şuşanın işğalında, Xocalı soyqırımının həyata keçirilməsində, digər ərazilərimizdə xalqımıza qarşı törədilən qırğınlarda yaxından iştirak edən və qəhrəman snayperimiz tərəfindən vurulan Bekor adlı caninin, separatçının Azərbaycan torpağında heykəli niyə qalmalı idi? Azərbaycan çox düzgün edib separatçının heykəlini söküb atıb. Əli xalqımızın qanına batan bir terrorçunun, separatçının abidəsinin bu torpaqda qalmasının özü tarixi ədalətsizlik olardı.
“Müharibə canisi Qulyanın heykəlinə şəhidlərimizin qanı tökülən torpaqda yer ola bilməzdi, olmadı da”
Tarix elmləri doktoru, professor Qasım Hacıyev “Bakı-Xəbər”ə bildirdi ki, ermənilərin hələ də xülyalarla yaşaması, caniləri qəhrəmanlaşdırması təəssüf doğurur. “Arsax” adlı dövlətin və xalqın olmadığını deyən Q.Hacıyev bildirdi ki, bu, Ermənistan tərəfindən saxta, süni yolla yaradılan separatçı bir təşkilat idi, onun dövlətlər tərəfindən qəbul edilən bir aktı yox idi. “Ermənilər Azərbaycan torpaqlarının bir hissəsində bu cür saxta təşkilat yaratdılar. Bu da çox absurd, ləyaqətsiz bir hərəkət idi. Dünyanın heç bir yerində belə biabırçılıq yox idi ki, onu ermənilər etdilər. Ermənilər onlara öz torpağında yaşamaq üçün yer verən Azərbaycana xəyanət etdilər və Azərbaycanın içində “dövlət” yaratmaq iddiasına düşdülər. Bu gün ermənilər çox haqsız olaraq Azərbaycanı ittiham edirlər ki, Azərbaycan onların “milli qəhrəmanlarının” heykəllərini sökür. Kimdir Aşot Qulyan? Əli yüzlərlə azərbaycanlının qanına batan, Xocalı soyqırımında, Şuşanın işğalında yaxından iştirak edən bir caninin, separatçının saxta abidəsinin Xankəndidə qalması böyük ədalətsizlik olardı. Aşot cani, separatçı olmaqla yanaşı, həm də öz doğulduğu torpağa xəyanət edən bir satqın olub. Bakıda doğulub, Qarabağda yaşayıb, Azərbaycanın çörəyini yeyib, suyunu içib sonra da bizə xəyanət edib. Aşot ona çörək verən, yaşamasına şərait yaradan xalqa qarşı separatçılıq edib, cinayət törədib. Aşot Qulyan kimi yüzlərlə Azərbaycan gəncinin qətlində iştirak edən, dövlətçiliyimizə zərbə vuran bir caninin heykəli niyə Azərbaycanda qalmalı idi? Qulyanın abidəsinin bu torpaqda qalmaq haqqı yox idi və o daş parçası da artıq mövcud deyil. Ermənilər danışanda bilsinlər ki, nədən və kimdən danışırlar”.
Q.Hacıyev qeyd etdi ki, ermənilər azərbaycanlılara qarşı cinayət törədənlərə istəyirlər Hindistanda, istəyirlər fars qardaşlarının yanında - İranda, istəyirlərsə də onlara dövlət yaradan Rusiyada abidə qoysunlar, amma heç onlar da buna imkan verməz. “Separatizmin adını “milli azadlıq mübarizəsi” qoyub Qarabağda azərbaycanlıların qanını tökdülər, o biri tərəfdən də azərbaycanlıların tökülən qanının üzərində gətirib cani Aşot Qulyana “abidəni” qoydular, amma o heykəl orda qala bilməzdi. Müharibə canisi Qulyanın heykəlinə şəhidlərimizin qanı tökülən torpaqda yer ola bilməzdi, olmadı da. O heykəl sökülməli idi və söküldü də. Buna görə Azərbaycanı heç kəs ittiham edə bilməz. Əksinə, Azərbaycan tarixi ədaləti bərpa etdi və bu belə də bilinməlidir”-deyə Q.Hacıyev bildirdi.
İradə SARIYEVA
