Akif Nağı: “Azərbaycan Prezidenti həm hərbi, həm də diplomatik uğur nəticəsində Kəlbəcərin işğalına son qoydu”
Ermənistanın Azərbaycan torpaqlarını işğaldan azad etməsi ilə bağlı BMT Təhlükəsizlik Şurasının 4 qətnamə qəbul etməsinə, ATƏT-in Minsk qrupunun 30 il bölgəyə ayaq döyməsinə baxmayaraq, torpaqlarımızın işğaldan azad edilməsi düz 30 il çəkdi.
Kəlbəcərin işğalı ilə bağlı BMT TŞ-nin qətnamələr qəbul etməsi, lakin 30 il ərzində bu sənədlərin kağız üzərində qalması bir danılmaz faktdır.
Bu məsələ ilə məşğul olan Fransa, Rusiya və ABŞ münaqişəni həll etmək əvəzinə, daha çox onu dondurmaq istiqamətində işlər aparırdı. Bu da gizlin deyil ki, Minsk qrupu və həmsədr ölkələr erməni işğalına hüquqi don geyindirmək üçün dəridən-qabıqdan çıxırdılar, bütün hallarda erməni işğalını müdafiə edirdilər. Amma Azərbaycan Prezidentinin qətiyyətli və məqsədyönümlü daxili və xarici siyasəti nəticəsində Kəlbəcər bir güllə atılmadan işğaldan azad edildi. Yəni Azərbaycanın 30 il Ermənistanın işğalı altında olan ərazilərinin böyük hissəsi müharibə yolu ilə geri qaytarılsa da, Kəlbəcər, Laçın və Ağdam bir güllə belə atılmadan azadllğına qovuşdu.
Avqustun 21-də Azərbaycan Prezidenti İlham Əliyev Kəlbəcər şəhərində 1-ci yaşayış kompleksinin ərazisində buraya köçən sakinlərlə görüşdə bu məsələyə də toxundu: “...Vətən müharibəsi başa çatanda Kəlbəcər, Laçın, Ağdamın böyük hissəsi hələ işğal altında idi. Ancaq biz kapitulyasiya aktı nəticəsində Ermənistanı məcbur etdik ki, bu bölgələri bizə qaytarsın və bunu etməyə məcbur olmuşdur. Yəni, Kəlbəcər bir güllə atılmadan azad edildi...”
“ATƏT-in Minsk qrupunun həmsədrləri Kəlbəcəri qaytarmamaq üçün çox böyük məkrli oyun qurmuşdu və Azərbaycan Prezidenti bu oyunu dağıtdı”
Azad Vətən Partiyasının sədri Akif Nağı “Bakı-Xəbər”ə bildirdi ki, Kəlbəcər ətrafında çox böyük oyunlar gedirdi və Kəlbəcər Qərb ölkələrinin və Rusiyanın maraq dairəsində idi. A.Nağı qeyd etdi ki, Kəlbəcərin işğalından bir neçə ay əvvəl
Rusiya rəhbərləri Kəlbəcərdə ən azından bir rus batalyonun yerləşməsini istədiklərini gizlətmirdilər: “Deyirdilər ki, əgər orda Rusiyanın bir batalyonu yerləşməsə hər şey başqa cür olacaq. Yəni Azərbaycanı hədələyirdilər. Doğrudan da aprel ayının 2-də Kəlbəcərə həm Qarabağın dağlıq hissəsindən, həm də Ermənistan ərazisindən hücum təşkil olundu. Ermənistan tərəfindən hərbiçilər Kəlbəcərin üzərinə yeridildi. Burda Ermənistanla yanaşı ilk dəfə Rusiya hərbiçilərinin də iştirakı ilə bağlı faktlar ortaya çıxdı, radio danışıqları tutuldu. Bu mənada Kəlbəcər Rusiyanın və Ermənistanın birgə iştirakı ilə işğal olundu. Azərbaycanda çox ciddi hakimiyyət böhranı yarandı və sair.
İşğaldan sonra danışıqlar prosesində Minsk qrupu Kəlbəcər məsələsi ilə bağlı hansısa konkret mövqe ortaya qoymaq istəmirdi. Bilirsiz ki, onların irəli sürdüyü təkliflərdə Kəlbəcər, Laçın ayrıca bir bənd kimi saxlanılırdı. 2007-2008-ci illərdə əvvəlcə “Madrid prinsipləri”ni, sonra yenilənmiş “Madrid prinsipləri” deyilən sənədi ortaya gətirdilər. Orda da Kəlbəcər və Laçının geri qaytarılması qeyri-müəyyən vaxta saxlanılırdı. İctimai fikirdə də belə rəy vardı ki, ola bilsin, hansısa rayonlar qaytarılsın, amma Kəlbəcər və Laçın qaytarılmayacaq. Laçının və Kəlbəcərin də Azərbaycan üçün çox böyük əhəmiyyəti vardı. Həmsədr ölkələr Kəlbəcərlə bağlı oyunlar oynamaq istəyirdilər. Həmsədr ölkələrin Azərbaycana qarşı ən mürtəce mövqelərindən biri Kəlbəcərlə bağlı idi. Kəlbəcərin geri qaytarılmasını qeyri-mümkün edib çətinləşdirmişdilər. Ermənilər də Kəlbəcərin geri qaytarılmasını real saymırdılar, Kəlbəcərdə sürətlə məskunlaşırdılar. Sovet hakimiyyəti dövründə “Şaumyankənd rayonu” deyilən qondarma bir bölgə yaratmışdılar, onun da bir hissəsində guya erməni əhali yaşayırdı. Müharibənin gedişində onlar da Kəlbəcərə köçmüşdülər...Bu şəkildə işlər gedirdi. Kəlbəcərdə kütləvi olaraq qanunsuz məskunlaşdırma işləri gedirdi. Kəlbəcər işğaldan azad olunduqdan sonra ermənilərin ordan çıxması da çox çətin oldu, müqavimət göstərirdilər, çıxmaq istəmirdilər, biabırçılıq edirdilər, nə var hamısını söküb aparırdılar, eybəcər işlər görürdülər, apara bilmədiklərini yandırırdılar. Ermənilərin çox böyük ümidləri var idi ki, ordan çıxmayacaqlar. Amma məsələləri özümüz həll etdik. Yəni 1992-ci ildə bu yarıtmaz həmsədrlik institutu yaranandan 2020-ci ilə qədər onların fəaliyyəti Ermənistanın işğalına haqq qazandırmaq, hüquqi don geydirmək idi. Həmsədrlər Azərbaycan torpaqlarının Ermənistana, ermənilərə verilməsinə xidmət edirdilər. ATƏT-in Minsk qrupunun ermənipərəst mövqeyi ucbatından biz 30 il bu problemi yaşadıq. Qarabağ Azadlıq Təşkilatı olaraq dəfələrlə ATƏT-in Minsk qrupu həmsədrtlərinin səfərlərinin qarşını almaq üçün aksiyalar keçirirdik. Onların iclas keçirdikləri zallara daxil olurduq.
2017-ci ildə ATƏT-in Minsk qrupunun yaranmasının 25 illiyi idi. Onunla bağlı biz simvolik tabutlar düzəltdik və həmin tabutları da aparıb BMT-nin qarşısına qoyduq, aksiya keçirdik ki, götürün meyitlərinizi, bunlar artıq meyitdilər.
Bu gün onların diri meyit olduqları ortadadır, təsdiqlənir.
Azərbaycan Prezidenti cənab İlham Əliyev də aydın şəkildə deyir ki, ATƏT-in Minsk qrupu həmsədrlik institutu bitib. Onların həmsədrləri fəaliyyətsizdir, bu ölü bir qurumdur, o ləğv olunmalıdır. Azərbaycan nə deyir onu da edir.
ATƏT-in Minsk qrupunun həmsədrləri Kəlbəcəri qaytarmamaq üçün çox böyük məkrli oyun qurmuşdu və Azərbaycan Prezidenti bu oyunu dağıtdı. Burda bir mühüm cəhəti qeyd edim ki, Azərbaycan Prezidenti həm hərbi, həm də diplomatik uğur nəticəsində Kəlbəcərin işğalına son qoydu. Deyirlər ki, heç bir döyüş olmadan, qan tökülmədən, bir güllə atılmadan Kəlbəcər, Laçın, Ağdam işğaldan azad olundu. Bu, məsələnin görünən tərəfidir. Amma Azərbaycan ordusunun keçirdiyi hərbi əməliyyatların nəticəsində ermənilər Ağdamdan, Laçından, Kəlbəcərdən çıxmalı oldular. Azərbaycanın hərbi qələbələri Ermənistanı məcbur etdi ki, həmin ərazilərdən çıxsınlar. Eyni zamanda Azərbaycan Prezidentinin çox böyük xidməti oldu ki, qan tökülmədi, ağır döyüşlər getmədi, Kəlbəcər, Ağdam, Laçın dinc yolla azad olundu. Bu, Azərbaycan Prezidentinin çox böyük uğuru idi”.
A.Nağının sözlərinə görə, üç həmsədr ölkənin bacarmadığını Azərbaycan Prezidenti bacardı: “Bunlar – Rusiya, ABŞ və Fransa dünyanın guya üç aparıcı ölkəsi idi. Amma onlar buna nail ola bilmədilər, daha doğrusu, bunu istəmədilər. Azərbaycan heç kəsin əldə etmədiyini əldə edib. Ermənistanla Azərbaycan arasında sülh prosesi də Azərbaycanın diqtəsi altında gedir. Vaşinqtonda toplantı keçirildi və toplantıda ABŞ prezidenti Donald Trampın iştirakı ilə Azərbaycan və Ermənistan rəhbərləri iştirak etdi. Orda da Azərbaycanın fəaliyyəti nəticəsində o uğurlar əldə edildi...”
İradə SARIYEVA
