Erməni müxalifətinin yalançı alibiləri sülhü əngəlləməyin bir vasitəsidir
Ermənistan müxalifətinin yaxınlaşmaqda olan sülh müqaviləsinin imzalanmasına, iki ölkə arasında münasibətlərin nörmallaşmasına ciddi cəhdlə əngəl olması təbii haldir. Çünki hazırki Ermənistan müxalifəti Koçaryan-Sarkisyan tandeminin ətrafından ibarətdir.
Onlar isə Ermənistanda Rusiya meylli siyasi qüvvə kimi tanınır. Ermənistan vətəndaşları isə, hətta 44 günlük müharibədən sonra belə Koçaryan-Sarkisyan siyasi kursuna deyil, müharibədə məğlub olmuş Paşinyana səs verdi. Yəni cəmiyyətin Ermənistanda bugünkü müxalifətə o qədər ümidi yoxdur ki, məğlub komandanı belə onlardan üstün tutdu. Bu gün də vəziyyət dəyişməyib - cəmiyyət indiki müxalifətə nifrət edir. Vardan Oskanyan da həmin müxalifətin bir nümayəndəsi olaraq sülh müqaviləsini əngəlləmək cəhdlərində bulunir.
Keçmiş XİN şefi deyir ki, mən bir iddia haqqında bilirəm və hesab edirəm ki, Azərbaycanın əsas məqsədi onu ləğv etməkdir, çünki təkcə bu qərar Azərbaycan üçün böyük başağrısıdır: "Bu, Beynəlxalq Ədalət Məhkəməsinin 2023-cü ilin noyabrında qəbul etdiyi qərardır və Azərbaycan "Artsax" ermənilərinin təhlükəsiz öz evlərinə, öz vətənlərinə qayıtmasını təmin etməyə borcludur. İnanın ki, bu, Azərbaycan üçün indiyədək başağrısı olub və gələcəkdə də böyük başağrısı olaraq qalacaq”.
Oskanyan vurğuladı ki, o, "Artsax" Komitəsinin üzvüdür və çox müsbət nəticələr qeyd edə bilər və hər şey beynəlxalq məhkəmənin qərarına əsaslanır.
Vardan Oskanyan Ermənistan siyasətçisi və diplomatı olaraq 1998–2008-ci illərdə prezident Robert Köçəryanın hakimiyyəti dövründə Ermənistanın xarici işlər naziri vəzifəsində çalışıb. Hazırkı statusunu isə o özü bəyan edir. Ermənistan müxalifəti hər vəchlə sülh müqaviləsinin mətninə razılaşdığına görə Paşinyan komandasının səhv etdiyini sübuta yetirmək istəyir. Amma bu "sübutların" hamısı Oskanyanın "sübutları" kimi saxtadır. Beynəlxalq Ədalət Məhkəməsi 2023-cü ildə belə bir qərar qəbul edibsə, onda nədən Ermənistan hökuməti Qarabağ qaçqınlarını evlərinə geri qaytarmağa cəhd etmir, onları ölkə ərazisində məskunlaşdırmağa çalışır? Əlbəttə, ona görə ki, belə bir məhkəmə qərarı olmayıb və ola da bilməzdı. Çünki Qarabağ ermənilərinin kütləvi köçünü separatçı qurum özü və Ermənistan təşkil edib. Bunun arxasında isə o məkrli plan dururdu ki, sonradan Azərbaycanı milli və irqi ayrıseçlilikdə suçlasınlar. Hansı ki, indi erməni müxalifləri və diasporu bu fikri tez-tez səsləndirir. Lakin Azərbaycan mediası Qarabağdan köçən ermənilərin hər birinin fikrini öyrənməklə Ermənistan və separatçı qurumun məqsədlərini ifşa etdi. Heç bir Qarabağdan köçən erməni sakin dilə gətirmədi ki, bizi Azərbaycan əsgəri qovdu. Hətta Nikol Paşinyan da etiraf etdi ki, dinc əhaliyə qarşı heç bir zorakılıq tətbiq edilməyib, əksinə yardımlar edildiyi məlumdur. Zorakılıq tətbiq edilməyibsə, etnik təmizləmədən və ya irqi ayrıseçkilikdən söhbət gedə bilməz.
Qarabağın erməni sakinləri Oskanyanin nəzərdə tutduğu, məhkəmə tərəfindən qeyd olunan Azərbaycan hökumətinin onlarla bağlı artıq bəyan olunmuş siyasətini qəbul edib. Bu, milli və ya etnik mənşəyindən asılı olmayaraq bütün sakinlərin təhlükəsizliyini və mühafizəsini təmin etmək barədə öhdəliyimizi əhatə edir. Azərbaycan heç vaxt erməni sakinlərini Qarabağdan çıxarmayıb. Lakin regionu tərk etməmək barədə Azərbaycanın çağırışlarına baxmayaraq, Ermənistana və digər ölkələrə köçmək onların öz qərarı olub. Azərbaycan öz Konstitusiyasına və müvafiq beynəlxalq öhdəliklərinə uyğun olaraq, Qarabağın erməni sakinlərinin insan hüquqlarını Azərbaycanın digər vətəndaşları ilə bərabər əsasda müdafiə etməyə sadiqdir.
Bu gün Qarabağı tərk etmiş ermənilərdən kimsə öz evinə qayıtmaq istəyirsə, Azərbaycan hökuməti ona da şərait yaratmağa hazırdır. Belə ki, hər bir qarabağlı erməni fərdi qaydada bu məqsədlə Azərbaycan hökumətinə müraciət edə bilər. Hökumət isə bu müraciət əsasında müvafiq qərar qəbul edərək, erməni əsilli keçmiş vətəndaşlarımızın geri qayıtmasına şərait yarada bilər. Lakin son 30 il ərzində qeyri-qanuni miqrasiya vasitəsilə Qarabağda məskunlaşdırılmış şəxslərin geri qayıtmasına müsbət cavab verilə bilməz. Çunki həmin şəxslər Azərbaycan Respublikasının qanunlarını pozaraq, dövlətə hörmətsizlik nümayiş etdirərək, ona müraciət belə etmədən ölkəmizin ərazisində məskunlaşıblar. Bu, Qarabağda erməni əsilli əhalinin sayının süni şəkildə şişirdilməsi siyasəti idi. Bu siyasiət nəticəsində Ermənistan işğal etdiyi ərazilərimizi həm də ilhaq etmək (özünə birləşdirmək) istəyirdi. Amma baş tutmadı. Ona görə də Azərbaycan hökuməti belə çirkin siyasətin alətinə çevrilmis insanların Qarabağa qayıdışını təmin edə bilməz.
Akif NƏSİRLİ
