“Ermənistan Xarici İşlər Nazirliyinin bəyanatında açıqlanan sərsəm fikirlər onu göstərir ki…”
Ermənistan Xarici İşlər Nazirliyi belə bir məlumat yayıb ki, İrəvan Azərbaycandan sülh müqaviləsi ilə bağlı cavab alıb, lakin digər sahələrdə - rabitə kanallarının bloklanması, qarşılıqlı nəzarət və silahların yoxlanılması mexanizmi ilə bağlı təkliflər hələ də cavabsız qalır.
Birincisi, bu bəyanat başdan-ayağa yalandan ibarətdir. Ona görə ki, sülh sazişi layihəsində belə məsələlər yoxdur. Kommunikasiyaların açılması məsələsi məhz Ermənistanın özünün xahişi ilə sülh sazişi layihəsindən çıxarılıb. İkincisi, silahlanmaya nəzarət də Ermənistanın qondarma təkliflərindən biridir. Dəfələrlə Ermənistan sülh prosesini uzatmaq üçün “gəlin, silahlanmaya nəzarət üzrə birgə komissiya yaradaq, saziş imzalayaq ki, iki ölkə də silahlanmasın” - deyib. Necə yəni Azərbaycan silahlanmasın? Ermənistan Azərbaycan ərazilərini zəbt edib 30 il işğalda saxlayıb, müharibədə uduzub, saziş də imzalamır, özü də deyir ki, silahlanmaya nəzarət müqaviləsi bağlayaq və silahlanmayaq. Azərbaycan Ermənistanın qabağında tərkisilah qalmalıdır? Belə şey olar? Digər tərəfdən, Ermənistan neçə müddətdir təklif edir ki, hucum etməməklə bağlı Azərbaycanla saziş imzalasın. Ermənistan Azərbaycanla bu sazişi niyə imzalayır ki? Ermənistan müharibəyə hazırlaşır və həmişə də Azərbaycana hücum etmək üçün iş görür, sülh sazişini imzalamır. Sülh sazişi imzalamırsa, demək Azərbaycanın üzərinə hücuma hazırlaşır. Belə şəraitdə belə saziş imzalamağın nə mənası var? Yəni sülh sazişinə dəxli olmayan məsələləri Ermənistanın Xarici İşlər Nazirliyi qabardır və xüsusilə də o iki məsələni - rabitə kanallarının bloklanması, qarşılıqlı nəzarət və silahların yoxlanılması mexanizmini ortaya atır və deyir ki, Azərbaycan buna hələ cavab verməyib. Bunların ikisinin də sülh sazişi ilə birbaşa heç bir əlaqəsi yoxdur və bu, Ermənistanın sülh sazişini uzatmaq üçün növbəti təxribatıdır.
“Onlar heç bir əsası olmayan bu iki məsələni irəli sürərək və reallıqdan uzaq bəhanələr gətirərək yenidən sülh müqaviləsinin imzalanmasını uzadır”
Məsələyə şərh verən siyasi ekspert Sahil Kərimli “Bakı-Xəbər”ə “Ümumiyyətlə, Ermənistan rəhbərliyi son dövrlərdə səsləndirdikləri bəyanatlarla, tutduqları mövqe və verdikləri açıqlamalarla bir daha sübut edirlər ki, Ermənistan Azərbaycanla sülh müqaviləsi imzalamaq fikrində, niyyətində deyil. İlk növbədə onu vurğulamalıyıq ki, Azərbaycanın irəli sürdüyü əsas tələblərin heç biri hələ ki, yerinə yetirilməyib. Burada konstitusiyaya düzəlişin edilməsi, Azərbaycana qarşı ərazi iddialarından əl çəkilməsi və digər tələblər var ki, Ermənistan buna əməl etmir. Son günlərdə də Ermənistan Xarici İşlər Nazirliyinin bəyanatında açıqlanan sərsəm fikirlər onu göstərir ki, onlar heç bir əsası olmayan bu iki məsələni irəli sürərək və reallıqdan uzaq bəhanələr gətirərək yenidən sülh müqaviləsinin imzalanmasını uzadır” - deyə bildirdi.
S.Kərimlinin sözlərinə görə, son zamanlar Ermənistanın atdığı həm daxili, həm xarici addımlar bir daha sübut edir ki, Ermənistan sülh istəmir. “Məsələn, Avropa İttifaqının “missiyasının” fəaliyyətinin daha iki il uzadılması, Ermənistanın kütləvi şəkildə xarici ölkələrdən silah-sursat tədarük etməsi kimi faktlar onu göstərir ki, Ermənistan vaxtı daha bir neçə il uzatmağa çalışır, vaxt udmaq niyyətindədir və bununla da sülh müqaviləsini daha bir neçə il imzalamaq fikrində deyil. Ermənistanın ciddi şəkildə silahlanması, hətta Fransanın Ermənistandakı səfirinin “Ermənistan müharibəyə hazırlaşır”, yaxud “bölgədə yeni müharibə olacaq” kimi son açıqlamaları onu göstərir ki, bəli, Fransa və onun kimi ermənipərəst ölkələr Ermənistanı müharibəyə hazırlaşdırır, onu silahlandırır, bununla da Cənubi Qafqazda sülhə və təhlükəsizliyə ciddi zərbə vururlar. Burda əsas məqsəd Ermənistandan bir vasitə kimi istifadəni davam etdirməkdən, Ermənistan üzərindən planlar qurmaq və Azərbaycana qarşı məkrli siyasət yürütməkdən ibarətdir. Burda, belə deyək, Ermənistan bir alətdir, bir vasitədir. Çünki Ermənistan bu qədər silahlandırılmaqla, əlbəttə ki, ancaq Azərbycana qarşı hərbi təxribatlara sürüklənir, bu da sonda Ermənistan üçün çox böyük faciəyə səbəb olacaq. Çünki Ermənistanı silahlandıran və yeni hərbi təxribatlara sürükləyən qüvvələr müharibə başlayarsa, əlbəttə ki, gəlib Ermənistanın tərəfindən Azərbaycan sərhədlərində bizə qarşı döyüşməyəcəklər, Azərbaycana qarşı hərbi təcavüzdən çəkinəcəklər”.
S.Kərimli qeyd etdi ki, o qüvvələr silah-sursat verib, maliyyə yardımları göstərib Ermənistanı qızışdırırlar, ancaq məqamı gələndə yenə də Ermənistanın arxasından qaçacaqlar. “Necə ki, bu gün Qərb, ABŞ Ukraynanın arxasından qaçıb və Ukraynanı meydanda tək qoyub. Bütün bunlar onu göstərir ki, Ermənistan müharibəyə təhrik edilərsə, elə proseslərin sonunda zərər çəkən, birdəfəlik məhv olan da Ermənistan adlı dövlət olacaq” - deyə S.Kərimli bildirdi.
İradə SARIYEVA
