Faiq Ələkbərli: “Paşinyan hökuməti özü Minasiyanı və onun kimilərini tutub ya Ermənistanda məhkəmə qarşısına çıxarmalıdır, ya da Azərbaycana təhvil verməlidir”
Bu günlərdə sosial şəbəkələrdə erməni “generalın” Xocalı soyqırımı ilə bağlı qandonduran açıqlaması yayılmışdı. Eyni zamanda Türkiyənin “Star” qəzeti özünü “erməni generalı” adlandıran Levon Minasyanın Xocalı soyqırımında iştirakına dair soyuqqanlı etirafını oxucularına çatdırıb. Nəşr Minasyanın gürcü bloger ilə söhbətində səsləndirdiyi sözlərə istinad edir.
Blogerin “Xocalıda olmusunuzmu” sualına Levon Minasyan belə cavab verir: “Xocalı faciəsini mən törətmişəm”. Nəşr “generalın” bəşəriyyətə qarşı cinayəti etiraf etməsini dəhşətli adlandırıb. Minasyan etiraf edib: “ Xocalıda o qədər insan öldürmüşəm ki, sayını da bilmirəm”. Qəzet qeyd edir ki, Minasyanın dəhşətli sözləri blogerin özünü şoka salıb və ictimaiyyət arasında ciddi tənqidlərə səbəb olub.
Bu cani etiraf edib ki, Xocalı soyqırımı zamanı çoxlu sayda azərbaycanlı öldürüb.
Bu fakt Azərbaycana imkan verirmi ki, Azərbaycan beynəlxalq hüquq müstəvisində həmin bu adama qarşı cinayət işi qaldırılması iddiası ilə çıxış etsin?
“Azərbaycanın əlində kifayət qədər əsas var ki, Minasiyanın cinayətləri ilə bağlı beynəlxalq məhkəməyə müraciət etsin”
Fəlsəfə doktoru, siyasi ekspert Faiq Ələkbərli “Bakı-Xəbər”ə şərhində bildirdi ki, əvvəlcə erməni “generalın” harda olduğu müəyyənləşdirilməlidir və ona qarşı sərt tədbirlərin görülməsinə nail olunmalıdır. Xocalı soyqırımının ildönümləri ərəfəsində erməni cəlladlarının mütəmadi belə etiraflar etməsinin şahidi olduğumuzu deyən F.Ələkbərli hesab edir ki, bu qatillərin hər biri layiqli cəzasını almalıdır. “Özünü “general” kimi qələmə verən bir caninin “Xocalı faciəsini mən törətmişəm. Bu mənim işimdir” etirafına birmənalı yanaşmaq olmaz. Xocalıda baş verən soyqırımının əsas “qəhrəmanlarından” biri olmasını ortaya qoymasını bir neçə məsələ ilə izah etmək olar. Birincisi, bu kimi canilər, terrorçular, qatillər demək istəyirlər ki, biz zamanında azərbaycanlılara qarşı genosid törətmişik. Bu, ermənilərə mesajdır, Levon Minasyan adlı cani onları yenidən revanşizmə, yeni terrorlar törətməyə səsləyir. Bu qəbuledilməzdir. Hesab edirəm ki, dünya ictimaiyyəti buna ciddi təpki göstərməlidir. Bu kimi canilərin azadlıqda qalması və hər fürsətdə qandonduran etiraflar etməsi erməniləri yeni terror aktlarını törətməyə sövq edir. Yəni “mən bu cinayəti törətdim, amma hələ də azadlıqdayam, siz də azərbaycanlılara qarşı terror aktları həyata keçirin” mesajını verir. Belələrini vaxtında cəzalandırmaq lazımdır. Hesab edirəm ki, Azərbaycanın müvafiq orqanları o adamın tapılması, tutulması istiqamətində hərəkətə keçməlidir. Qardaş Türkiyənin və başqa türk dövlətlərinin aidiyyəti orqanları da azadlıqda qalan və cəzalandırılmayan Xocalı canilərinin saxlanılmasında bizə dəstək olmalıdır. Levon Minasyan kimi Xocalı qatillərinin cəzalandırılması ən vacib məsələdir”.
Hələ də cəzasız qalan L.Minasyanın bu cür açıqlamalarla dünyaya özünü tanıtmaq, ermənilərin hər cür terrora hazır olduğunu çatdırmaq istədiyini deyən F.Ələkbərli hesab edir ki, onun kimiləri dünyada bir erməni mifi yaratmaq niyyəti güdürlər. “Levon Minasyanın və başqalarının törətdiyi cinayətlərə Ermənistan cəmiyyətinin özü də sərt reaksiya verməlidir. Söhbət insanlıq əleyhinə cinayətlərdən gedir. Azərbaycan beynəlxalq hüquq müstəvisində bu məsələni həll etmək üçün addımlar atmalıdır. Azərbaycan hökuməti ilə yanaşı Ermənistan hökuməti bu məsələ ilə ciddi maraqlanmalıdır. Ermənistan özü Minasyan kimi caniləri axtarıb tapmalı və məhkəmə qarşısına çıxarmalıdır. Paşinyan hökuməti Ermənistan və Azərbaycan arasında normallaşmadan danışırsa, eyni zamanda ölkəsinin səhvlərini müəyyən qədər etiraf edirsə, onda Xocalı caniləri ilə bağlı məsələni də etiraf etməlidir. Paşinyan hökuməti Xocalı soyqırımını Rusiyanın üzərinə yıxmaqla işi bitmiş saymamalıdır. Çünki ortada faktlar var, o canilərin əksəriyyəti yaşayır və özləri etiraf edirlər ki, Xocalı soyqırımının törədilməsində yaxından iştirak ediblər. Canilər özləri etiraf edirlərsə Paşinyan hökuməti niyə bunu etiraf etmir? Fikrimcə, Paşinyan hökuməti özü Minasiyanı və onun kimilərini tutub ya Ermənistanda məhkəmə qarşısına çıxarmalıdır, ya da Azərbaycana təhvil verməlidir. Bütün bunlar baş verməsə, Azərbaycan dövləti, hüquq-mühafizə orqanlarımız necə ki başqa caniləri tutub Bakıya gətirdilər və məhkəmə qarşısına çıxardılar, əminik ki, eləcə də Minasyan və onun kimi cəlladlara qarşı da bu addımı atacaq. Azərbaycan Minasyanı beynəlxalq axtarışa verməlidir və onun tutulub ölkəmizə təhvil verilməsini tələb etməlidir. O hansı ölkədə yaşamasından asılı olmayaraq tutulub ədalət məhkəməsinə təslim edilməlidir. Eyni zamanda, Azərbaycanın əlində kifayət qədər əsas var ki, Minasyanın cinayətləri ilə bağlı beynəlxalq məhkəməyə müraciət etsin. Hesab edirəm ki, çox çəkməz bu da baş verər. Minasyana ən ağır cəza verilməlidir ki, dünya cinayətkarın cəzasız qalmadığını görsün. Bu, başqalarına da görk olsun ki, azərbaycanlıların qanını tökən heç bir cəllad cəzadan, ədalət məhkəməsindən canını qurtara bilməz”-deyə F.Ələkbərli vurğuladı.
İradə SARIYEVA
