Rəşad Bayramov: “Məgər Ermənistan bu beynəlxalq müqaviləyə qoşulsa nəsə dəyişəcək?”
Ermənistan Beynəlxalq Silah Ticarəti Müqaviləsinə qoşulmağı düşünür. Bunu Cenevrədə tərksilah üzrə konfrans zamanı Ermənistan Xarici İşlər Nazirliyinin rəhbəri Ararat Mirzoyan deyib.
Ermənistan XİN rəhbəri qeyd edib ki, effektiv fəaliyyət göstərən silahlara nəzarət rejimi beynəlxalq, regional və subregional səviyyədə hərbi-siyasi sabitliyin təmin edilməsi baxımından zəruridir. Onun sözlərinə görə, İrəvan davamlı sülh və təhlükəsizliyin təmin edilməsi üçün mühüm ilkin şərt kimi silahlara nəzarət sazişlərinin ciddi şəkildə yerinə yetirilməsinə tərəfdardır: “Bu kontekstdə biz Beynəlxalq Silah Ticarəti Müqaviləsinə qoşulmaq imkanını da nəzərdən keçiririk”.
Görünən odur ki, əslində Ermənistan Beynəlxalq Silah Ticarəti Müqaviləsinə qoşulmaq adı altında siilahlanmasını maskalamaq istəyir. Çünki son bir ildə Ermənistanın sürətlə silahlanması ortadadır. Ermənistan Fransa, Hindistan, Yunanıstan və digər ölkələrdən ağır hücum silahları alır.
“Bununla onlar dünya ictimaiyyətini aldatmağa, özlərini sülhpərvər tərəf kimi göstərməyə çalışırlar”
Sözügedən məsələni “Bakı-Xəbər”ə şərh edən AMİP Ali Məclisinin sədri Rəşad Bayramovun fikrincə, tarixi hərbi cinayətlərlə dolu olan, xalqımıza qarşı soyqırımlar törətmiş bir dövlətin Beynəlxalq Silah Ticarəti Müqaviləsinə qoşulmaq istəməsini bəyan etməsi olduqca absurd səslənir: “Beynəlxalq Silah Ticarəti Müqaviləsi dövriyyəsi xüsusi konvensiyaya uyğun olaraq məhdudlaşdırılmış beynəlxalq silah ticarətini tənzimləyən çoxtərəfli beynəlxalq müqavilədir. Sözügedən müqavilə əslində dünyada qanunsuz silah ticarətinin qarşısını almaq üçün hazırlanıb. Ancaq sənəddə digər bir sıra məsələlər də var. Sənəd şərti silahların ixracı üçün yeni standartlar, o cümlədən, embarqo və sanksiyalara zidd olaraq adi silahların ixrac edilməsinin qadağan edilməsi ilə yanaşı, soyqırım, insanlığa qarşı cinayətləri, hərbi cinayətlər və terror hücumlarını da pisləyən bir sənəddir. Bu istiqamətdə fəaliyyətlə məşğul olan dövlətlərə bu və ya digər şəkildə silah satışını qadağan edir. Sənəd 2013-cü ildə qəbul olunub. Orada insan hüquqları və humanitar hüquqlar haqqında beynəlxalq hüquq normalara uyğunluq, BMT-nin adi silahlar reyesterində məcburi iştirak, regional sülh, təhlükəsizlik və sabitliyin möhkəmləndirilməsi ilə bağlı öhdəliklər də öz əksini tapıb. Məgər Ermənistan bu beynəlxalq müqaviləyə qoşulsa nəsə dəyişəcək? Əsla yox. Ermənistan hazırda qanunsuz olaraq Fransa, Hindistan hesabına silahlanır. Regionda sülh və sabitlik üçün təhdid rolunda çıxış edir. O baxımdan bu müqaviləyə qoşulsa da dəyişən bir şey olmayacaq. Ermənistan yenə öz bildiyini edəcək və silahlanmaqda davam edəcək. Ermənistan faktiki olaraq Azərbaycan tərəfinin təklif etdiyi sülh sazişi imzalamaqdan boyun qaçırır. Ona görə də Ermənistan öz cinayətlərini gizlətmək üçün belə bir təşəbbüslə çıxış edir. Ermənistanın faktiki olaraq hazırda aldığı silahların həçminə və növünə baxanda da bunu kifayət qədər aydın görmək olur. Ona görə də Ermənistan sadəcə bununla maskalanmaq istəyir. Bununla onlar dünya ictimaiyyətini aldatmağa, özlərini sülhpərvər tərəf kimi göstərməyə çalışırlar”.
Vidadi ORDAHALLI
