Əli Mustafa: “Onlar üstün mövqedə olsalar istənilən həmləni edə bilərlər”
“Hər iki tərəf ən pisə hazır olmağa davam edir ki, bu da açıq-aşkar görünür”. Bunu Ermənistanın rəsmi “Armenpress” agentliyinə müsahibəsində Avropa İttifaqının Ermənistandakı Mülki Missiyasının rəhbəri Markus Ritter bildirib.
Onun sözlərinə görə, yalnız Azərbaycan tərəfində nələr baş verdiyini yox, həm də Ermənistan tərəfində nələr baş verdiyini müşahidə edirlər: “Çünki Brüssel bizdən sərhəddəki vəziyyətin necə olduğunu bilmək istəyir. Onlar yalnız Azərbaycanın etdiklərini bildirməyimizi istəmir. Ona görə də biz hər iki tərəfi müşahidə edirik və həmişə açıq şəkildə patrul çəkirik. Heç vaxt haradasa gizlənmirik. Hazırda heç bir hadisə baş vermir. Hər iki tərəf mövqelərini gücləndirir. Hər iki tərəf ən pisə hazır olmağa davam edir ki, bu da açıq-aşkar görünür”.
M.Ritterin hər iki tərəfin ən pis ssenariyə hazırlaşmalı olduğunu deməsi əslində Ermənistanın müharibəyə hazırlaşdığının təsdiqidir, başqa bir şey deyil.
“Müşahidələrə dayanaraq Aİ missiyası bununla bizə mesaj verir ki, Ermənistan müharibəyə hazırlaşır”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, bu gün Aİ Mülki Missiyası Ermənistan ərazisində yerləşib və daha çox həmin ölkədən bizə baxır: “Təbii ki, bu bizdə qıcıq və narahatlıq yaradır. Həm o missiyanın statusu ilə bağlı, eyni zamanda bunu Azərbaycanla razılaşdırmaması, həm də vaxtla bağlı məsələləri ölkəmizlə razılaşdırmaması bizim narazılığımızı şərtləndirir. Ancaq o da var ki, bu missiyanın əsas işi müşahidə aparmaqdır. M.Ritter hər iki tərəfi müşahidə etdiklərini desə də, onlar əsasən Azərbaycanı müşahidə edirlər. İstisna deyil ki, hətta bəzi məlumatları Ermənistana ötürürlər. Söhbət kəşfiyyat məlumatlarından gedir. Ancaq müşahidələrə dayanaraq Aİ missiyası bununla bizə mesaj verir ki, Ermənistan müharibəyə hazırlaşır. Ermənistan bizə arxayın deyil. Bunu əllərində əsas tutaraq mühəndis-istehkam qurğuları tikirlər, səngərlər qazıb möhkəmləndirmə işləri aparırlar. Ona görə də bütün bunlar reallıqdır. Ritter həm də dolayı olaraq demək istəyir ki, Azərbaycan Ermənistanın zəif olduğunu, yerində saydığını düşünməsin. Ona görə də burada sətiraltı məqamlar çoxdur. Bu səbəbdən bizim üçün vacib çıxarılası nəticə odur ki, Ermənistan dayanmayıb və müəyyən hazırlıqlar görür. Bu isə o deməkdir ki, hər dəqiqə müəyyən risqlər ola bilər. O üzdən, biz bütün bunları ciddi təhlil edib təhlükəsizliyimizi artırmalıyıq. Yəni heç vaxt erməni tərəfin üstün imkanları olmasın. Ona görə ki, Ermənistana etibar etmək olmaz. Çünki onlar üstün mövqedə olsalar istənilən həmləni edə bilərlər. Ona görə də davamlı olaraq müdafiə qabiliyyətimizi artırmalıyıq”.
Vidadi ORDAHALLI
