Təbriz Musayev: “Paşinyan bu məsələdə birinci qonşularla münasibətləri sahmana salmalıdır”
Ermənistanın baş naziri Nikol Paşinyan öz ideoloji canlı yayımında yeni Konstitusiyanın referendum yolu ilə qəbul edilməsinin “Real Ermənistan” ideologiyası üçün mühüm əhəmiyyət kəsb etdiyini bildirib.
“Real Ermənistan beynəlxalq ictimaiyyət tərəfindən tanınan, 29,743 kvadrat kilometr ərazini əhatə edən Ermənistandır. Bu sistem üçün yeni Konstitusiyanın ümumxalq referendumu ilə qəbul edilməsi vacibdir, çünki bundan əvvəl keçirilmiş bütün konstitusiya referendumları ciddi legitimlik çatışmazlığına malik olub. Yeni Konstitusiyanın qəbulunun strateji məqsədi dövlətçiliyi olmayan bir millətin qalıq fəaliyyət modelindən dövlət qurucu xalqın fəaliyyət modelinə keçidini təmin etməkdir”, - deyə Paşinyan vurğulayıb.
Maraqlıdır, Ermənistanın yeni “Real Ermənistan” milli ideologiyası nə qədər uğur qazanmaq potensialına malikdir? Bu milli ideologiya Ermənistanın qonşuları ilə tam sülhə nail olunmasına gətirib çıxara bilərmi? Ermənistanı izolyasiyadan çıxara biləcəkmi? Bu yeni ideologiyanın gücü varmı və bu nədədir?
“Problem ondadır ki, Ermənistan cəmiyyətində xəstə təfəkkürdən çıxış edənlərin sayı az deyil”
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev “Bakı-Xəbər”ə açıqlamasında bildirdi ki, bütün bunlar Ermənistan hakimiyyətinin, cəmiyyətin bu ideyanın həyata keçirilməsinə nə dərəcədə səmimi və real yanaşmasından asılıdır: “Məsələ ondadır ki, həqiqətənmi Ermənistan bu ideyadan irəli gələn yeni yanaşmaları həyata keçirməkdə qərarlıdır? Çünki Paşinyanın nə dərəcədə xoş niyyətlə çıxış etməsi bəlli deyil. Problem ondadır ki, Ermənistan cəmiyyətində xəstə təfəkkürdən çıxış edənlərin, ictimai rəyə təsir etmək gücündə olanların sayı az deyil. İllərlə imperialist dövlətlər, əsasən də Rusiya erməniləri xəstə ideologiya ilə bəsləyərək öz məqsədləri üçün istifadə edib. Son nəticədə ermənilərdən rezin əlcək kimi istifadə edib kənara atıblar. Biz nəzərə almalıyıq ki, qondarma “erməni soyqırımı” məsələsini ötən əsrin 50-ci illərinin əvvəllərində SSRİ ortaya atdı. Səbəb də o idi ki, Stalin Qara dənizdə boğazları ələ keçirmək üçün Türkiyəyə qarşı ərazi iddiaları ilə çıxış etməyə başladı. Bu cəhdlər fiaskoya uğradı və Türkiyə özünü qorumaq üçün NATO-ya üzv oldu. Elə bunun nəticəsi idi ki, 1965-ci ildə İrəvanda ermənilər qondarma “soyqırımın” 50 illiyini qeyd etdilər. İndi Paşinyan anlayır ki, bu xəstə yanaşmadan əl çəkməsələr Ermənistanı belə itirə bilərlər. Çünki tarixi Azərbaycan ərazilərində yaradılan süni dövlətdir. İllərdir Ermənistan əhalisinin sayı artmır, ölkədən xaricə miqrasiya dayanmır. O biri tərəfdən də erməni cəmiyyəti reallıqla hesablaşıb xəstə təfəkkürdən imtina etmir. İrəvanda “Nemezis” əməliyyatı “qəhrəmanları”na, yəni terrorçulara abidə ucaldırlar. Özü də bu, Köçəryan və Sarkisyanın prezidentliyi dövründə yox, məhz Paşinyanın hökumətə rəhbərliyi dövründə baş verir. Bu, 2023-cü ildə olub. Hələ utanmadan da Türkiyə ilə münasibətlərin normallaşmasından, sərhədlərin açılmasından dəm vururlar. Ona görə də Paşinyanın səmimiliyinə inanmaq çətindir. Düzdür, Paşinyan Ermənistandakı revanşist əhval-ruhiyədən çəkinir. Üstəlik, ortada xarici amillər də var. Bir də gördün, Rusiya revanşistləri ayağa qaldırıb Paşinyanı devirdi. Trampın Ukrayna ilə bağlı biabırçı mövqeyindən sonra hər şey mümkündür. Ona görə də əgər Paşinyan yeni ideologiyada qərarlıdırsa, birinci qonşularla münasibətləri sahmana salmalıdır. Əks təqdirdə bu, boş bir şey olacaq”.
Vidadi ORDAHALLI
