Ermənilər Xankəndidən qaçır - şəhər sülhməramlıların mühasirəsində...

Rusiya sülhməramlılarının Xankəndini mühasirəyə aldığına dair məlumatlar yayılıb. Erməni mənbələrin yaydığı məlumata görə, sülhməramlılar ermənilərin Qarabağdan çıxışına maneə törədir. Bu məqsədlə Xankəndidən Ermənistana gedən yolda nəzarət gücləndirilib.

Bunu hətta erməni ekspertlər də etiraf ediblər. Erməni ictimai xadim Mikael Ayrapetyan bildirib ki, Qarabağ məsələsi Rusiyanın Cənubi Qafqazda mövcudluğunun əsas nöqtəsidir:

“Ona görə də Rusiya problemin həllini istəmir. Rusiya Qarabağı mühasirədə saxlayır ki, erməni əhalisi getməsin”.

Məlumatlara görə, son 5 gündə 100-dən çox erməni Laçın postundan istifadə etməklə Ermənistana köçüb. Yaxın günlərdə köçənlərin sayının daha da çoxalacağı gözlənilir. Bir neçə gündə bu qədər adamın bölgəni tərk etməsindən sonra Rusiya sülhməramlıları hərəkətə keçib və ermənilərin çıxışına problemlər yaradılır”.

Yaranmış bu vəziyyət nə vəd edir?

Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Laçın postundan keçən ermənilərlə bağlı kadrlar da bu məlumatın doğruluğunu təsdiq edir: “Onlar Azərbaycan qanunvericiliyinə uyğun şəkildə hərəkət edir, o cümlədən, Azərbaycan mülki şəxslərin sərbəst hətəkətinə tam şərait yaradır. Məlumatlara görə, son 5 gündə Qarabağdan 100-ə qədər erməni Ermənistana köçüb. Bunu separatçıların qondarma “ombudsmanı” Geqam Stepanyan da təsdiq edib. Görünən budur ki, bir çox separatçı meylli erməni mövcud vəziyyətdə Qarabağda qalmaq istəmir, çünki Azərbaycanın öz tələbləri var və separatçı rejim təslim olmamaq üçün əhalini qırğına verməyə hazırdır. Bu baxımdan, ermənilərin əsas istəyi qayıtmaq yox, getməkdir. Qarşıdakı dövrdə Ermənistana gedənlərin sayının daha da artacağı gözlənilir. Azərbaycan sadə ermənilərə dəfələrlə müraciət edib ki, onlar bərabərhüquqlu vətəndaş kimi hüquqlarımızdan istifadə edə bilərlər. Separatçı rejim erməni əhalisinin Qarabağda yaşamasını çətinləşdirən əsas problemə çevrilib. Əhalinin bir qismi bölgəni tərk etmək, digər qismi Azərbaycan vətəndaşlığı altında rahat yaşamaq istəsə də, separatçılar öz mövcudluqlarını qorumaq üçün onların nə getməsinə, nə də Azərbaycana inteqrasiya olunmasına imkan verir. Ermənilərin Qarabağı tərk etmələrinin digər səbəbi təhlükəsizliklə bağlıdır. Azərbaycan Qarabağdakı ermənilərin təhlükəsizliyinə zəmanət versə də, separatçı rejim mütəmadi təxribatlar təşkil etməklə, sakinlərin həyatı üçün təhdidlər yaratmaqdadır. Separatçılar tərəfindən mülki ermənilərə göstərilən təzyiq və təhdidlər, hüquq və azadlıqlarının əllərindən alınması və s. onları bölgəni tərk etməyə vadar edir. Separatçıların öz aralarındakı qarşıdurmanın fəsadlarının ermənilərin gündəlik həyatına ciddi təsir göstərməsi faktı da Qarabağın ermənisizləşməsinin əsas amillərindən biridir. Bu kimi məqamları erməni mediası da etiraf edir”.

Ekspertin sözlərinə görə, Qarabağı tərk edənlərin bir qismi son 30 ildə – işğal dönəmində burada məskunlaşan ermənilərdir: “Onlar mövcud status-kvo çərçivəsində öz gələcəklərini regionda görmürlər. Qarabağ həmin ermənilərin vətəni olmadığı üçün bölgədə separatizmin tüğyan etdiyi, Azərbaycanla Ermənistan arasında sülh müqaviləsinin imzalanması prosesinin uzandığı bir zamanda bölgədən çıxmağı daha məqsədəuyğun hesab edirlər. Rus sülhməramləıları üçün ermənilərin orada qalmağı sərf edir ki, onlara zərurət olsun. Əminamanlıq olsa, rus sülhməramlılarına da regionda ehtiyac olmaz. Bu səbəbdən də prosesin qarşısını almaq istəyirlər”.

Məhəmmədəli QƏRİBLİ