Uzun illərdir ki, mollakratiya rejimi erməni daşnaklarına qucaq açıb, onların Azərbaycan, Türkiyə əleyhinə kampaniya aparmasına dəstək olur, bütövlükdə anti-türk hərəkətlərinin arxasında dayanır.
Tehran rejimi bütün imkanları ilə ermənilərin yanında olduğunu göstərir. “İki mədəniyyət bir millət”, yaxud “İki dövlət bir svilizasiya” kampaniyaları onların məqsədlərini göstərir. Yeri gəlmişkən, ermənilər eyni sloqanı Fransa-Ermənistan münasibətlərinə də aid edirlər.
Məsələ burasındadır ki, bu gün ermənilər fransız və fars bacılarının dəstəyi ilə tədbirlər düzənləyirlər, dünyaya növbəti yalanlarını yayırlar.
Martın 3-dən başlayaraq indiyə qədər Tehranda ermənilərlə bağlı bir neçə tədbir keçirilib. Bu barədə ArazNews.az maraqlı bir araşdırma aparıb.
“Tehran hakimiyyəti ölkədə erməni ekstremistləri kimə qarşı bəsləyir?” başlıqlı araşdırmada qeyd edilir: “Ard-arda seçkilərdə erməni xalqının şilləsinə tuş gələn və indi nə İrəvanda, nə də Moskvada o qədər də gücü olmayan erməni ekstremist millətçiləri, o cümlədən “Daşnaksutyun” partiyası Tehrandan göstərilən xoş üz və səmimiyyətdən cəsarət alıb, İranşəhri faşist düşüncəsi cərəyanının çətiri altında hərəkatı Tehranı anti-Azərbaycan fəaliyyətlərinin mərkəzinə çeviriblər.
“Erməni Milli Komitəsinin (HOOSK) yaradılmasının 40 illiyi Tehranın Erməni Klubunda Ermənistandan gələn qonaqların və rəsmilərin iştirakı ilə qeyd olundu.
Tehranda “Ermənistan və Artsax regional geosiyasi hadisələrin mərkəzində” iclası keçirildi.
“Martın 3-də Erməni Problemlərinin Araşdırılması Mərkəzinin (HOOSK) təşkilatçılığı ilə keçirilən “Ermənistan, Artsax və Dəyişən Region” adlı 14-cü konfransı öz işini başa vurdu.
Martın 5-də Tehranda çoxlu sayda İran (İranşəhri) qurumları və fəallarının iştirakı ilə “Qafqaz geosiyasi tənlikləri, regional və qeyri-regional aktorlar” seminarı keçirildi.
Bu həcmdə fəaliyyət İranda Daşnaksutyunun qolları olan Hoor İnstitutu, Alik qəzeti və Erməni Xilafəti ilə cəmi bir həftə ərzində həyata keçirilib.
Bütün bunlar Azərbaycan və İranın digər bölgələrində türklərin oyanış dalğasından fars millətçiliyinin qorxu və narahatlığından qaynaqlanır. Bəs, doğrudan da, nə qədər aciz və məğlub erməni faşistləri fars millətçiliyinin dərdinə şəfa verə bilər?! İranşəhri hərəkatı Azərbaycan və İranın digər bölgələrində türklərin oyanış dalğasına təzyiq göstərmək üçün erməni millətçiliyindən kömək istəyir.
Görəsən cılız erməni millətçiliyinin belə qabiliyyəti var?!”
ArazNews.az daha sonra yazır ki, İran rejimi Azərbaycanla düşmənçilik siyasətini ən yüksək səviyyəyə çatdırıb: “Daşnaksutyun Partiyasına bağlı Hoor İnstitutunun ev sahibliyi etdiyi "Qafqaz geosiyasi tənlikləri, regional və qeyri-regional aktorları" adlı toplantıda Elahe Kulayi kimi tanınmış simalar iştirak edib və konfransın xəbəri dövlət mediası tərəfindən əks olunub.
Bu konfrans Türkiyə və Azərbaycan arasında "İki Dövlət, Bir Millət" şüarının təqlidi olan "İki Millət, Bir Sivilizasiya" şüarı ilə keçirilib.
İran rejimi bu şüarla Türkiyə ilə Azərbaycan arasındakı strateji müttəfiqliyinə zidd olan İran və Ermənistan arasında strateji müttəfiqlik qurduğunu göstərməyə çalışır.
İran, deyəsən, yalnız bir şeyi unudub. Türkiyənin önəmli sayda erməni əhalisi yoxdur, amma İranda 40% türk var”.
Göründüyü kimi, Tehran rejimi öz erməni faktorundan da bizə qarşı istifadə etmək istəyir. Əlbəttə, məqsəd odur ki, Cənubdakı soydaşlarımızla daşnaklar arasında qarşıdurma yaransın. Molla rejiminin daşnaklardan növbəti təxribatlar üçün istifadə edəcəyi şübhə doğurmur. Mart ayı yeni daxil olub, bu günlər ərzində Tehranda ard-arda bir neçə anti-türk, anti-Azərbaycan yığıncaqları keçirlib.
“Tehran rejimi müstəqil Azərbaycan dövlətinin varlığını heç bir formada qəbul edə bilmir...”
Mövzu ilə bağlı şərh verən müstəqil siyasətçi Bünyamin Qəmbərli “Bakı-Xəbər”ə bildirdi ki, molla rejiminin bu addımının səbəbi məlumdur. “Dəfələrlə demişəm ki, Tehran rejimi müstəqil Azərbaycan dövlətinin varlığını heç bir formada qəbul edə bilmir, bundan sonra da etmək ehtimalı yoxdur. Çünki, hətta Nargin adasında da olsa, müstəqil Azərbaycan dövlətinin olması İran üçün bir işarədir ki, gec-tez İranın işğalında olan Azərbaycan torpaqları (Güney Azərbaycan) azad olunacaq və müstəqil, bütöv Azərbaycan qurulacaq. Buna görə də rejim heç bir formada müstəqil Azərbaycan dövlətinin varlığını qəbul etmir. Müstəqil Azərbaycan dövlətinin olmaması üçün İran bütün qəbul olunan və olunmayan üsullardan istifadə edir ki, Azərbaycan dövlətini dağıtsın, məhv etsin, yaxud oyuncağa çevirsin. O üsullardan biri də Azərbaycanın torpaqlarında dövlət quran ermənilərdir. Ermənilər hər zaman böyük güclərin əlində alətə, vasitəyə çevrilib. Zaman-zaman ermənilərdən fransızlar, ingilislər, amerikalılar, rusiyalılar, eləcə də farslar özü Azərbaycana və Osmanlıya qarşı istifadə ediblər. Bu gün dövlətimiz İranın marağında olduğu üçün istər “Daşnaksütyun”dan, istər Erməni Milli Komitəsindən, istərsə də, digər erməni quruluşlarından Azərbaycana qarşı istifadə etməyə çalışır. Təbii ki, molla rejiminin erməni daşnaklarından bizə qarşı istifadə cəhdləri bizim üçün çox həssas və düşündürücü məsələdir. Həmişə bu fikirdəyəm ki, nəyin bahasına olursa olsun, Azərbaycanın Güneyinin istiqlalına nail olmalıyıq”.
B.Qəmbərlinin fikrincə, müstəqil Azərbaycan dövləti Azərbaycanın Güneyinin istiqlala nail olması üçün bütün mümkün variantlardan, maddi-mənəvi, təşkilati, informasiya dəstəyi və s imkanlardan istifadə etməlidir. “Dövlətimiz eyni zamanda siyasi dəstək verməlidir ki, Azərbaycanın Güneyi tezliklə öz istiqlalına qovuşsun və tezliklə bütöv Azərbaycan yaransın. Əgər İran adlanan ölkə parçalanmasa, Güney Azərbaycan öz istiqlalına qovuşmasa tezliklə Azərbaycan dövlətinin mövculuğu üçün İran bir təhlükəyə çeviriləcək. Hələ ki, İran zəfidir, indiki halda Ermənistan da çox gücsüzdür. Azərbaycan beynəlxalq aləmdəki dostlarının, müttəfiqlərinin dəstəyi ilə güclüdür. Buna görə də İran bu gün bizə qarşı bu oyunları oynayır. Siz təsəvvür edin ki, İran və Ermənistan güclənərsə və Azərbaycan zəifləyərsə bizi hansı təhlükələr gözləyir. Bu təhlükələrin qarşısını almağın bəri başdan almağın bircə yolu var - İranın parçalanması, Azərbaycanın Güneyinin öncə istiqlalına qovuşması, sonra isə bütöv Azərbaycanın yaranması” - deyə B.Qəmbərli qeyd etdi.
İradə SARIYEVA
