Fransa prezidenti Emmanuel Makron növbəti Afrika turunu başa vurub. Səfər zamanı Fransa prezidenti işgüzar və humanitar əməkdaşlığa diqqət yetirib. Lakin onun Afrikanın 5 ölkəsinə səfəri uğurla nəticələnməyib.
Makronun Afrika turnesi ona qarşı ciddi etiraz aksiyaları ilə müşahidə olunub. Fransanın soyqırımlarını unutmayan afrikalılar Parisi müstəmləkiçilik siyasətindən əl çəkməyə çağırıblar. Bundan başqa, Konqo Demokratik Respublikasının prezidenti Feliks Tşisekedi ilə Makron arasında keçirilən birgə mətbuat konfransı zamanı gərgin anlar yaşanıb. Tşisekedi Makrona açıq şəkildə qəzəbli tonda bildirib ki, Fransa və Qərb Afrikaya qarşı imperativ münasibətdən əl çəkməlidir. O, Fransanın 1994-cü ildə Ruandada soyqırımda iştirakını xatırladıb: “Paris Afrika ölkələri arasında ikili siyasət yürüdür. Bizə hörmət edin və əsl tərəfdaş kimi görün. Bizə fərqli bir şəkildə baxın. Françafrique artıq yoxdur”.
Makron isə buna dözməyərək onunla uğursuz mübahisə edib.
“Məhz bu səbəbdən Makronun səfər etdiyi ölkələrdə etiraz aksiyaları keçirildi”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, bütün bunlar Fransanın əsl simasını ortaya qoyur: “Əvvəla, Fransa ATƏT-in Minsk Qrupunun nümayəndəsi kimi əvvəllər örtülü şəkildə, 44 günlük Vətən müharibəsində isə açıq şəkildə ermənipərəst siyasət yeritməyə başladı. Yəni haqqı müdafiə etmədi. Ona görə ki, işğala məruz qalan Azərbaycan idi. Buna baxmayaraq özünü demokratiyanın hamisi hesab edən Fransa bunları görməzdən gəldi. Bütün bunlar bizi bir daha tarixə nəzər salmağa vadar etdii. Məsələ ondadır ki, Fransa uzun illər Afrikanın mərkəzində, şimalında və qərbində müstəmləkəçilik siyasəti yeridib. Afrikada çoxsaylı soyqırımlar törədib. Tarix boyu bunların törətdikləri cinayətlər bir daha üzə çıxdı. Yəni, 21-ci əsrdə tarixi faktları gizlətmək mümkün deyil. Fransanın müstəmləkə siyasəti Afrika ölkələrinə yalnız bədbəxtçilik gətirib. Ona görə də getdikcə Afrika ölkələri ilə Fransa arasında əlaqələr zəifləyir. Çünki Afrika ölkələri Fransaya etibar etmir. Məhz bu səbəbdən Makronun səfər etdiyi ölkələrdə etiraz aksiyaları keçirildi. Çünki bu, həmin Fransadır ki, yaxın tarixdə soyqırımla məşğul olub. Söhbət 1994-cü ildə Ruandada törədilən soyqırımdan gedir. Çünki həmin soyqırımın törədilməsində Fransa biləvasitə iştirak edib. Bunun əsas müəlliflərindən biridir. Hətta Konqo prezidenti mətbuat konfransında bunu açıq dilə gətirdi. Qeyd etdi ki, növbəti bənzər soyqırımın baş verə biləcəyindən ehtiyat edirlər. Bunu bütün dünya gördü. Bir daha bəlli oldu ki, Fransa biabırçı müstəmləkə keçmişinə sahibdir”.
Vidadi ORDAHALLI
