ABŞ hökuməti şirkətləri Rusiya qoşunlarının Ukraynaya daxil olmasından sonra Ukraynaya tətbiq edilən Rusiya ilə əlaqəli sanksiyaları izləməyə çağırıb və xəbərdarlıq edib ki, bunu etməmək potensial təqib və ya icra tədbirləri ilə nəticələnə bilər.
ABŞ Ədliyyə, Ticarət və Xəzinədarlıq nazirliklərinin birgə bildirişində deyilir ki, müəssisələr Rusiyaya qarşı məhdudiyyətlərdən və sanksiyalardan yan keçmək üçün istifadə olunan taktikalardan xəbərdar olmalıdırlar. Burada diqqəti çəkən məqam odur ki, ABŞ hökuməti Ermənistanı anti-Rusiya sanksiyalarından yan keçmək üçün “ötürmə məntəqəsi” kimi qeyd edib. Bildirilib ki, Çin, Ermənistan kimi ölkələr ABŞ hökuməti tərəfindən məhdudlaşdırılan malların qeyri-qanuni olaraq Rusiya və ya Belarusa yönləndirilməsi üçün “ötürmə məntəqələri” kimi istifadə edilir: “Bütün növ müəssisələr bu tələblərin ciddi şəkildə yerinə yetirilməsini həyata keçirməklə məsuliyyətlə hərəkət etməlidir”.
Belə görünür ki, Ermənistan məlum sanksiyalardan yayınaraq, bundan öz iqtisadi maraqları üçün istifadə edir və ABŞ da bunun fərqindədir.
“Ermənistan ABŞ sanksiyalarından yayınaraq bundan öz maraqları üçün istifadə edir”
Məsələyə münasibət bildirən millət vəkili Vüqar Bayramovun fikrincə, bütün bu xəbərdarlıqlar təsadüfi deyil: “Həqiqətən də Ermənistan ABŞ sanksiyalarından yayınaraq bundan öz maraqları üçün istifadə edir. Bunu konkret statistik rəqəmlər də sübut edir. 2022-ci ildə xarici ticarət dövriyyəsi ilə bağlı rəqəmlər göstərir ki, Ermənistan əslində sanksiyalardan yayınır. Sözügedən prosesdə hansısa bir formada iştirak edir. Çünki həm Avropa İttifaqı, həm də digər aparıcı ölkələrlə Ermənistanın idxal və ixracında kəskin artım var. Aydın məsələdir ki, Ermənistan kimi ölkə qısa müddətdə bu qədər məhsul istehsal etmək potensialına sahib deyil. Çünki zəif iqtisadiyyata malik ölkədir. Bununla yanaşı, Ermənistan bir belə məhsulu istehlak etmək potensialına malik deyil. Həm əhalinin sayı, həm də alıcılıq qabiliyyəti həmin məhsulları istehlak etmək gücündə deyil. Bu isə sübut edir ki, Ermənistan sanksiyalardan yayınaraq idxal olunan məhsulları Rusiyaya ötürür. Bu gün Ermənistanda çoxsaylı Rusiya şirkəti fəaliyyət göstərir. Bu o demək deyil ki, Ermənistan iqtisadi baxımdan cazibədar ölkədir. Təbii ki, yox. Söhbət ondan gedir ki, Rusiya şirkətləri sanksiyalardan yayınmaq üçün Ermənistandan bir vasitə kimi istifadə edirlər. O baxımdan hesab edirəm ki, Qərb bu kimi məsələlərə daha çox diqqət ayırmalıdır. Bir sıra hallarda Ermənistanın iqtisadi sanksiyalardan yayınmasını görməzdən gəlirlər. Hesab edirəm ki, buna son qoyulmalıdır. Ermənistanın bu fəaliyyəti daha ciddi araşdırılmalıdır. Ən nəhayət, sanksiyalardan yayınma davam edərsə, bu, Birləşmiş Ştatlar-Ermənistan münasibətlərinin pisləşməsinə təsirsiz ötüşməyəcək. Ona görə ki, bu, Qərbin Rusiyaya yönəlik sanksiyalarına qarşı getmək deməkdir”.
Vidadi ORDAHALLI
