Özünü Xankəndidəki separatçı rejimin rəhbəri adlandıran Araik Arutyunyan "təhlükəsizlik şurasının" iclasında deyib ki, Azərbaycan rəsmisi ilə görüşdə müzakirəyə 4 məsələ çıxarılıb: Laçın dəhlizinin tam açılması, Ermənistandan Qarabağa elektrik enerjisi nəqlinin bərpası, fasiləsiz qaz təminatı və “Dəmirli” və “Qızılbulaq” mədənlərində fəaliyyətin bərpası:
“İkinci görüşün gedişatında Azərbaycan nümayəndələri “inteqrasiya” sözündən istifadə edərək, siyasi məsələləri müzakirə etmək istəyiblər. Ancaq Şahramanyan deyib ki, o, bu məsələni müzakirə etmək səlahiyyətinə malik deyil və bugünkü görüşün məqsədi də ayrıdır. Bundan sonra Azərbaycan öz kanalları vasitəsilə mənə çatdırdı ki, ya biz inteqrasiya siyasətini qəbul edirik, ya da problemləriniz həll olunmayacaq, əksinə, daha sərt və kəskin addımlar atılacaq”.
O deyib ki, biz bu tələbi qəbul etmədik və qəbul etməyəcəyik, özünüidarəetmədən də heç vaxt vaz keçməyəcəyik.
İnteqrasiyanı qəbul etməyən bu toplumla gələcəkdə danışıq aparmağa dəyərmi?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Qarabağda fəaliyyət göstərən separatçı rejimin hər hansı üzvünün, xüsusilə də özünə və ətrafına qondarma vəzifələr uydurmuş terrorçu Araik Arutyunyanın səsləndirdiyi bəyanatlar Azərbaycan dövləti tərəfindən ümumiyyətlə qəbul edilmir: “Həmin separatçıların məqsədi yenə də bölgədə sülhə və təhlükəsizliyə təhdid yaratmaq, əsassız bəhanələr gətirməklə dünya ictimaiyyətini çaşdırmaqdır. Bu bir reallıqdır ki, Azərbaycan Laçın yolunu bağlamayıb, yol açıqdır. Yolun kənarında sadəcə etiraz aksiyaları keçirilir. Son günlər baş verən hərbi təxribatlar bir daha göstərir ki, Azərbaycan ictimaiyyətinin nümayəndələri Laçın yolunda etiraz aksiyası keçirməkdə tamamilə haqqlıdır. Ötən ilin dekabr ayından Qarabağda fəaliyyət göstərən qanunsuz erməni silahlı dəstələri Laçın yolundan istifadə etməklə hərbi cianyətlər törədə bilmirlər. İş o yerə çatıb ki, Ermənistan Xankəndinə gizli torpaq yolarla silah-sursat, minalar daşımağa cəhd edir. Azərbaycan tərəfi də haqqlı olaraq öz suveren hüquqlarından istifadə edərək bu cinayətin qarşısını qətiyyətlə alır. Bütün dünya görürü ki, Ermənistan və Qarabağdakı terrorçu dəstələr bölgədə sülh istəmir. Onların məqsədi yeni münaqişə ocağı yaratmaq, vəziyyəti gərginləşdirməkdən ibarətdir. Bu da Ermənistan və onun Qarabağdakı törtöküntüləri üçün yaxşı heç nə vəd etmir. Azərbaycan dövlətinin səbrinin tükənməz olduğunu, gücünü və qüdrətini Ermənistan 44 günlük Vətən müharibəsi zamanı gördü. Görünür, bu acı nəticələr onlar üçün ya yetərli dərs olmayıb, ya da birdəfəlik məhv olmaq istəyirlər. O ki qaldı Arayik Arutyunyan və havadarlarının Qarabağ ermənilərinin Azərbaycana inteqrasiya etməsinə qarşı çıxmasına, bu da sülh prosesinə yönəlmiş növbəti təxribatdır. Arayik unutmasın ki, Xankəndi və ətraf ərazilərdə məskunlaşan etnik ermənilər Azərbaycan vətəndaşlarıdır. Onların hüquqları, sosial təminatları, həyat şəraitinə Azərbaycan dövləti təminat verir. Əlbəttə ki, erməni xalqının, dəqiq desək, separatçı ermənilərin Azərbaycan xalqına bəslədiyi uzun illərin düşmənçilik hissi var. Bu həssas məqamlar tədricən aradan qaldırılmalı, Qarabağ bölgəsində yaşayan etnik ermənilər Azərbaycan cəmiyyətinə inteqrasiya olunmalıdır. Bunun ikinci bir yolu yoxdur. Erməni millətindən olan Azərbaycan vətəndaşları ya dövlətimizin qanunları altında yaşamalı, bunu qəbul etməyənlər isə biryolluq rədd olub ərazilərimizi tərk etməlidir. Arayik kimi terrorçulara isə ümumiyyətlə torpaqlarımızda yer yoxdur. Arutyunyanın əli minlərlə günahsız azərbaycanlının qanına batıb və o həbs edilərək ən sərt formada cəzalanmalıdır”.
Məhəmmədəli QƏRİBLİ
