Rusiya Müdafiə Nazirliyi Xankəndi- Xəlfəli-Turşsu yolunda baş vermiş silahlı insidentlə bağlı məlumat açıqlayıb. Qurumun yaydığı bülletendə bildirilir ki, güya hücum bizim tərəfdən olub və nəticədə “Artsax”-ın “polis”ləri öldürülüb. Rusiya MN-nin açıqlaması açıq şəkildə ermənilərin marağına xidmət edir.
Hərbi ekspert Ədalət Verdiyev “Bakı-Xəbər”ə açıqlamasında bildirdi ki, Rusiya yenə də öz qərəzli mövqeyinə sadiqlik nümayiş etdirir: “Rusiya Müdafiə Nazirliyi prosesin bsşlanğıcından indiyə qədər kifayət qədər yanlış bəyanatlar verib. Bununla da, Qarabağdakı erməni separatizmini dəstəklədiyini ortaya qoyub. Təəssüf ki, həmin proses bu gün də davam etməkdədir. Baş verən son hadisəyə isə Azərbaycan Ordusunun hərbçilərinin tələblərinə cavab verməyən erməni separatçılarına məxsus maşında silah daşınması səbəb olub. Rusiya MN əsl səbəbdən yox, uydurma fərziyələrdən danışır. Bir daha sübut olunur ki, bu gün Qarabağdakı silahlı ermənilərin orada qalmasının bir nömrəli zəmanətçisi məhz Rusiyadır. Onlar ərazidən qovulduğu gün bir nəfər də olsun erməni silahlısı həmin ərazidə qalmayacaq. Başqa sözlə desək, erməni silahlılarının Qarabağdan çıxarılmasının ən rahat yolu Rusiya sülhməramlılarının regiondan çıxarılmasıdır. Yaxud da Azərbaycan Ordusunun təmizləmə əməliyyatlarına başlamasıdır. Bunun başqa cür həlli yolunu mən görmürəm”.
Qeyd edək ki, Azərbaycan Müdafiə Nazirliyi Rusiya Müdafiə Nazirliyinin Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletenə münasibət bildirib.
Müdafiə Nazirliyi qeyd edir ki, Rusiya MN faktları təhrif edib və həqiqəti əks etdirməyən məlumat yayıb:
“Silah-sursatla tam təchiz olunmuş bu hərbi qulluqçuların “pasport və viza” xidməti həyata keçirən polis əməkdaşları kimi təqdim edilməsi riyakarlıqdan başqa bir şey deyildir.
İnsident nəticəsində yaralanan hərbi qulluqçularımıza Rusiya sülhməramlı kontingentinin nümayəndələri tərəfindən ilkin tibbi yardımın göstərilməsi və təxliyə edilməsi barədə yayılan məlumat da həqiqəti əks etdirmir. Şəhidlərimizin və yaralı hərbçimizin ərazidən təxliyəsi hərbi qulluqçularımız tərəfindən həyata keçirilib”.
Azərbaycan haqlı olaraq bu kimi hərbi təxribatların qarşısını almaq məqsədilə üçtərəfli Bəyanatın icrasının təmin edilməsini, Ermənistandan qanunsuz silah və sursatın, şəxsi heyətin və minaların daşınmasına son qoyulmasını, Azərbaycan ərazilərindən erməni silahlı qüvvələrini dərhal çıxarmağı tələb edir.
Bu əməllər Azərbaycanla Ermənistan arasında sərhəd nəzarət-buraxılış rejiminin tətbiq edilməsinin labüdlüyünü bir daha sübut edir. Azərbaycan Prezidenti Münhen Təhlükəsizlik Konfransında məhz haqlı olaraq qeyd etdi ki, Laçın-Xankəndi yolunda nəzarət-buraxılış məntəqələri yaradılmalıdır. Bu çox haqlı tələbdir. Rusiya xarici işlər naziri Sergey Lavrov bu yaxınlarda Bakıya səfərində bunun üçtərəfli bəyanatda nəzərdə tutulmadığını iddia etdi. Amma onun özündən soruşmaq lazımdır ki, onlar həmin bəyanatla üzərinə düşən vəzifələri niyə icra etməyib? Çünki bəyanatda qeyd edilib ki, Azərbaycan ərazisində olan erməni silahlıları tamamilə çıxarılmalıdır. Sual olunur, rus sülhməramlıları niyə bunu təmin etməyib? Eyni zamanda Rusiya tərəfi də bilməlidir ki, o yolda nəzarət-buraxılış məntəqəsinin yaradılması nəzərdə tutulmayıbsa, qadağan da deyil. Bura Azərbaycan ərazisidir. Azərbaycan da bu yolda nəzarət-buraxılış məntəqəsi yarada bilər. Bunun heç kəsə də aidiyyəti yoxdur. Sülhməramlılar sadəcə olaraq təhlükəsizliyə baxa bilər. Hərçənd, reallıqda biz görürük ki, rus sülhməramlıları bu funksiyanı da uğurla icra etmir.
Məhəmmədəli QƏRİBLİ
