İran bu əclaflığı da etdi. Düzdür, son iki ildə İran tərəfi elə riyakar addımlar atır ki, molla rejiminin siyasətindən təəccüblənmirsən. Ancaq bəzən ermənilərə yarınmaq üçün elə addımlar atırlar ki, indiyə qədər müqəddəs hesab etdikləri “dəyərləri” də tapdalayırlar.
Məsələ ondadır ki, İranın sosial rifah naziri Seyid Sultan Murtuzavi Ermənistana səfər edib. O, erməni həmkarı Narek Mkrtçyanla görüş zamanı deyib ki, İran 2020-ci ildə Qarabağda müharibə zamanı yaralanaraq əlil olmuş erməni hərbçilərinə “reabilitasya xidməti göstərməyə və bu sahədə qabaqcıl təcrübəsini bölüşməyə hazırdır”. Halbuki, Murtuzavinin Mkrtçyanla görüş zamanı dediyi sözlər İranın ali dini liderinin iki il əvvəl verdiyi “fətvanı” tam təkzib edir. Çünki İran ali dini lideri Əli Xamneyinin Qarabağın müsəlmanların torpağı olduğunu, bu torpaqların azad edilməsi uğrunda həlak olanların isə şəhid olduğunu “müəyyənləşdirən” fətvası var. Bir tərəfdən ali dini lider Qarabağın müsəlman torpağı olduğunu deyir, o biri tərəfdən onun naziri əsgərlərimizi şəhid edənlərə reblitasiya təklifi edir.
“Bu cür düşmən mövqedən çıxış edən İrandan Azərbaycana qarşı nə desən gözləmək olar”
Məsələyə münasibət bildirən AMİP funksioneri Əli Orucovun fikrincə, Tehran rejiminin belə addımlarından əsla təəccüblənməyə dəyməz: “Ən azından ona görə ki, müstəqillikdən üzübəri İrandakı molla rejiminin işğalçı Ermənistanı necə himayə etdiyini hamımız yaxşı bilirik. O vaxt Rusiyanın bilavasitə siyasi-hərbi dəstəyi ilə Azərbaycan əraziləri işğal olundusa, İranın da dəstəyi bir başqa cür oldu. O zaman İranın logistik dəstəyi, Ermənistana ərzaq, yanacaq və bəzi hallarda silah yardımı işğalçı tərəfin uğur qazanmasında mühüm rol oynadı. Düzdür, o vaxt da hazırkı ali dini lider boğazdan yuxarı bəyan edirdi ki, Qarabağ müsəlman ərazisidir. Ancaq indi olduğu kimi, o vaxt da dini liderin dedikləri saxta idi. Çünki İranın gözü qarşısında Birinci Qarabağ müharibəsi zamanı şiə azərbaycanlılar qanına qəltan edildi, yurdlarından qovuldular, yaşayış məntəqələri yandırıldı. O zaman İran Ermənistana yönəlik hansısa addımlar atmadı. Tam əksinə, Ermənistanı blokadadan çıxarmaq üçün bütün imkanlarını səfərbər etdi. İkinci Qarabağ müharibəsi zamanı Azərbaycan Ordusunun sürətlə irəliləməsini önləmək üçün İran Xudafərin körpüsündə bizə mane oldu. Nəticədə hardasa iki gün yubanma oldu. Halbuki, İran mane olmasaydı, ordumuz daha tez Zəngilana daxil olardı və düşmən ərazilərimizi minalamağa fürsət tapmazdı. Yəni bu cür düşmən mövqedən çıxış edən İrandan Azərbaycana qarşı nə desən gözləmək olar. Ona görə də Xamneyinin Qarabağla bağlı fətvası onun özü kimi saxtadır. O üzdən, İran rəsmilərinin Ermənistana yardımla bağlı aşırı canfəşanlığı gözlənilən idi. Bu, həm də fars şovinizmin göstəricisidir”.
Vidadi ORDAHALLI
