Ermənipərəstliyi ilə xristian Fransanı çoxdan geridə qoyan Tehran rejimi mütəmadi olaraq “erməni tarixini” təbliğ etməklə məşğuldur. Bu ölkədə ermənilərin yaratdığı saysız təşkilatlar var ki, onların da əsas vəzifəsi antitürk siyasəti aparmaqdır. Təsəvvür edin ki, bu gün molla rejimi onların ayaqlanması, fəaliyyətlərini genişləndirməsi üçün hər cür şərait yaradır.
Martın 3-də Tehranda “Hay data todey” (“Erməninin bugünkü tarixi”) adı altında konfrans fəaliyyətə başlayıb. Bu barədə qəzetimizin ötən sayına müsahibəsində Orta Doğu Araşdırma Mərkəzinin rəhbəri Sədrəddin Soltan bildirib. S.Soltan qeyd edirdi ki, konfrans çərçivəsində “Daşnakstyun” partiyasının 132 (133) illiyinə həsr olunan tədbirlərin keçirilməsi nəzərdə tutulub.
Onu da qeyd edək ki, nə İran, nə də Ermənistan tərəfi bu informasiyanı geniş tirajlayıb. Amma faktiki olaraq, reklamı arxa plana keçirib “işlərini görüblər”.
Ümumiyyətlə, İran adlanan bir rejimin Daşnaksütyunun 132 illiyinin qeyd edilməsinə şərait yaratması hansı anlama gəlir? Daşnaklara niyə bu qədər meydan verirlər?
Ekspertlər hesab edir ki, bu gün İranda “Daşnaksütun”a rejim səviyyəsində müsbət münasibət var və bu səbəbdən də onlar terror qurumunun ildönümünü qeyd edirlər.
“Bu günlərdə Tehranda çox yoğun və çox kəsin anti-Azərbaycan və antitürk fəaliyyət davam edir”
Azərbaycan Milli Dirəniş Təşkilatının sözçüsü, hazırda Türkiyədə yaşayan Güney azərbaycanlı ictimai-siyasi fəal Məcid Cavadi Araz “Bakı-Xəbər”ə şərhində bildirdi ki, keçdiyimiz günlərdə Tehranda ermənilərlə bağlı iki tədbir olub. “Birinci tədbirdə, sizin də dediyiniz kimi, “Daşnaksütun” partiyasının İran quruluşunun 132-ci ili qeyd edilib. Biz bu barədə “Daşnaksütun”un farsca yayım orqanı olan “Hoor” və “Alik” media quruluşlarından xəbər ala bilmişik. Təbii, onlar erməni dilində yayırlar ki, fars dilini bilənlərin çoxunun bundan xəbəri olmasın. Hər halda, günümüzün texnoloji vasitələrinin köməkliyi ilə istənilən dildən xəbərləri çevirib oxumaq olur. İkincisi də, keçdiyimiz gündən bir gün öncə Tehranda İran və Güney Qafqaz geosiyasəti və İran-Ermənistan ilşkiləri adlı bir forum keçirilib. Bu forum da yenə “Hoor” media orqanının öncüllüyü ilə baş tutub. Bu, “Daşnaksütun”nun media qoludur. Bu medianın təşkil etdiyi tədbirdə çoxlu sayda fars, İran millətçiləri, milliyyətçi qurumlar, tanınmış anti-Azərbaycan, antitürk simalar iştirak edib, çıxış ediblər. Ümumiyyətlə, bu günlərdə Tehranda çox yoğun və çox kəsin anti-Azərbaycan və antitürk fəaliyyət davam edir.
Biz ikinci tədbirdən bəhs edən broşürun sloqanlarından da görə bilirik ki, orada nələrdən bəhs edilir. Orada “İki mədəniyyət, bir millət” sloqanından istifadə olunub. Yəni bunlar Azərbaycan və Türkiyənin “Bir millət iki dövlət” sloqanının və strateji birliyinin qarşısında “İki mədəniyyət bir millət” sloqanını ortaya qoyurlar və Azərbaycan-Türkiyə strateji müttəfiqliyinin qarşısına İran-Ermənistan strateji müttəfiqliyini qoymağa çalışırlar”.
M.C.Arazın sözlərinə görə, bununla İrana hakim olan fars millətçiliyi hegemoniyasının gələcəyini öz aləmlərində qarantiyaya almağa çalışırlar. Müsahibimizin sözlərinə görə, nəzərə almalıdırlar ki, İranın içində bir Güney Azərbaycan faktoru var, bu ölkə əhalisinin 100-də 40-ı türkdür, orada milyonlarla türk yaşayır: “Tehran əhalisinin də elə yarısı türkdür. Bunlar bu siyasətin nəticəsini enində-sonunda meydanda görəcəklər. İndiyə qədər də bu düşmənçiliklərinin nəticəsini təbii ki, görüblər. İndi onların girdikləri stress, qorxu, vahimə də anti-Azərbaycan, antitürk siyasətlərinin bir nəticəsidir ki, bu gedişlə başlarına nə gələcəyi məlumdur”.
İradə SARIYEVA
