“Ermənilərin Uti vilayətinin adını saxtalaşdıraraq onu “Etiuni” adlandırması yolverilməzdir, bu böyük tarixi saxtalaşdırmadır”
Ermənilər gündə bir saxtakarlıq etməsələr dünya dağılar. Bildiyimiz kimi, yalnız erməni alimləri deyil, sadə insanlar da bu saxtalaşdırma işinin tərkib hissəsinə çevrilib. Erməni mediası iddia edir ki, guya Göyçə gölü yaxınlığında yerləşən “Lçaşen” kəndi “kral qəbirləri üstə salınıb”.
Bu barədə “Panorama.am-a açıqlama verən Satenik Badeyan vaxtilə aparılan arxeoloji qazıntılar zamanı buradan “böyük tarixi, mədəni irs, qiymətli eksponatlar” çıxdığını iddia edib. Guya 1950-ci ildə Göyçə gölünün suyunun azalması nəticəsində arxeoloqlar məzarlar, tarixdən əvvəlki yaşayış məskənləri, qalalar və ayrı-ayrı abidələr aşkar ediblər.
Badeyan deyib ki, abidələrin “Urartu dövrünə” aid olduğunu düşünüblər, sonra arxeologiya institutuna gediblər orada onlara “Lçaşen”in tarixinin Urartudan daha qədim olduğunu” deyiblər.
O iddia edib ki, bu kəndin yaşı 5000 ildən artıqdır və guya bu kənd Etiuni çarlığının paytaxtı olub. Ermənilər Etiunini də yeni "ixtira" ediblər. Əlbəttə, söz yox ki, oradan nəsə tapılıbsa belə, indiyə qədər nə aşkarlanıbsa hamısı Azərbaycan irsidir, bunun ermənilərə hec aidiyyəti yoxdur.
Onu da vurğulayaq ki, ermənilərin “Lçaşen” adlandırdıqları kənd Göyçə gölünün sahilində yerləşən Ördəkli kəndidir ki, bu kənd haqda “İrəvan əyalətinin icmal dəftəri”ndə qeyd edilib. Ermənistan SSR Ali Sovetinin Rəyasət Heyətinin 26. IV. 1946-cı il fərmanı ilə kəndin adı dəyişdirilib “Lçaşen” (Kölkənd) qoyulub.
Məlumdur ki, ermənilər uzun illərdir “qədim paytaxt” ovuna çıxıblar. Dünənə kimi “Erebuni” şəhərinin 2750 yaşa malik olduğunu iddia edirdilər. İrəvan şəhərinin adını, tarixi saxtalaşdırmaqla məşğul idilər. İndi isə Etiuni şəhərindən danışırlar, bunun isə növbəti utopiya olduğu məlumdur.
- “Əgər oradan nəsə tapılıbsa belə, hamısı Azərbaycan irsidir, bunun ermənilərə hec aidiyyəti yoxdur”
AMEA-nın Qafqazşünaslıq İnstitutunun Ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, ermənilərin yazdıqları cəfəngiyyatların sayı bilinmir. O qeyd etdi ki, həm dövlət məmurları, həm alimləri, həm də sadə vətəndaşları yalan yaymaqla məşğul olur, bu isə ermənilərin heç bir ciddi məqsədə xidmət etmədiyini deməyə əsas verir. “Uydurmaları həddən artıq çoxdur. İrəli sürülən bütün arqumentlərin, mülahizələrin məntiqi olmalıdır. Amma bunu ermənilərdə hər zaman görmüşük. Biz sizinlə dəfələrlə erməni saxtakarlığı ilə bağlı danışmışıq. Onlar xristianlıq dinindən tutmuş abidələrə qədər hər şeyi saxtalaşdırıblar. Ermənilərin yaratdığı dövlət yoxdur. Amma bu gün onlar olmayan yerdən özlərinə “Vətən tarixi” düzəldirlər. O ki qaldı Göyçə gölü yaxınlığındakı kəndə, o kəndin tarixi qədim də olsa, yeni də olsa onun ermənilərə heç bir aidiyyəti yoxdur. Orada nə tarixi abidə, maddi-mədəniyyət nümunəsi tapılarsa, bunlar, sözsüz ki, ermənilərdən əvvəl o ərazilərdə yaşamış Azərbaycan türklərinə aiddir. Çünki həm İrəvanda, həm onun ətrafında, bütövlükdə Qərbi Azərbaycanda mövcud olan qədim maddi-mədəniyyət nümunələrinin hamısı türklərə, onların əcdadlarına məxsusdur. Ona görə də ermənilər nə tapılrlar-tapsınlar, onun mahiyyəti türklərlə bağlıdır. O ki, qaldı Urartu ilə bağlı indiyə qədər ortaya atdıqları iddialara, Urartunun paytaxtı Van şəhəri idi, qədim adı Tuşbadır. O, Şimal-Şərqi Anadoludadır və o əraziləri əhatə edirdi. Düzdür, o zaman Manna, Midiya, Urartu, İskit çarlığı dönəmində bu dövlətlər arasında müharibələr olub, bir-birinin ərazilərini işğal ediblər. Bu proseslərin heç birinin ermənilərlə bağlılığı yoxdur. Azərbaycan və Türkiyə tarixçilərinin keçirdikləri konfranslar, yazdıqları kitablar ermənilərə bir zərbə oldu, onlara çatdırıldı ki, yazdıqlarının heç bir əsası, mənbəyi yoxdur, bu, ermənilərlə bağlı deyil. Urartu yazılarında bir dənə də olsun erməni sözü yoxdur”.
Q.Hacıyev deyir ki, Urartunun ermənilərə aid olmadığı sübut edilib, bundan dərs götürməyiblər. Etiuni şəhərinə gəlincə, Q.Hacıyev dedi ki, tarixdə belə adda şəhər olmayıb, bu da erməni uydurmasıdır. “Tarixdə Uti vilayəti var. Bu barədə Moyisey Kalankatlının kitabında yazılıb. O zaman Albaniyaya aid olan 11 vilayətdən biri Uti idi. Ermənilərin Uti vilayətinin adını saxtalaşdıraraq onu “Etiuni” adlandırması yolverilməzdir, bu böyük tarixi saxtalaşdırmadır. Necə ki, gətirib Ərsaqı “Arsax” etdilər, indi də Utini “Etiuni” edib erməni sözünə oxşadırlar. Bu baxımdan, ermənilərin hansısa “qədim paytaxtdan” danışması cəfəndiyyatdır. Nə Urartunun, nə Utinin, nə də İrəvanın onlara aidiyyəti var. Bir vaxtlar İrəvanı Erebuni kimi qələmə verib ona 2775 illik “yubiley” keçirirdilər, bu saxtakarlıqla kifayətlənməyib, indi də hansısa mifik şəhərdən danışırlar” - deyə Q.Hacıyev bildirdi.
İradə SARIYEVA
.jpg)