Ermənilərin son təxribatları Azərbaycanı bəzi real addımlar atmağa sövq edə bilər. Azərbaycan Xarici İşlər və Müdafiə nazirliklərinin bəyanatları, o cümlədən Ombudsmanın açıqlaması birmənalı şəkildə Laçın yolunda nəzarət-buraxılış məntəqəsinin yaradılması vacibliyindən xəbər verir. Təbiidir ki, ermənilərin buna mane olmaq gücü yoxdur, bəs Rusiya sülhməramlıları buna maneçilik törədə bilərmi?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki,
Azərbaycan Ordusu ilə separatçlar arasında yaşanan son gərginlik Laçın yolunda nəzarət-buraxılış məntəqəsinin qurulmasını daha da zəruri edir: “Düzdür, ekofəalların Laçın-Xankəndi yolunda keçirdiyi aksiya Qarabağdakı separatçıların silahla təchizatına ciddi zərbə vurub. Buna baxmayaraq, qanunsuz silahlı birləşmə üzvləri yenə Qarabağa silah daşımağa cəhdlər göstərirlər. Son hadisə göstərdi ki, onlar silah ehtiyaclarını Laçın yoluna alternativ torpaq yollarla təmin etməyə çalışıblar. Amma Azərbaycan Ordusu onların bu cəhdinin qarşısını alıb.
Silahlıların Azərbaycan ərazisinə Laçın yolu vasitəsilə daxil olduğu faktdır. Çünki həmin ərazidə giriş-çıxışa heç bir nəzarət yoxdur. Bu səbəbdən erməni silahlılar sərhədi maneəsiz keçir və Laçın rayonu ərazisindən dağ yolları ilə Xankəndiyə silah daşımağa cəhd göstərirlər. Ona görə də Azərbaycan Laçın yolunda nəzarət-buraxılış məntəqəsi qurmaqla separatçıların silah təchizatını tam kəsə bilər. Düzdür, Ermənistan və digər maraqlı qüvvələr israrla üçtərəfli bəyanatlarda nəzarət-buraxış məntəqəsi ilə bağlı heç bir bəndin olmadığını deyirlər. Xüsusilə biz Lavrovun Bakı səfəri zamanı da onun dilindən bu məsələyə açıq etirazı eşitdik. Ancaq bilinməlidir ki, Azərbaycanın öz sərhədində nəzarət-buraxılış məntəqəsi qurması ikinci və üçüncü tərəfin imza atdığı bəyanatla tənzimlənmir. Bu məsələlər Azərbaycanın daxili qanunları ilə nizamlanır”.
Ramil Məmmədlinin sözlərinə görə, separatçıların təxribatına verilən cavab göstərdi ki, rəsmi Bakı Laçın yolunda nəzarət-buraxılış məntəqəsinin qurulması barədə məsələni müzakirə etmək fikrində deyil: “Azərbaycan dövləti Laçın yolunda yoxlanış məntəqəsinin qurulması ilə bağlı qəti mövqe nümayiş etdirir. Proseslər göstərir ki, Moskva və İrəvan öhdəliklərini yerinə yetirmədiyi üçün Bakı həm Laçın yolunda nəzarət-buraxılış məntəqəsinin qurulması, həm də erməni silahlıların bölgədən çıxarılması ilə bağlı konkret addımlar atacaq. Bizə bu addımı atmağa heç kim mane ola bilməz”.
Təbiidir ki, təxribatların qarşısının alınması üçün tədbirlər görülməlidir. Postlar qoyulub, lakin bununla yanaşı, həmin ərazilər Azərbaycanındır və orada daim post-patrul xidməti həyata keçirilməlidir. Həm sərhəd-keçid məntəqəsi, həm də gömrük postu qoyulmalıdır ki, oradan keçənlərə bilavasitə nəzarət olunsun. Düzdür, gənclərimiz artıq ikinci aydır ki, qəhrəmancasına Xankəndi yolunda keşik çəkirlər, dinc aksiya keçirirlər. Azərbaycanın təbii sərvətlərinin talanmasının, Laçın yolundan keçməklə Xankəndidəki separatçılara silahların daşınmasının və digər məsələlərin qarşısını alırlar. Amma bunu daim həyata keçirən məhz gömrük və sərhəd postu olmalıdır.
Məhəmmədəli QƏRİBLİ
