Bir neçə gün əvvəl vəfat edən tanınmış ilahiyyatçı, Məşədi Dadaş Məscidinin imamı Hacı Şahin Həsənlinin İranın Qum şəhərində yas mərasimi keçirilib. Bu yas mərasiminin videoyazısı yutubda yerləşdirilib.
Yas mərasimində müsahibə verən Ocaq Nejat (Seyid Əli Əkbər Ocaq Nejat) Hacı Şahindən danışıb, bildirib ki, mərhum İranda təhsil almasa da, İrandan Azərbaycana gedən din adamlarından öyrənib: “...Düzdür ki, o, Qum, Nəcəf, belə hövzələrdə olmayıb. Amma həm Bakıda instititlarda ilahiyyat sahələrində dərs oxuyub, həm də İrandan Azərbaycana gedən ruhanilərdən imkan daxilində təhsil alıb, dərs oxuyub...”
Hacı Şahinin Qumda yas məclisinin keçirilməsi geniş müzakirəyə səbəb olmaqla yanaşı, həm də ciddi suallar yaradıb. Bildirək ki, ilahiyyatçının zaman-zaman İrana bağlı olmasına dair iddialar yayılıb. Hacı Şahinin Qumda yas məclisinin keçirilməsinin anlamı nədir? Hansı mesajlar ötürülə bilər? Niyə onu məhz İrana bağlamağa çalışırlar? Molla rejimi bununla nə demək istyəyib?
“İranın bəzi dairələri və bu işdə Ocaq Nejatı da ortaya atıblar...”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə “Tehran rejimi Hacı Şahin Həsənlinin vəfatından mümkün qədər istifadə etmək istəyir. Biz müəyyən mənada bu kimi cəhdlərə Hacı Şahinin dəfnində də rast gəldik. Onlar müəyyən şüarlar səsləndirməklə, əslində məhz məsələni başqa yerə çəkmək istəyirlər. Əlbəttə, Azərbaycan xalqı, Azərbaycan dövləti, bütövlükdə cəmiyyətimiz bu məsələdə olduqca diqqətli və həssas olmalıdır. Biz artıq onu da müşahidə edirik ki, İranın bəzi dairələri və bu işdə Ocaq Nejatı da ortaya atıblar”-deyə bildirdi.
F.Ələkbərlinin sözlərinə görə, məqsəd məsələni başqa yönlərə çəkməkdir. Müsahibimiz qeyd etdi ki, molla rejimi şiə inanclı insanları xalqa, dövlətə qarçı qaldırmaq istyəyir. “Hacı Şahinin Qumda yas mərasiminin keçirilməsi də, sonra təbliğatının aparılması da açıq-aşkar şəkildə molla rejiminin Azərbaycana, Azərbaycan dövlətinə qarşı məkrli yol tutduğunu ortaya qoyur. Bir məsələni də dəqiləşdirmək lazımdır: Azərbaycanın Güneyində və Quzeyində insanlarımızın xeyli hissəsinin şiə məzhəbli olması anlaşılandır, bu yeni deyil, əsrlərdən gələn məsələdir. Əvvəllər də bundan Azərbaycan türklərinin əleyhinə olanlar istifadə ediblər, indi də edirlər”-deyə bildirən F.Ələkbərli qeyd etdi ki, biz molla-fars şovinist rejiminin dinimizi, şiə təriqətini təhrif etməsinə qarşı ciddi addımlar atmalıyıq. “Biz daha çox şiəliyin Azərbaycan formasını təbliğ etməliyik. Çünki burada digər hallar üçün istifadə yoxdur. Amma fars-molla rejimi və onların arxasında duranlar şiəlikdən siyasi məqsəd olaraq istifadə edirlər. Onların imamlara, şiəliyə heç bir sevgiləri yoxdur, “sevgiləri” isə fars dövlətini qoruyib saxlamaqdır. Amma Azərbaycanın Güneyində və Quzeyindəki Azərbaycan türklərinin sevgisi məhz ən çox Peyğəmbərə, onun əhli-beytinə, övladlarına olan münasibətdən irəli gəlir. Düşünürəm ki, Hacı Şahin də daha çox Azərbaycan türklərinin ruhuna uyğun olaraq şiəlik məzhəbinə, imamlara, əhli-beytə olan sevgisini ifadə edirdi. Bunu da molla rejimi çox yaxşı bilirdi. Biz dəfələrlə gördük ki, Hacı Şahin bir çox hallarda təmsil etdiyi məscidin imamı kimi bir çox təxribatlara qarşı səsini qaldırıb. 44 günlük Vətən müharibəsində də, Azərbaycanın və bəzi xarici ölkə səfirliklərinə qarşı təxribatlar zamanı Məşədi Dadaş Məscidində dini bayraqla yanaşı Azərbaycan bayrağı da qaldırıldı...Çox təəssüf ki, molla rejimi bu məsələdə təxribatla məşğul olur, şiə məzhəbli insanların düşüncəsində ziddiyyətlər yaratmağa başlayır. Biz şiəliyi fars-molla rejiminin əlindən çıxarmalı və mahiyyətindən uzaqlaşdırmalıyıq. Azərbaycan türklərinin ruhuna uyğun şiəliyi tanıtmalıyıq. Bu çox ciddi məsələdir. Hacı Şahin kimi insanlar da məhz buna çalışırdı, buna meylli idi. Bilirsiz ki, Hacı Şahin təhsilini Qumda almayıb. Molla rejimi Hacı Şahinə Qumda yas mərasimi keçirməklə onu İrana bağlamaq istəyir. Bununla demək istəyir ki, mərhum molla rejiminə bağlı olub. Hesab edirəm ki, zamanla İranın təxribatları da, bütün məsələlər də bir-bir açılacaq. Lakin çoxluğa görə, tanınmış ilahiyyatçının şiəliyə, əhli-beytə münasibəti tamamilə Azərbaycan türklərinin münasibəti kimi idi və humanist mahiyyət daşıyırdı”-deyə bildirən F.Ələkbərli hesab edir ki, Azərbaycan din xadimini İrana bağlamaq istəyənlər çoxdur. O qeyd etdi ki, İran da öz iyrənc təxribatı ilə bizə zərər vurmaq istəyir. Onun fikrincə, yeni yetişən ilahiyytaçılar, imamlar, axundlar Azərbaycan ruhuna uyğun şəkildə islam dininə və şiəliyə baxacaq. Bu yöndə davam etməli olduğumuzu deyən F.Ələkbərli qeyd edir ki, Azərbaycan türkü kimi məsələyə baxmaqla təxribatların qarşısını ala bilərik.
Əli TURABOV
