Almaniyanın Kansleri Olaf Şolts Ermənistanın Baş naziri Nikol Paşinyanla görüşündən sonra Qarabağla bağlı ziddiyyətli mövqe sərgiləyib.
Şolts qeyd edib ki, Almaniya Ermənistan-Azərbaycan münaqişəsinin Qarabağ sakinlərinin öz müqəddəratını təyinetmə hüququnu nəzərdə tutan dinc həllinə tərəfdarıdır: “Ermənistan-Azərbaycan sərhədində sabitsizlikdən və Dağlıq Qarabağda humanitar vəziyyətin pisləşməsindən narahatıq. Status-kvo davam edə bilməz və xalqın xeyrinə uzunmüddətli həllə ehtiyac var. Ermənistan və Azərbaycanın ərazi bütövlüyü və Dağlıq Qarabağ vətəndaşlarının öz müqəddəratını təyinetmə hüququnu nəzərə alan dinc həll yolu tapılmalıdır. Bu prinsiplər bərabər tətbiq oluna bilər”.
Ərazi bütövlüyü ilə vətəndaşların öz müqəddəratını təyinetmə prinsiplərini axı necə bərabər tətbiq etmək olar? Məgər Şolts bilmir ki, bunlar bir-birinə ziddir?
Məsələyə münasibət bildirən AMİP sədri Arzuxan Əlizadənin “Bakı-Xəbər”ə bildirib ki, Almaniya kanslerinin belə qeyri-müəyyən mövqeyi təəssüf doğurur: “Əvvəla, bu, Almaniyanın Azərbaycanın ərazi bütövlüyünə münasibətdə sərgilədiyi rəsmi mövqeyə ziddir. Çünki Almaniya Azərbaycanın ərazi bütövlüyünü tanıyır. Şoltsun məlum yanaşması bu prinsiplərə ziddir. Ən azından ona görə ki, 44 günlük Vətən müharibəsindən sonra öz müqəddəratını təyinetmə prinsipi ümumiyyətlə gündəlikdən çıxıb. Azərbaycan Qarabağ məsələsini həll edib və orada yaşananlar ölkəmizin daxili işidir. Ona görə ki, 30 ilə yaxın BMT-nin məlum 4 qətnaməsi kağız üzərində qaldı. 1994-cü ilin mayında Azərbaycanla Ermənistan arasında imzalanan atəşkəsdən sonra 26 il danışıqlar aparılsa da, bunun bir nəticəsi olmadı. O zaman Azərbaycan güc yolu ilə ərazi bütövlüyünü təmin etdi. Azərbaycan Birinci Qarabağ müharibəsində məğlub olmağına rəğmən, erməni separatçıların öz müqəddəratını təyinetmə tələblərini qəbul etmədi. Baxmayaraq ki, o vaxt müharibənin nəticələri bizim xeyrimizə deyildi, amma biz təzyiqlərə duruş gətirdik. Vətən müharibəsindən sonra isə tamamilə yeni vəziyyət yaranıb. Bu da ondan ibarətdir ki, hansısa statusdan söhbət belə gedə bilməz. Qarabağdakı etnik ermənilər Azərbaycan vətəndaşıdır. Kim bizim vətəndaşlığımızı qəbul edirsə, Azərbaycan qanunları çərçivəsində ölkədə yaşaya bilər. Qəbul etməyənlərə də yol açıqdır. Şolts bilməlidir ki, ərazi bütövlüyü ilə öz müqəddəratını təyinetmə hüququ ikisi bir yerdə ola bilməz. Bu, separatçılara ümid vermək anlamına gəlir. Görünür erməni tərəfi Almaniya kanslerini yanlış məlumatlandırıblar. Vətən müharibəsindən sonra Azərbaycan leksikonundan “Dağlıq Qarabağ” ifadəsi çıxarılıb. Bu adda nə ərazi, nə də izibati vahid yoxdur. Qarabağ və Şərqi Zəngəzur iqtisadi rayonları var. Bu baxımdan Almaniya rəsmiləri ifadələrində diqqətli olmalıdırlar və Azərbaycanın ərazi bütövlüyünə hörmətlə yanaşmalıdırlar”.
Vidadi ORDAHALLI
