Ermənistan Baş naziri Nikol Paşinyan Almaniyanın Beynəlxalq Münasibətlər Şurasında çıxışı zamanı deyib ki, Azərbaycanla Ermənistan arasında danışıqlar 3 istiqamətdə aparılır.
O, danışıqların əsas istiqamətinin münasibətlərin nizamlanması, nəqliyyat-kommunikasiyalarının, iqtisadi əlaqələrin blokadadan çıxarılması, sərhədlərin delimitasiyası və təhlükəsizlik olduğunu bildirib:
“Ermənistan hakimiyyəti Cənubi Qafqazda stabillik və sülhün bərpası üçün qəti addımlar atır, eləcə də Azərbaycanla danışıqlara konstruktiv cəlb edilib”.
Paşinyan həmçinin Qarabağ məsələsinin Ermənistanla Azərbaycanın normallaşma prosesindən ayrılmasına razılaşdığını, amma bunu Bakı və Qarabağ erməniləri arasında müzakirə mexanizminin formalaşdırılması məntiqi ilə etdiyini deyib.
Əslində, Paşinyan yeni heç nə demir. Çünki, Azərbaycan tərəfi də dəfələrlə vurğulayıb ki, Azərbaycanla Ermənistan arasında aparılan normallaşma prosesinin Qarabağa heç bir aidiyyəti yoxdur. Ermənistan indiyə qədər Qarabağdakı ermənilərlə bağlı danışıqlarda beynəlxalq mexanizmlərin tətbiqindən danışırdı, indi isə Paşinyan yalnız müzakirə mexanizmi ifadəsini işlədir ki, bunu da Azərbaycan edir. Belə qənaətə gəlmək olarmı ki, bu məsələdə də Ermənistan Azərbaycanın mövqeyi ilə tam razılaşıb və beynəlxalq tənzimləmə təklifindən əl çəkib?
Politoloq Elşən Mustafayev “Bakı-Xəbər”ə bildirdi ki, Azərbaycan hər zaman deyirdi ki, Qarabağdakı ermənilərin məsələsi bizim daxili işimizdir və onlarla bağlı müzakirəyə heç Ermənistan da qarışa bilməz: “Prezident də demişdi ki, biz yalnız Qarabağda doğulan, Azərbaycan vətəndaşı sayılan ermənilərlə təmas qura bilərik, kənardan gətirilənlərlə yox. Kənardan gələn Vardanyan idi, o da Bakının tələblərindən sonra yola salındı. Təbiidir ki, rəsmi Bakının bu məsələdəki prinsipial mövqeyi Ermənistanı iddialarından əl çəkməyə vadar etdi. Onlar əvvəl Qarabağdakı ermənilərlə Azərbaycan arasındakı müzakirələrdə beynəlxalq mexanizmlərin tətbiqindın danışırdılar. Azərbaycan vətəndaşımız olan ermənilərlə təmasa başlayıb.
Milli Məclisin deputatı Ramin Məmmədov Azərbaycan Respublikasının Qarabağ bölgəsində yaşayan erməni sakinlər ilə təmaslar üzrə məsul şəxs qismində müəyyən edilib. Martın 1-də Xocalı şəhərində, Azərbaycan ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşüb. Bu, ondan xəbər verir ki, erməni əhalinin Azərbaycana inteqrasiya olunması yolunda irəliləyiş var. Etnik ermənilərlə danışıqların aparılması separatçı rejimin sonunun çatdığından xəbər verir. Gələcəkdə Rusiya sülhməramlıları olmadan bu görüşlərin keçirilməsi mümkündür. Təbii ki, bu məsələ ermənilərin iradəsindən asılıdır. Dövlət tərəfindən hər zaman bəyan edilib ki, Qarabağda yaşayan ermənilər Azərbaycan vətəndaşıdır. Onlar ölkəmizin pasportunu əldə edərək, Azərbaycan ərazisində yaşaya bilər.
Ermənistan bütün dünyaya göstərmək istəyir ki, guya azərbaycanlılarla etnik ermənilər birlikdə yaşaya bilməz. Ancaq bu danışıqlardan sonra müsbət irəliləyiş əldə olunarsa, Ermənistan tərəfinin söylədiklərinin yalan olduğunu hər kəs görəcək. Paşinyanın bu mövqeyi onların bu məsələ ilə bağlı da Azərbaycanla razılaşdığının nümunəsidir”.
Məhəmmədəli QƏRİBLİ
