“Qoşulmama Hərəkatı BMT-dən sonra ikinci ən böyük beynəlxalq təsisat kimi beynəlxalq arenada yeni dünya düzəninin yenidən formalaşmasında fəal iştirak etməlidir”. Bunu Prezident İlham Əliyev Qoşulmama Hərəkatının COVID-19-a qarşı mübarizə üzrə Təmas Qrupunun Bakıda keçirilən Zirvə görüşündə çıxışında bildirib.
Ölkə başçısının sözlərinə görə, yeni dünya düzəni yenidən formalaşmaqdadır: “İndi dünya “Soyuq müharibə”nin sona çatmasından bəri baş verən ən ciddi Şərq-Qərb qarşıdurmasının şahididir ki, onun fəsadları dünyanın qalan hissəsində də hiss olunur. Qoşulmama Hərəkatı BMT-dən sonra ikinci ən böyük beynəlxalq təsisat kimi beynəlxalq arenada daha nəzərəçarpan və səmərəli rol oynamalı, yeni dünya düzəninin yenidən formalaşmasında fəal iştirak etməlidir. Təəssüf ki, bu gün biz neokolonializm meylinin artdığını müşahidə edirik. Tarixi müstəmləkəsizləşdirmə prosesi nəticəsində yaranmış Qoşulmama Hərəkatı bəşəriyyətin bu rüsvayçı səhifəsinin tamamilə aradan qaldırılması istiqamətində səylərini birləşdirməlidir”.
Görünən odur ki, yeni dünya düzəninin yenidən formalaşmasında QH-nin aktiv iştirakına ciddi zərurət var.
“Dünya elə bir vəziyyətə gətirilib ki, BMT Təhlükəsizlik Şurasının üzvləri dünyanı təhdid edən təhlükələrlə üz-üzə qalıb”
Məsələyə münasibət bildirən AMİP-in sədr müavini Afsəddin Nəbiyevin fikrincə, Qoşulmama Hərəkatının yeni düzənin formalaşmasında iştirakı ilə bağlı potensialı var: “Qoşulmama Hərəkatı çox mürəkkəb təhlükəli dövrləri yaşadığımız dünyada beynəlxalq sülhə, sabitliyə töhfələr verə biləcək, böyük bir coğrafiyada yerləşən dövlətləri özündə birləşdirən nümunəvi bir təşkilatdır. Bir sıra dövlətlərin vaxtilə soyuq müharibə dövründə iki siyasi-hərbi qütb arasında qarşıdurmaya cəlb edilməmələri üçün təsis etdiyi Qoşulmama Hərəkatı (QH) hazırda beynəlxalq münasibətlərin tənzimlənməsində iştirak edən mühüm çoxtərəfli mexanizmlərdən birinə çevrilib. Dünyada qurulmaqda olan yeni münasibətlər sistemində Azərbaycanın son illərdə bu Hərəkəta rəhbərlik edərək sağlam təşəbbüsləri dəstəkləməsi dövlətimizin beynəlxalq arenada nüfuzunu daha da artırmaqdadır. İstər əsrin fəlakəti kimi qiymətləndirilən pandemiya, istərsə də planetimiz üçün təhdid yaradan, müharibələr, su çatışmazlığı, iqlim problemləri ilə bağlı Qoşulmama Hərəkatı ən uğurlu təşəbbüsləri dəstəkləməklə planetimizin nizamlı idarə olunması üçün böyük perspektivlər yaradır. Elə dövlət başçısı İlham Əliyevin Qoşulmama Hərəkatının BMT-də yer alma təşəbbüslərilə çıxış etməsi beynəlxalq və ya məhəlli münaqişələrin həllinə yönəlmiş ən uğurlu təşəbbüslərdən biri kimi qiymətləndirilməlidir. Dünya elə bir vəziyyətə gətirilib ki, BMT Təhlükəsizlik Şurasının üzvləri dünyanı təhdid edən təhlükələrlə üz-üzə qalıb. Məhz bu amillərə görə, dövlətlərin böyük və kiçik olmasından asılı olmayaraq, yeni dünya düzənində bütün parametrlər nəzərə alınmalıdır. Nəhayət, bu dünyanı yaşanılır hala gətirmək üçün bütün dövlətlər bu proseslərdə xoşniyyətli təşəbbüslərlə yer almalıdır”.
Vidadi ORDAHALLI
