Danışıqlardan təcrid olunan, tərəf tutmaqla vasitəçilik missiyasından məhrum olan Fransa indi də Azərbaycana atmaca atmaqla təhdid dilində danışmağa çalışır. Rəsmi Paris öz aləmində belə hesab edir ki, Avroittifaqın aparıcı dövlətlərindən biri olmaqla Fransa guya bununla nəyəsə nail olacaq.
Fransanın xarici işlər naziri Ketrin Kolonna ölkə parlamentində çıxışı zamanı bəyan edib ki, qərar məcburidir və Azərbaycan Beynəlxalq Məhkəmənin qərarına hörmət etməlidir: “Qərar Azərbaycan üçün məcburidir və ona hörmət edilməlidir. Prioritet dəhlizin blokadasının qarşısının alınması və Bakı ilə İrəvan arasında dialoqdur. Avropa İttifaqı və ABŞ-dakı tərəfdaşlarımızla birlikdə faydalı olmağa hazırıq. Azərbaycan beynəlxalq hüquqa hörmət etməli və Beynəlxalq Ədalət Məhkəməsinin tələb etdiyi kimi sərbəst hərəkəti bərpa etməlidir. Laçin dəhlizinin blokadası qəbuledilməzdir və onun açılması prioritetdir”.
Görünən odur ki, Fransa Laçın yolu üzərindən Azərbaycana yönəlik növbəti siyasi oyun qurmağa çalışır.
“Fransa Cənubi Qafqazda möhkəmləmək üçün siyasi oyun oynayır”
Məsələyə münasibət bildirən İrəvan Azadlıq Təşkilatının sədri Təbriz Musayevin fikrincə, Fransa rəsmilərinin nə deməsinin Azərbaycan üçün heç bir əhəmiyyəti yoxdur: “Çünki Fransa həyasızcasına tərəfkeşlik etdiyi üçün və açıq şəkildə Ermənistanın yanında dayandığına görə vasitəçi olmaq şansını itirub. Baxın, Prezident İlham Əliyev Rusiya və ABŞ-ın Cənubi Qafqaz üzrə nümayəndələrini qəbul edir, onlarla müzakirələr aparır, amma Fransanın nümayəndəsi bu siyahıda yoxdur. Yeri gəlmişkən, Fransa bütün vasitələrlə çalışır ki, ATƏT-in Minsk Qrupunu bərpa etsin. Ötən ilin oktyabrında keçirilən dördtərəfli Praqa görüşündən sonra Fransa prezidenti Emmanuel Makron bütün körpüləri yandırdı. O, nümayişkaranə şəkildə telekanallara müsahibə verərək Azərbaycanı ittiham etməyə başladı. Ondan sonra Azərbaycan tərəfi bəyan etdi ki, Fransanın vasitəçiliyi ilə keçirilən danışıqlarda iştirak etməyəcək. Azərbaycan Avropa İttifaqının vasitəçiliyini qəbul edir. Bu həmin Fransadır ki, iyrənc müstəmləkə keçmişinə malikdir. Afrika və Asiya xalqlarını soyqırıma məruz qoyub. Fransa Əlcəzairdə, Ruandada, Vyetnamda kütləvi soyqırımlar törədib və yaxşı olardı ki, bütün bunlara görə tarix qarşısında cavab versin. Laçın yolunda baş verənlər Azərbaycanın daxili işidir. Çünki həm Laçın yolu, həm də Qarabağ Azərbaycanın suveren ərazisidir. Fransa razı olarmı Marsel şəhərinə gedən gəmilər yoxlanılmadan limana daxil olsun? Fransa rəsmiləri hansısa məlumatları yoxlamadan dünyaya car çəkirlər ki, Qarabağda 120 min erməni humanitar blokada içindədir. Məgər Qarabağda 120 min erməni yaşayır? Orada heç 40 min erməni yaşamır. Bu baxımdan hesab edirəm ki, xarici işlər naziri Ketrin Kolonnanın sərsəm fikirlərinin heç bir əsası yoxdur. Bu, rəsmi Parisin növbəti qeyri-ciddiliyidir. Fransa Cənubi Qafqazda möhkəmləmək üçün siyasi oyun oynayır”.
Vidadi ORDAHALLI
