“Əlcəzairdə törədilən cinayətləri nəzərə alsaq, Fransa prezidenti Makronun bugünkü siyasətini də göz önündə saxlasaq, görərik ki, onlar dayanmaq bilmir və onları dayandırmaq lazımdır”. Bunu Trend-ə açıqlamasında Yeni Kaledoniya nümayəndə heyətinin rəhbəri Maykl Forrest deyib.
“Afrikada, Sakit Okean regionunda geopoltik dəyişiklikləri nəzərə alsaq, Fransanın həmin ərazilərdə, eləcə də Kaledoniyadakı müstəmləkəçilik siyasətini nəzərə alsaq, süni şəkildə miqrasiya edərək yerli əhalini azaldırlar. Bu təkcə xalqın məsələsi deyil, eləcə də resurslarımıza Fransanın əl qoyması məsələləri var. Azərbaycanın mövqeyi çox vacibdir. Azərbaycan suverenliyimiz baxımından da bizə vacibdir. Azərbaycanın sədrlik etdiyi Qoşulmama Hərəkatında, ümid edirik ki, bu məsələlər kağız üzərində qalmayacaq və reallığa çevriləcək", - deyə o vurğulayıb.
Qeyd edək ki, martın 2-də Azərbaycan Prezidenti İlham Əliyev Qoşulmama Hərəkatının COVID-19-a qarşı mübarizə üzrə Təmas Qrupunun Bakıda keçirilən Zirvə görüşündə çıxışında “Qoşulmama Hərəkatı Qəmər Adaları İttifaqının Fransanın müstəmləkə hakimiyyəti altında qalmaqda davam edən Mayot adası üzərində şəksiz suverenliyini həmişə güclü dəstəkləmişdir. Qoşulmama Hərəkatının təməl sənədlərində əks olunduğu kimi, biz Fransa hökumətini Yeni Kaledoniya xalqının və Fransanın dənizaşırı icma və ərazilərindəki digər xalqların hüquqlarına hörmət etməyə çağırırıq”-deyə bildirib.
Prezident Əliyev həmçinin qeyd edib: “Fransanın Avropadan kənarda idarə etdiyi ərazilər fransız müstəmləkə imperiyasının iyrənc qalıqlarıdır. Biz, həmçinin Fransanı Afrika, Cənub-Şərqi Asiya və digər ərazilərdə Qoşulmama Hərəkatının üzvü olan ölkələrə qarşı müstəmləkə keçmişinə, qanlı müstəmləkə cinayətlərinə, eləcə də soyqırımı aktlarına görə üzr istəməyə və məsuliyyətini etiraf etməyə çağırırıq”.
Məlum olduğu kimi, Yeni Kaledoniya nümayəndə heyətinin rəhbəri Maykl Forrest də öz fikirləri ilə prezident Əliyevə dəstək verdi.
“...Bu çağırışa dünya həssaslıqla yanaşmalıdır”
Siyasi ekspert Abutalıb Səmədov “Bakı-Xəbər”ə bildirdi ki, Fransa son 100 ildə soyqırım cinayətləri törətmiş dövlətlər arasında “yüksək” yerlərdən birini tutur. “Heç vaxt bu cinayətlərə görə üzr istəməyi ağlından keçirməyib. Çox təəssüf ki, bu da reallıqdır. Bununla da kifayətlənməyib, bütün dövlətlərin daxili işlərinə qarışır, onlara yol göstərir, məsləhətlər verir. Çox təəssüf ki, bu sırada Fransa Azərbaycana da xüsusi yer ayırır. Son dövrdə Fransanın ədalətsiz münasibətindən, yersiz müdaxilələrindən ən çox əziyyət çəkən dövlətlərdən biri Azərbaycandır. Təkcə Fransa parlamentinin son dövrdə qəbul etdiyi qətnamələri nəzərə alsaq görərik ki, Fransa Azərbaycana qarşı nə qədər ədalətsiz mövqe tutur və bu xətti yeritməkdə davam edir. Makronun Praqa sammitindən sonra verdiyi bəyanat da bir dövlət adamının nə qədər reallıqları anlamamasının, reallıqları dərk etməməsinin çox bariz bir göstəricisidir. Sən bir tərəfdən vasitəçi olmaq istəyirsən, bir tərəfdən iddia edirsən, Minsk qrupunun həmsədrisən, o biri tərəfdən də bəyan edirsən ki, biz Ermənistanın yanındayıq və sonuna qədər Ermənistanı tərk etməyəcəyik”.
A.Səmədovun vurğuladığına görə, qəribə olan haldır ki, biz Makronun ikinci dəfə prezident seçilməsinə sevindik. O qeyd etdi ki, çünki onun rəqibləri o qədər aşağı səviyyəli, dünya üçün təhlükəli siyasətçilər idi ki, hətta Makronun seçilməsi bizi sevindirdi. Dünyaya böyük dövlət adamları, dövlət xadimləri təqdim etmiş Fransa bu gün Makronun qələbəsinə sevinir, şükür edir və dünya da eyni sevinc hisslərini keçirir: “Çox təəssüf ki, Fransanın siyasi reallığı bundan ibarətdir. Açıq demək lazımdır, Fransa dünyada nüfuzunu itirir və itirməkdə davam edir. Bu gün Fransa Prezidentinin adı çəkiləndə daha çox siyasətçilərdə bir rişxənd hissi oyanır. O qədər qeyri-ciddi siyasətçidir ki, heç kim Makronu ciddiyə almır. Hesab edirəm ki, bundan sonra da Fransanın törətdiyi cinayətlərlə bağlı bu cür tələblər artmaqda davam edəcək. Azərbaycan Prezidenti artıq ikinci dəfədir Fransaya müraciət edir və Fransa rəhbərini üzr istəməyə çağırır. Təbii ki, üzr istəmək kifayət deyik, eyni zamanda vurulmuş maddi və mənəvi zərər də ödənilməlidir. Fransa hələ bundan qaçır və dünyaya yaşamaq dərsi keçməkdə davam edir. Ancaq uzun müddət qaça bilməyəcək. Dünya ölkələri Fransadan törətdiyi cinayətlərə görə hesab tələb etməkdə davam edəcəklər. Azərbaycan da şübhə yoxdur ki, bu məsələdə öndə gedən dövlətlərdən olacaq”.
A.Səmədov vurğuladı ki, Yeni Kaledoniya nümayəndə heyətinin rəhbəri Maykl Forrestin Azərbaycan Prezidentinin fikirlərinə dəstək verməsi çox təbiidir: “Yeni Kaledoniya nümayəndə heyətinin rəhbərinin bu cür təşəbbüslə çıxış etməsi fikrimcə, təbii sayılmalıdır. Çünki onlar uzun müddət Fransanın “humanizmi”nin şahidi olublar və Fransa müstəmləkəçiliyindən kifayət qədər əziyyət çəkiblər. Fransanın dövlət kimi gördüyü işləri hamıdan yaxşı onun müstəmləkəsi olan dövlətlər və onların nümayəndələri bilir. Hesab edirəm ki, bu çağırışa dünya həssaslıqla yanaşmalıdır. Yeni Kaledoniya nümayəndə heyətinin rəhbərinin Fransa ilə bağlı müraciətinə dəstək verilməlidir. Azərbaycan Prezidentin bundan əvvəl verdiyi bəyanata arzuladığımız dəstəyi vermədilər, heç olmasa müstəmləkə zülmündən əizyyət çəkən dövlət nümayəndələrinin çağırışlarına həssas olsunlar və onlara dəstək olsunlar. Bu, gələcəkdə bu kimi halların qarşısını almağın ən düzgün yolu olardı”.
İradə SARIYEVA
