“Düşünürəm ki, bizim bugünkü görüşümüz, Qoşulmama Hərəkatında iştirakımız faydalı olacaq. Xüsusi olaraq qeyd etmək istəyirəm ki, Azərbaycanın, şəxsən Sizin uğurlu sədrliyinizlə bu təşkilatın nüfuzu artıb”.
AZƏRTAC xəbər verir ki, bu fikirləri Özbəkistan prezidenti Şavkat Mirziyoyev Azərbaycan Prezidenti İlham Əliyevlə martın 1-də keçirilən görüşdə ifadə edib.
Özbəkistan Prezidenti deyib: “Birləşmiş Millətlər Təşkilatının vaksinlə bağlı xüsusi qətnaməsi qəbul edildi, Hərəkatın parlament və gənclər strukturları yaradıldı. Fikrimcə, bu, Qoşulmama Hərəkatında Azərbaycanın tarixi sədrliyidir. Bütün dövlətlər həmin qətiyyəti, səyləri gördülər. Hazırkı mürəkkəb şəraitdə bu Hərəkatın səviyyəsini yalnız Azərbaycan qaldıra bilər. Mən bu münasibətlə Sizi təbrik etmək istəyirəm. Bir daha Sizinlə görüşümüzə şadam. Düşünürəm ki, bizim fikir mübadiləsi aparmaq, komandalarımızı dinləmək üçün yaxşı imkanımız var”.
Şavkat Mirziyoyevin “Hazırkı mürəkkəb şəraitdə Qoşulmama Hərəkatının səviyyəsini yalnız Azərbaycan qaldıra bilər” fikri həqiqətən də ölkəmizə verilən yüksək dəyərdir.
Azərbaycan bunu hansı potensialla həyata keçirir? Azərbaycan bu inamı necə qazanıb? Özbəkistan prezidentinin ifadə etdiyi bu fikirləri necə şərh etmək olar? Azərbaycanın rəhbərliyi dövründə Qoşulmama Hərəkatı hansı irəliləyişlər, uğurlar əl etdi?
“Bu baxımdan həm də Özbəkistan prezidenti bu kontekstdə ölkəmizin rolunu dəyərləndirir”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli “Bakı-Xəbər”ə şərhində bildirdi ki, Özbəkistan prezidentinin məlum fikirləri ilk növbədə beynəlxalq səviyyədə ölkəmizə olan böyük etimadın göstəricisidir. “Təbii ki, bu etimad həm də Azərbaycanın Qoşulmama Hərəkatındakı fəaliyyəti ilə bağlıdır”.
M.Məmmədli hesab edir ki, Qoşulmama Hərəkatına Azərbaycanın uğurla sədrlik etməsi, bu istiqamətdə fəaliyyəti beynəlxalq səviyyədə təqdir edilib qiymətləndirilir. “Qısa dövr ərzində, yəni Azərbaycan Qoşulmama Hərəkatına rəhbərlik etdikdən sonra hərəkatın strukturlaşmasında və onun beynəlxalq münasibətlər sistemində müəyyən ciddi rola malik olmasında böyük rol oynayıb. Bu baxımdan həm də Özbəkistan prezidenti bu kontekstdə ölkəmizin rolunu dəyərləndirir. Bilirsiz ki, Bakıda Qoşulmama Hərəkatının sammiti keçirilir, bu tədbirə ölkəmiz ev sahibliyi edir. Hesab edirəm ki, Azərbaycan bu hərəkatın, bu platformanın daha da güclənməsində, beynəlxalq münasibətlər sistemində təsir imkanlarının daha da artmasında öz fəaliyyətini uğurla davam etdirəcək. Bunun üçün ölkəmizin kifayət qədər siyasi, diplomatik potensialı var. Biz görürük ki, Azərbaycan Qoşulmama Hərəkatında həm çoxtərəfli əsasda, həm də ikitərəfli müstəvidə bu təşkilata üzv olan ölkələrlə olduqca yüksək səviyyəli əməkdaşlıq münasibətinə malikdir. Qeyd etdiyimiz kimi, bu münasibətlər də həm çoxtərəfli, həm də ikitərəfli əsasda artıq formalaşmış münasibətlərdə ölkəmizin Qoşulmama Hərəkatına uğurla liderlik, rəhbərlik etməsində ciddi rol oynayıb”-deyə M.Məmmədli qeyd etdi.
Leyla QARAXANLI
