Qarabağda yaşayan erməni sakinlərin Azərbaycana reinteqrasiyasının aktuallaşdığı, artıq bu istiqamətdə addımlar atılmağa başlandığı məlumdur. Bildiyimiz kimi, Milli Məclisin deputatı Ramin Məmmədov Azərbaycan Respublikasının Qarabağ bölgəsində yaşayan erməni sakinlərlə təmaslar üzrə məsul şəxs qismində müəyyən edilib.
Martın martın 1-də Ramin Məmmədov Xocalı şəhərində, Azərbaycan Respublikası ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşüb.
Bu arada Araik Arutunyan yeni “dövlət nazirini” təqdim edərkən yenə də pozucu fikirlər səsləndirib. Erməni mediası Araikin inteqrasiyaya qarşı olduğunu və bəzi “tələblər, şərtlər” irəli sürdüyünü yazır. A.Arutunyan “Mən tam məsuliyyətlə bildirmək istəyirəm ki, Azərbaycanla istənilən inteqrasiya prosesi istisnadır. Lakin bu o demək deyil ki, biz infrastruktur və humanitar xarakterli problemlərin həlli üçün təmaslardan qaçacağıq. Münaqişənin həlli üçün danışıqların aparılması üçün isə, fevralın 23-də müraciətimdə qeyd etdiyim kimi, müəyyən şərtlər və beynəlxalq format təmin edilməlidir”-deyə bildirib.
Araik deyir ki, Azərbaycanla istənilən inyeqrasiya prosesi istisnadır. Belə iş olar? Niyə bunu da Qarabağdan qovmaq məsələsini qoymayaq?Araiki niyə Vardanyan kimi torpağımızdan çıxarmayaq? Bu adam pozuculuq fəaliyyətini hər addımda ortaya qoyur, erməni sakinlərin inteqrasiyasının qarşısını almağa cəhd edir.
“... Onun da dövranı bu yaxınlarda bitəcək”
Siyasi şərhçi Azər Həsrət “Bakı-Xəbər”ə şərhində bildirdi ki, Araik bu sərsəm bəyanatı verməklə əslində öz əndişəsini ifadə edib. O qeyd etdi ki, Araik reinteqrasiya prosesi həyata keçirildikdən sonra onun kimilərinin azadlıqda qalmayacağını yaxşı bilir :"Əlbəttə ki, Araik və ona bənzər adamlar bu cür sərsəm iddiaları səsləndirəcəklər. Reallıq isə başqa şeydir. Azərbaycan dövləti böyüklük edib onlara əl uzadır, ümumiyyətlə, Qarabağda yaşayan erməni vətəndaşlarımızın normal həyata dönməsi üçün mümkün olanları edir, edəcək də. Əlbəttə, Araik kimi adamlar başa düşür ki, bu inteqrasiya nəticəsində onun özü məhkəmə qarşısında durmalı olacaq. Çünki Araik 44 günlük Vətən müharibəsi günlərində Azərbaycanın dinc şəhərlərinin bombalanması, raket atəşinə tutulması üçün göstəriş verənlərdən biridir. Bunlara görə cavab verməli olacaq. Bu səbəbdən də bu cür bəyanatlar səsləndirib öz ömrünü uzatmağa çalışır. Unudur ki, Azərbaycan Xankəndidə öz bayrağını ucaldacaq, buradakı dinc sakinlər normal həyata dönəcəklər. Araik kimi cinayətkarlar isə məhkəmə qarşısına çıxarılacaq. Onun durub deməsi ki, hər hansı bir inteqrasiya istisnadır, bunlar boş şeylərdir. Necə ki, bir vaxtlar Ermənistanın baş naziri "Qarabag Ermənistandır” deyirdi. Cənab Prezident İlham Əliyev də ona çox sakit bir tərzdə "Qarabağ Azərbaycandır!"dedi. Ardından da onu əməldə göstərdi. İndi o balaca kukla Araikin dedikləri bizi o qədər də narahat etmir. Çünki onun ən böyüyünə biz yerini göstərmişik. Bütün dünya erməniliyinə yerini göstərdik. Araik kimdir ki Azərbaycan dövləti ona baş qoşun? Azərbaycan dövləti böyüklük edib sərt şəkildə getmir, imkan tanıyır ki, reinteqrasiya prosesinə hazırlaşsınlar. Bu proses gec-tez baş verəcək. Amma hesab edirəm ki, çox tezliklə baş verəcək. Yəni bunun başqa alternativi yoxdur. Ona görə də Araik kimi adamlar oturub bir daha düşünsünlər. Bəsdir onların dinc ermənilərə çəkdirdikləri. Lap elə Ermənistandakı, Qarabağdakı ermənilərə də çəkdirdilərinə son qoyulmalıdır. Bu ermənilər nə vaxta kimi Araik kimi yarımqapalı adamların girovu olaraq qalacaqlar? Əlbəttə ki, bu proses bitməlidir"-deyə A.Həsrət vurğuladı.
A.Həsrət hesab edir ki, Araikin də Vardanyan kimi Qarabağdan qovulmasının vaxtı gələcək: "Yavaş-yavaş biz bu prosesi yekunlaşdırırıq. Azərbaycan dövləti bu məsələdə həmişə təmkinli davranıb və yenə də təmkinli davranır. Ümumilikdə prosesə heç bir ziyan vurmaq istəmir. Hələlik Araik də orada özünü "lider" sanmaqda davam edir. Amma onun da dövranı bu yaxınlarda bitəcək".
İradə SARIYEVA
