Xəbər verildiyi kimi, Milli Məclisin deputatı Ramin Məmmədov Azərbaycan Respublikasının Qarabağ bölgəsində yaşayan erməni sakinlərlə təmaslar üzrə məsul şəxs qismində müəyyən edilib.
Bu məqsədlə martın 1-də Ramin Məmmədov Xocalı şəhərində, Azərbaycan Respublikası ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşüb. Görüşdə Ekologiya və Təbii Sərvətlər Nazirliyinin, İqtisadiyyat Nazirliyi yanında Əmlak Məsələləri Dövlət Xidmətinin və “AzerGold” Qapalı Səhmdar Cəmiyyətinin mütəxəssislərindən ibarət, təbii sərvətlərin qanunsuz istismarını araşdıran monitorinq qrupunun rəhbəri Məsim Məmmədov da iştirak edib.
Görüşdə, Azərbaycan Respublikasının Konstitusiyasına və qanunlarına uyğun olaraq, Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair ilkin müzakirələr aparılıb.
Maraqlıdır ki, Ermənistan mediası bu formatda keçirilən görüşün əsl mahiyyətini təhrif edərək, bunu “üçtərəfli görüş” adlandırır. Görüşdə iştirak edən nümayəndələri “Artsax dövlətinin” təmsilçiləri kimi bizimlə bərabər tərəf kimi təqdim edirlər. Ermənilərin bu pozuculuğu etimad mühitinə necə təsit edir?
Milli İstiqlal Partiyası Mərkəzi Şurasının sədri, politoloq Rəşad Bayramov “Bakı-Xəbər”ə bildirdi ki, bu, Azərbaycan nümayəndələri ilə Qarabağdakı erməni icması arasında ilk təmas deyil: “Bundan bir müddət əvvəl də belə bir görüş olub, Ancaq bu görüş ilk rəsmi təmas olması baxımından fərqlənir.
Uzun müddət idi ki, həm beynəlxalq təşkilatlar, həm də ayrı-ayrı vasitəçi dövlətlər tərəfindən Azərbaycanın Qarabağdakı erməni icması ilə birbaşa danışıqlar aparması məsələsi gündəmə gətirilirdi. Elə Azərbaycan özü də hər hansı üçüncü tərəf olmadan bu görüşləri mümkün hesab edirdi. Çünki söhbət hər hansı bir ölkədən ixrac olunan şəxslərlə görüşdən deyil, Azərbaycanın öz vətəndaşları ilə görüşdən gedir.
Təbii ki, bu kimi təmaslar Azərbaycanın maraqlarına cavab verir. Çünki artıq Qarabağdakı erməni icmasının adından Ermənistan deyil, birbaşa erməni əsilli Azərbaycan vətəndaşları çıxış edir. Azərbaycan vətəndaşları ilə də oturub söhbət etməkdə Azərbaycan hakimiyyəti və dövlətinin hər hansı bir problemi yoxdur. İndidən ermənilərin reinteqrasiya prosesinin başlaması barədə söhbət açmaq hələ tezdir. Amma ilkin təmaslar varsa, bu təmaslar Azərbaycanın diqtəsi ilə həyata keçirilirsə, bunu müsbət qiymətləndirmək lazımdır. Bu cür təmaslar növbəti perspektivdə artıq Ermənistan və özünü Qarabağda “qurum” elan edən terrorçu rejim olmadan oradakı əhali ilə daha tez dil tapmağa öz müsbət təsirini göstərə bilər.
Digər tərəfdən, Ermənistanda revanşist siyasətçilərin, elə Qarabağdakı Vardanyanın yeni müharibə çağırışları fonunda Qarabağ ermənilərinin Azərbaycan təmsilçiləri ilə görüşə başlamasının özü artıq müsbət məqamdır. Və ən nəhayət, bu proses Ermənistanı faktiki olaraq ən azı Qarabağdakı prosesdən kənara atır və eləcə də rəsmi İrəvanın Cənubi Qafqaza yeni oyunçular daxil etməsi prosesinə də zərbə vurur”.
Politoloqun sözlərinə görə, Ermənilərin görüşdə iştirak edən icma təmsilçisini “dövlət nümayəndəsi” kimi təqdim etməsi, tərəflərin statuslarını eyniləşdirməyə cəhd etmələri yolverilməzdir: “Görüşdən sonra Arayik Arutunyanın çıxış edib sona qədər mübarizə aparacaqıarını deməsi onu deməyə əsas verir ki, görüş separatçıların iradəsi daxilində baş tutmayıb. Bu cür təqdimat həm də daxili auditoriyaya hesablanır ki, onları sakitləşdirsinlər. Bu təmaslar birbaşa Azərbaycanın diqtəsi ilə baş tutur və ermənilər anlayır ki, orada yaşamağın yeganə yolu Azərbaycan vətəndaşlığının qəbulundan keçir. Yanlış təqdimatla nəyisə dəyişə bilməzlər”.
Məhəmmədəli QƏRİBLİ
