İran molla rejimi Təbriz Universitetinin Azərbaycanşünaslıq Mərkəzinin fəaliyyətinin dayandırılmasına qərar verib. Bu barədə “Azad İran” “Telegram” kanalı məlumat yayıb.
Məlumata görə, Tehran rejimi həmçinin Mərkəzin üzvlərinə qarşı təzyiqləri də artırıb.
Qeyd edilir ki, bununla bağlı Mərkəzin sosial media hesabında paylaşım edilib. Bildirilib ki, Mərkəzin Təbrizdən olan iki üzvü - tələbə hərəkatı fəalları Hadi Heydəri Azad və İbrahim Əhmədpur fevralın 27-də həbs olunub. “Təbriz Universitetinin hər yeri Azərbaycanşünaslıq Mərkəzidir”, - deyə paylaşımda vurğulanıb.
“Ölkə daxilində vəziyyət stabilləşəndən sonra rejim məcburiyyət qarşısında qalıb Azərbaycanşünaslıq Mərkəzini yenidən açacaq”
Təbriz Universitetində Azərbaycanşünaslıq Mərkəzinin bağlanmasına münasibət bildirən AVCİYA-nın vitse-prezidenti, siyasi şərhçi, professor Məhərrəm Zülfüqarlı molla rejiminin bu addımını kəskin pislədi. “Əlbəttə, məqsəd aydındır, bu rejimin uzun illərdir yürütdüyü anti-Azərbaycan, antitürk siyasətinin nəticələrindən biridir”-deyə bildirən alim vurğuladı ki, hazırkı dövrdə İranda sosial problemlərin çoxluğundan insanlar etiraz aksiyalarına çıxır. “Bilirsiz ki, İran tarixində siyasi cəhətdən ən aktiv region Cənubi Azərbaycanın mərkəzi olan Təbriz olub. Ona görə də belə gərgin dövrlərdə həmişə Tehran rejimi Cənubi Azərbaycana, xüsusən də Təbrizə nəzarəti gücləndirir. İranda əvvəlki illərdə Təbriz Universitetində Azərbaycanşünaslıq Mərkəzi yaradılmışdı. Sonra Azərbaycan dili üzrə kadrlar hazırlayan xüsusi şöbə fəaliyyət göstərirdi. Bu artıq müsbətə doğru irəliləyiş hesab oluna bilərdi. Azərbaycanın mərkəzi, ürəyi olan Təbrizdə milli hiss, milli şüur inkişaf edirdi. Əlbəttə, indiki dövrdə İranda etiraz aksiyalarının başlanması, sosial problemlərin çoxluğu yaşanır, insanlar narazıdırlar. Xalqa qarşı irtica hərəkətə keçib. Bu da birinci növbədə siyasi cəhətdən fəallığı olan regionlarda əhaliyə qarşı repressiv hərəkətlərin başlanmasıdır. Bu baxımdan da, molla rejimi özü üçün təhdid, qorxu hesab etdiyi milli mərkəzləri bağlamağa başlayır. Azərbaycanşünaslıq Mərkəzini də rejim özünə qarşı bir təhdid kimi gördüyü üçün onu bağlamaq barədə qərar qəbul edib. İran İslam Respublikasının baxışında millət anlayışı hümmət anlayışı ilə əvəz olunur. Onlarda belə bir ideologiya var ki, bütün müsəlmanlar bir millətdir, onların hamısı da fars dilində oxumalıdır. Xristian və başqa dinlərin daşıyıcılarına isə öz dillərində təhsil almalarına icazə verirlər. Bu baxımdan Azərbaycan dilində məktəblərin açılmasına imkan verilmirdi. Amma bilavasitə Azərbaycan xalqının mübarizəsi nəticəsində dediyimiz ixtisas açılıdı, hazırlıq da vardı, Azərbaycanşünaslıq Mərkəzi də yaradılmışdı. Hətta Təbrizdə, Ərdəbildə Azərbaycan dilində radio verilişləri də oldu. Düzdür, bu verilişlər fars dilinə qarışıq Azərbaycan ləhcəsində oldu, amma mövcud idi. Bu onun göstəricisidir ki, əvvəllər əldə olunan müsbət nəticəni İran rejimi mövcud sosial gərginlik şəraitində aradan qaldırmağa çalışır. Mənə elə gəlir ki, Azərbaycanşünaslıq Mərkəzinin bağlanması müvəqqəti xarakter daşıyır. Ölkə daxilində vəziyyət stabilləşəndən sonra rejim məcburiyyət qarşısında qalıb Azərbaycanşünaslıq Mərkəzini yenidən açacaq. Yadda saxlamaq lazımdır ki, İran əhalisinin 53 faizi etnik azərbaycanlılardır, dövlət vəzifələrində də çoxlu sayda azərbaycanlılar təmsil olunur. Onlar nə qədər rejimə bağlı olsalara da, öz azərbaycançılıqlarını, öz milli kimliklərini, dəyərlərini heç də unutmayıblar. Biz bunu həmin ölkənin parlamentində müxtəlif deputatların çıxışlarında da görmüşük. Ona görə də, hesab edirəm ki, bu müvəqqəti haldır”.
M.Zülfüqarlının fikrincə, rejim daxildəki böhranın ona ciddi ziyan vuracağı qənaətinədir və bu üzdən də mərkəzlərə qarşı hazırkı siyasəti yürüdür. M.Zülfüqarlı hesab edir ki, rejimin antitürk siyasəti nə qədər güclü olsa da, soydaşlarımızın tələbləri qarşısında müəyyən qədər arxa plana keçir.
İradə SARIYEVA
