Ermənistanın Azərbaycanla münasibətlərin qurulmasında mövqeyi Avropa İttifaqı missiyasının başlamasından sonra daha destruktiv xarakter alıb.
Bunu xarici işlər naziri Ceyhun Bayramov çərşənbə axşamı Bakıda səfərdə olan Rusiyanın xarici işlər naziri Sergey Lavrovla keçirdiyi mətbuat konfransında deyib.
Ermənistan tərəfindən 10 noyabr 2020-ci il tarixli Üçtərəfli Bəyanatın müddəalarının pozulmasının daha bir nümunəsi olaraq yalnız humanitar məqsədlər üçün istifadəsinin nəzərdə tutulduğu Laçın yolundan sui-istifadə hallarının Azərbaycanın vətəndaş cəmiyyətinin haqlı etirazına səbəb olduğu bir daha diqqətə çatdırılıb.
Maraqlıdır, Aİ missiyası gələndən sonra Ermənistanın destruktivliyinin artması nə deməkdir? Ermənistan bu destruktivliyi özü artıraraq Avropa missiyasına nümayiş etdirmək istəyir ki, doğurdan bu bölgədə gərginlik var? Yoxsa Ermənistan bu destruktivliyi Aİ missiyasının təhriki ilə həyata keçirir? Bunun nə kimi mənası var?
“Bu, Fransa ilə Paşinyan hakimiyyətinin birgə layihəsi də ola bilər”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, hər iki versiya destruktivliyin artmasında müəyyən rol oynaya bilər: “Həqiqətən də Ermənistanın fəaliyyətində destruktivlik elementləri son vaxtlar özünü daha çox göstərir. Mümkündür ki, Ermənistan bilərəkdən buna gedir və Aİ missiyasına bölgədə vəziyyətin gərgin olduğunu göstərir. Çünki Ermənistan hakimiyyətinin bunda müəyyən məqsədləri var. Məqsəd odur ki, Avropa qurumlarını ölkəsinə daha çox cəlb etsin. Sonra onlardan öz məqsədləri üçün bu və ya digər dərəcədə istifadə etsin. Başqa bir tərəfdən o da ola bulər ki, Aİ missiyası bununla bağlı Ermənistana müəyyən sifarişlər versin. Yəni bununla yoxlamaq istəyirlər ki, görək Azərbaycan buna necə reaksiya verir. Bu baxımdan sözügedən versiyaların hər biri ola bilər. O da ola bilər ki, Rusiya sözügedən destruktivliyin artmasında səylərini artırır. Biz nəzərə almalıyıq ki, Ermənistanın parlament müxalifəti Rusiyaya bağlıdır. Onlar müxtəlif səviyyələrdə hakimiyyətə təzyiq göstərməyə çalışırlar. Üstəlik, Ermənistan ordusunda Rusiyaya bağlı hərbçilər var. Onların təhriki ilə atəşkəsin pozulması halları baş verə bilər. Münhen konfransından sonra təmas xəttində atəşkəsin pozulması heç də təsadüfi deyildi. Bu baxımdan Ermənistanda Rusiyanın 5-ci kolonu bütün bunları etməklə Aİ missiyasını gözdən salmağa çalışa bilər. Mesaj verirlər ki, burada olmağınızdan asılı olmayaraq istədiyimiz vaxt sabitliyi poza bilərik. O üzdən, bu ehtimalı da gözardı etmək olmaz. Hər halda, bütün hallarda anlaşılan odur ki, Ermənistan bir formada sülh razılaşmasının yubanmasında maraqlıdır. Çünki istənilən halda destruktiv yanaşma sülh sazişinin yubanmasına gətirib çıxarır. Hesab edirəm ki, bu, Fransa ilə Paşinyan hakimiyyətinin birgə layihəsi də ola bilər. Çünki Fransa da pozucu mövqedən çıxış edir. Baxmayaraq ki, Fransa Avroittifaqda böyük çəkiyə malikdir. Ancaq buna rəğmən, Fransa ədalətli sülhdə maraqlı deyil”.
Vidadi ORDAHALLI
