“Rusiya ümid edir ki, Rusiya, Ermənistan və Azərbaycanın üçtərəfli işçi qrupu tezliklə Azərbaycanın qərbi ilə Naxçıvan arasında nəqliyyat əlaqələrinin yaradılması ilə bağlı razılığa gələ biləcək”. Bunu Rusiyanın xarici işlər naziri Sergey Lavrov Azərbaycan XİN başçısı Ceyhun Bayramovla danışıqlarının yekunlarına dair birgə mətbuat konfransında bildirib.
Lavrov ölkəsinin Rusiya, Azərbaycan və Ermənistan Baş nazirlərinin müavinlərinin müvafiq üçtərəfli İşçi Qrupun həmsədrləri kimi tezliklə Azərbaycanın əsas əraziləri ilə Naxçıvan arasında dəmir yolu marşrutunun istifadəsinin bərpası ilə bağlı konkret razılıqlar əldə edəcəklərinə ümid etdiyini deyib: “2020-ci ilin noyabrından Rusiya, Azərbaycan və Ermənistan liderlərinin artıq dörd bəyanatı var. Bu bəyanatlar bizim işimizin əsasını təşkil edir. Nəqliyyat və iqtisadi əlaqələrdən blokadanın götürülməsi barədə danışdıq. Ümid edirik ki, yaxın zamanda Rusiya, Azərbaycan və Ermənistan baş nazirlərinin müavinləri müvafiq üçtərəfli işçi qrupun nümayəndələri olaraq Azərbaycanın əsas ərazisinin Naxçıvanla dəmir yol əlaqəsinin bərpası ilə bağlı konkret razılaşmalara nail olacaqlar”.
Bundan əvvəl də Naxçıvana yolun açılması ilə bağlı Lavrov oxşar fikirlər səsləndirib, amma bu reallaşmayıb. O baxımdan Lavrovun son açıqlamasını ekspertlər necə dəyərləndirir?
“Yaxın perspektivdə Naxçıvana dəmir yolunun açılması real görünmür”
Məsələyə münasibət bildirən iqtisad üzrə fəlsəfə doktoru Firdovsi Şahbazov hesab edir ki, Lavrovun bununla bağlı dedikləri ümumi xarakterlidir: “Məsələ ondadır ki, Azərbaycan Zəngəzur dəhlizi istiqamətində konkret işlər gördüyü halda, Ermənistanda bu hiss olunmur. Məsələn, Azərbaycan Horadizdən başlayaraq Zəngilanın Ağbənd qəsəbəsinə doğru dəmir və avtomobil yolları çəkir. Bununla bağlı hərtərəfli iş gedir. Artıq işlərin böyük hissəsi görülüb. Bununla bağlı bütün texnika və işçi qüvvəsi yol çəkilişlərinə cəlb olunub. Gələn ilin sonuna qədər işlərin yekunlaşacağı gözlənilir. Ancaq bizdən fərqli olaraq, Ermənistanın Mehri rayonuna düşən hissədə heç bir iş görülmür. Halbuki, hardasa 44 kilometrlik yol Ermənistandan keçir. Ermənistan hissəsində bu işləri görmək üçün 200 milyon dollara ehtiyac var. Digər tərəfdən, Ermənistan dəhliz məsələsində dirəniş göstərir. Kommunikasiya xətlərinin açılması ilə bağlı konkret addımlar atmır. Düzdür, erməni rəsmiləri bir neçə dəfə bəyan ediblər ki, yolların açılması Ermənistanın xeyrinə olacaq. Bu günlərdə baş nazir Nikol Paşinyan bəyan etdi ki, nəqliyyat xətlərinin açılması Azərbaycandan çox Ermənistana lazımdır. Ancaq bütün bunlara baxmayaraq, Ermənistan praktiki olaraq addımlar atmır. Bu baxımdan hesab edirəm ki, yaxın perspektivdə Naxçıvana dəmir yolunun açılması real görünmür”.
Vidadi ORDAHALLI
