Rusiyanın xarici işlər naziri Sergey Lavrovun Bakıda səsləndirdiyi fikirlər Ermənistanda, həmçinin Qərb dünyasında ciddi rezonans yaradıb. Xüsusən də Avropa İttifaqı missiyası ilə bağlı artıq Moskva ilə İrəvan arasında ziddiyyətlərin daha da dərinləşməsi müşahidə edilir.
Lavrov açıq mətnlə İrəvana bildirdi ki, Ermənistan Avropa İttifaqı missiyasını bölgəyə gətirməklə yanlışlığa yol verir. Ermənistanın parlament sədri Alen Simonyan isə İrəvandan ona bu şəkildə cavab verdi: “Moskva digər ölkələrin Ermənistan-Azərbaycan münasibətlərini normallaşdırmaq təşəbbüslərinə həddən artıq emosional və əsəbi reaksiya verir”. Beləliklə İrəvan, Rusiyanın xəbərdarlıqlarına baxmayaraq, Avropa İttifaqının missiyasını Ermənistanda yerləşdirib. Bu fonda artan ziddiyyətlərə diqqət çəkən “armenianreport” portalı “Lavrov Bakıdan hücum edir, Simonyan İrəvandan cavab verir” adlı məqaləsində yazır: “Rusiyanın xarici işlər naziri Sergey Lavrovun Bakıya iki günlük səfəri Moskvadan İrəvana yönəlik açıq-aşkar demarş və xəbərdarlıqdır. Belə bir nəticəyə gəlmək üçün çox da fikirləşmək lazım deyil - 2018-ci ilə qədər Rusiya heç olmasa ictimai şəkildə neytrallığa riayət etməyə çalışıb və Rusiyanın yüksək rütbəli məmurlarından biri Bakıya gedibsə, deməli, onlar sözsüz ki, yoüstü və ya geri dönərkən İrəvanda da dayanıblar. Yaxud, məsələn, rusiyalı nazirlərdən biri İrəvana getdisə, başqa bir nazir Bakıya üz tutur. Bəli, bunda açıq-aşkar ikitərəflilik var idi (1988-ci ilin mayını necə yada salmaq olmaz ki, Liqaçov Bakıya, Yakovlev İrəvana gəldi və hər ikisi tamamilə əks mövqeli çıxışlar etdilər), ən azı neytrallıq görüntüsü yaradıldı. İndi maskalar atılıb və Moskva açıq-aşkar Bakıya doğru əyilir, oradan Lavrovun barmağı ilə İrəvanı hədələyir. Məsələn, Rusiya diplomatiyasının rəhbəri Ermənistanın baş naziri Nikol Paşinyanın Rusiyanın Ermənistanda hərbi mövcudluğunun təhlükəsizliyə təhdid olduğunu və Avropa İttifaqının missiyasının Rusiya ilə birgə hücumla bağlı mövcud qorxuların qarşısını ala biləcəyi barədə bəyanatını şərh etmək sorğusunu cavablandırarkən Lavrov olduqca qeyri-təntənəli şəkildə bildirib ki, Ermənistan liderinin bəyanatını tamamilə onun vicdanına buraxır. O, Ermənistan tərəfinin Moskvada keçiriləcək növbəti üçtərəfli görüşə hələ də yekun razılıq verməməsinə də qəzəblənib. “Xidmətlərimizi təklif etməkdə çox aqressiv olacağımızı düşünmürəm”, - deyə Lavrov yanaqlarını şişirib, görünür, hələ də Mirzoyanı ötən dekabrda üçtərəfli görüş üçün Moskvaya göndərməkdən imtina etdiyinə görə İrəvana qarşı kin saxlayır.
Təbii ki, Lavrovun Bakıdakı antierməni hücumları Ermənistana da təsirsiz ötüşməyə bilməzdi və artıq İrəvan onlara Milli Assambleyanın spikeri Alen Simonyanın dili ilə reaksiya verib. Eyni zamanda, bizim iqtidar təmsilçiləri özlərini incimiş kimi göstərmədilər və dərhal, necə deyərlər, öküzün buynuzundan tutdular, Moskvanın ikiüzlüyünü, xəyanətini, hətta çarəsizliyini göstərdilər. Belə ki, Simonyanın fikrincə, “Rusiya daha təmkinli olmalı və Ermənistanın təhlükəsizlik məsələlərini həll edə bilməyəcəyini etiraf etməlidir”. “Düşünürəm ki, hər hansı digər tərəf müsbət bir şey etməyə çalışarkən Moskvadan gələn qıcolmalar və reaksiyalar bir az lazımsızdır. Moskvanın bəyanatları bir az daha sakit, təmkinli olmalıdır və onlar başa düşməlidirlər ki, Ermənistanın öz maraqları və təhlükəsizlik problemləri var, geosiyasi dalğalanmalara, kiminsə istəklərinə və ya qısqanclığına baxmayaraq, təmin edilməlidir”, - Simonyan bildirib. O, həmçinin əlavə edib ki, Rusiya Ermənistanın təhlükəsizlik məsələlərini həll edə bilməyəcəyini açıq şəkildə bəyan etməlidir. “Onlar həmişə deyirlər ki, hər zaman o mövqedən çıxış edəcəklər ki, başqası məsələni başqa cür həll etməsin. Amma fakt budur ki, bu məsələ ruslar tərəfindən həll edilməlidir. Onlar bu məsələni həll etməli idilər”- Alen Simonyan bildirib. Alen Simonyanla razılaşmamaq çətindir. Ən azından, Ermənistanda Rusiyanın 102-ci hərbi bazası yerləşir, İrəvanla Moskva arasında bir çox təhlükəsizlik sazişləri imzalanıb, ölkə özü də KTMT-nin üzvüdür, amma Ermənistanın suveren ərazisi təhdid altında olanda heç kim barmağını belə tərpətməyib. Simonyan isə rusları sanki mismarla divara vuraraq deyib: “Yaxşı, siz haradasınız? Niyə iştirak etmirsiz? Əgər bacarmırsınızsa, o zaman bunu ictimaiyyətə açıqlamalısınız”. Bravo, spiker! Mənim yaddaşımda bu, Ermənistanın məsul şəxslərinin son dövrlərdəki ən güclü çıxışıdır. O, Moskvanın maskasını qopardı, Ermənistana qarşı ikiüzlüyünü, xain siyasətini nümayiş etdirdi. Diplomatik müstəvidə şəxsiləşmədən və təhqir etmədən daha yaxşı söz demək mümkün deyildi. Mən inanmaq istərdim ki, Moskvada Simonyanın dediklərini nəzərə alacaqlar. Və Lavrovun Bakı səyahətindən daha bir an, sadəcə olaraq, cavabsız qala bilməz. Orada o, Aİ-nin guya Ermənistandan Rusiyanı regionumuzdan sıxışdırmaq üçün bir alət kimi istifadə etməsi və İrəvanın Qərb oyununun qaydalarını qəbul etməsi ilə bağlı nəsə danışdı. Cənab nazir Rusiyanın əhəmiyyətini açıq şəkildə yüksək qiymətləndirir. Bəli, İrəvan burada heç bir oyun oynamır. Çox sadədir - Ermənistan anti-Rusiya koalisiyasına qoşulmayıb və Qərblə Rusiya arasında toqquşma platformasına çevrilmək niyyətində deyil. Biz sadəcə özümüzü və ölkəmizi qorumaq istəyirik. Bunu kiminlə - Aİ, ABŞ, Hindistan, Rusiya və ya Çinlə edəcəyik, qətiyyən əhəmiyyət daşımır. Biz yalnız öz təhlükəsizliyimizlə bağlı məsələləri həll edirik və burada kiminsə nədənsə inciməsi vecimizə deyil”.
Nahid SALAYEV
