Ermənistan parlamentinin spikeri Alen Simonyan bildirib ki, Beynəlxalq Məhkəmə tərəfindən Azərbaycana Laçın yolu ilə insanların, nəqliyyat vasitələrinin və yüklərin maneəsiz hərəkətini təmin etmək tapşırılıb. O qeyd edib ki, beynəlxalq müstəvidə Ermənistan kifayət qədər böyük uğurlar əldə edib:
“Mənim qiymətləndirməmə görə, Laçın dəhlizinin bağlanması Ermənistan və “Artsaxa” nisbətən Azərbaycana siyasi baxımdan daha çox ziyan vurub. Bəli, əziyyət çəkmişik, bəli, bizim üçün çətindir, bəli, problemlərimiz var, amma siyasi baxımdan Azərbaycan çıxılmaz vəziyyətdədir”.
Beynəlxalq Məhkəmədə Laçın yolu ilə bağlı Azərbaycanın mövqeyi haqlı sayıldığı halda, erməni spiker ölkəsinin siyasi “qələbəsi”, bizim isə məğlubiyyətimizdən danışır. Bunu becə anlamaq olar?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Ermənistanın siyasi rəhbərliyi özünün ağır durumunu pərdələmək niyyəti ilə çalışır ki, guya Azərbaycanın gerilədiyini, Azərbaycanın vəziyyətinin ağır olduğunu təlqin etsin: “Əlbəttə ki, bu belə deyil. Vəziyyət göz önündədir və biz görürük ki, Ermənistanın siyasi rəhbərliyinin manevr imkanları demək olar sıfıra enib, heç nə edə bilmirlər. Beynəlxalq Məhkəmə tövsiyəverici fikirlər önə sürür, ancaq bunu siyasi qələbə saymaq olmaz. Tutaq ki, Beynəlxalq Məhkəmə Azərbaycana tövsiyə edib ki, Azərbaycan yolu açıq saxlasın. Bəs sonrası? Birincisi, bütün beynəlxalq təsisatların qərarlarını digər aktorlar yerinə yetirirlərmi? Bütün işğalçılar geri çəkilirmi? Bütün dünyanın siyasi elitası beylxalq hüquq və qanunlara hörmətlə, izzətlə yanaşırmı? Əlbəttə, yox. Mən deyərdim ki, biz bu cəhətdən həqiqətən də çox nizam - intizam nümayiş etdiririk. Təsadüfi deyil ki, biz hərbi kampaniya ərzində 44 gün sonra beynəlxalq hüququn tələblərini bölgəmizdə yenidən qüvvəyə mindirdik. Heç bir dövlətin ərazi bütövlüyünə bizim pis niyyətlə baxışımız yoxdur, o niyyətlə hərəkət etmirik. Ermənistan bu sarıdan isə böyük uğursuzluqlar əldə edib. Mən deyərdim ki, bölgədə ən uğursuz və ən təhlükə kəsb edən yarımsubyektə çevrilib. Ümumiyyətlə subyektivliyini itirməkdədir və bu prosesdə davamlı şəkildə elə hərəkətlərə yol verir ki, artıq dünya birliyi qarşısında onun heç bir nüfuzu qalmayıb. Ona görə də, birincisi, Azərbaycan dövləti öz vəzifələrini gözəl anlayır, layiqincə yerinə yetirir. Digər tərəfdən, bu dəhlizlə bağlı proses bizim daxili ərazimizdir. Biz nə istəsək, nəyi lazım bilsək onu əldə edəcəyik. Düzdür, burda hazırda Rusiyanın sülhməramlı deyilən bir kontingenti var. Onlar da ikibaşlı oyun oynayırlar. Gah ermənilərə rəvac verirlər, gah onların şıltaqlıqlarına göz yumurlar”.
Ekspert deyir ki, ancaq bu daim davam edə biləcək bir məsələ deyil.: “Onsuz da bunun bir sonu var və biz tez bir zamanda o sonu görəcəyik. Ona görə də, Simonyanın, Nikol Pasinyanın mətbuata açıqlamalarının kökündə duran niyyət var. Onlar demək istəyirlər ki, bizi qınamayın, biz yaxşı fəaliyyət göstərdik və beynəlxalq təşkilatlar da bizə dəstək verir. Bəli, ola bilsin ki, hər hansı bir konteksdə dəstək alınır. Ancaq bu o demək deyil ki, Ermənistanın siyasəti uğurlu siyasətdir. Ermənistanın siyasəti cığal, şikayətçi siyasətdir. O heç vaxt böyük uğur qazana bilməyəcək və heç vaxt da nüfuz sahibi olmayacaq. Deyərdim ki, qoy daxili auditoriya üçün hansı imperativləri varsa, onları səsləndirsinlər, onlarla camaatın başının altına yastıq qoysunlar. Ermənistan xalqına lazım olan sabitlikdir, təhlükəsizlikdir və rifahdır. Ancaq bunların hamısı da böyük sual altındadır”.
Məhəmmədəli QƏRİBLİ
