ABŞ Sərhəd və Gömrük Xidmətinin (CBP) nümayəndələri Ermənistana səfər ediblər. ABŞ-ın Ermənistandakı səfirliyindən verilən məlumata görə, ötən həftə baş tutan səfər zamanı sərhədin mühafizəsi sahəsində əməkdaşlıq imkanları müzakirə olunub.
CBP nümayəndələri Ermənistanın Dövlət Gəlirləri Komitəsinin sədri (gömrük nəzarətinə cavabdeh) Rüstəm Badasyan, eləcə də digər rəsmi şəxslərlə görüşüb, Zvartnots Beynəlxalq Hava Limanının və Ermənistan-Gürcüstan sərhədindəki Baqrataşen keçid məntəqəsinin işi ilə tanış olub, həmçinin Yerasx kəndi yaxınlığındakı Naxçıvanla sərhəddə olub.
ABŞ sərhədçilərini Naxçıvanla sərhədə baş çəkməyə hansı maraq vadar edə bilər?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, son bir neçə ildir Ermənistan Qərb və ABŞ-la münasibətlərini daha da dərinləşdirib: “Bu da bölgədə gərginliyə yol açır. Biz yaxşı bilirik ki, Ermənistan tarix boyu Rusiyanın müttəfiqi olub. Daha dəqiq desək, Rusiyanın bir quberniyası olub. Buna görə də, bütün fəaliyyətini Rusiya ilə razılaşdırılmış şəkildə həyata keçirib. Son illərdə isə Ermənistan regiona ABŞ-ı gətirməyə cəhd edir və Rusiya buna açıq mətnlə etiraz göstərir. Rusiyanın rəsmi şəxslərinin Ermənistana yönəlik sərt bəyanatlarını görürük. Proses belə davam edərsə, bölgədə daha böyük qarşıdurmalar baş verəcək. Bu gərginlik ocağı daha qlobal təhlükəyə çevrilir. ABŞ sərhəd bölmələrinin Ermənistanda monitorinq keçirməsi də prosesin tərkib hissəsidir. Artıq rəsmi İrəvan öz mövqeyini konkretləşdirib. Bilirsiniz ki, Ermənistanın bütün sərhədlərini rus hərbçiləri qoruyur. ABŞ sərhədçilərinin monitorinqi bir növ təhvil-təslim prosesinə bənzəyir. Bununla demək istəyirlər ki, tezliklə Ermənistanın sərhədlərini ruslar qorumayacaq. Naxçıvanla sərhəd həm də Ermənistanın Rusiya ilə sərhədinə yaxındır. Bu yer təsadüfən seçilməyib. Rusiyanın mövqeyini möhkəmlətməklə bağlı ciddi addımlar üçün tələsmir. Çünki Ukrayna cəbhəsində savaş apardığına görə, Ermənistanla problemlərin həllinə az zaman ayırır. Ermənistan ərazisində həm də Rusiyanın hərbi bazaları mövcuddur. Bu da onu deməyə əsas verir ki, Ermənistan asanlıqla Rusiyanın orbitindən çıxa bilməyəcək. Gərginlik artarsa, bu, Ermənistan dövlət sisteminin məhvinə də gətirib çıxara bilər. Rusiya üçün Ermənistanda hərbi çevriliş etmək olduqca asandır. Sadəcə, bunun üçün uyğun zamanı gözləyir. Bizim önümüzdə Gürcüstan və Saakaşvili nümunəsi var. Paşinyan bundan özü üçün dərs çıxarmalıdır. Rusiya gpstərilən demarşın sonu müharibə ilə nəticələnə bilər”.
Görünür, Azərbaycanla müharibədə Rusiyanın onlara daha fəal dəstək göstərməməsindən məyus oldular. Bundan sonra Ermənistanda bir çoxları emosionallıq göstərir və öz geostrateji imkanlarını şişirdərək Qərblə yaxınlaşmağa çağırırlar. Lakin ermənilər üçün Rusiya ilə vidalaşmaq sadəcə mümkün deyil. Rusiya və onun strukturları Ermənistan iqtisadiyyatında çox böyük paya malikdirlər. Bu, istər nəqliyyat, istərsə də energetika sahəsində belədir. Bundan başqa, biz bilirik ki, rus sərhədçiləri öz postlarını xoşluqla təhvil verməzlər. ABŞ buna cəhd etməklə, həm də Rusiyanın diqqətini Ukraynadan yayındırmağa çalışır. Sanki Ermənistan üzərindən Rusiyaya qarşı ikinci cəbhənin açılmasına cəhdlər göstərilir.
Məhəmmədəli QƏRİBLİ
