Rusiya XİN başçısı Sergey Lavrovun Bakıda keçirdiyi mətbuat konfransında səsləndirdiyi bəzi fikirlər Ermənistanı qane etməyib. Xüsusilə də Lavrovun Bakıdan İrəvana ünvanlanmış “Avropa İttifaqı missiyasını bölgəyə gətirməklə yanlışlığa yol verirsiniz” fikrinə dərhal etiraz bildirilib.
Ermənistanın parlament sədri Alen Simonyan ona bu şəkildə cavab verib: “Moskva digər ölkələrin Ermənistan-Azərbaycan münasibətlərini normallaşdırmaq təşəbbüslərinə həddən artıq emosional və əsəbi reaksiya verir”. Simonyan bununla Lavrova “bizim işimizə qarışmayın” kimi mesaj vermək istəyib, yoxsa…
Siyasi şərhçi Sahil Kərimli “Bakı-Xəbər”ə bildirdi ki, Rusiya xarici işlər naziri Sergey Lavrovun Bakıda İrəvan əleyhinə səsləndirdiyi sərt fikirlərə Ermənistan siyasi dairələri tərəfindən ciddi etirazlar sərgilənməkdədir: “Görünən odur ki, Rusiya dövləti artıq Ermənistana qarşı açıq mövqe ortaya qoyur. Artıq sirr deyil ki, Ermənistan bölgəyə Avropa İttifaqı missiyasını gətirməklə öz müttəfiqi Rusiyanın maraqlarına qarşı çıxır. Düşünürəm ki, Rusiya bunun hesabını Ermənistandan bu və digər şəkildə soracaq. Moskvanın İrəvana qarşı cəza tədbirləri qaçılmaz olacaq. Ermənistan parlamenti sədrinin Lavrovun fikirlərinə dərhal etiraz bildirməsi ondan xəbər verir ki, İrəvan artıq Rusiyaya itaətsizlik edir, Avropaya üz tutduğunu gizlətmir. Bu isə olduqca təhlükəli gedişlərdir. Avropa İttifaqı missiyasının bölgəyə yerləşdirilməsi təkcə Rusiya üçün deyil, Azərbaycan dövləti üçün də qəbuledilməzdir. Məlumdur, Rusiya bunu Ermənistanın ona xəyanəti kimi qəbul edir. Azərbaycan isə öz milli və dövlət maraqlarına zidd addım kimi qiymətləndirir. Ən əsası isə, avropalı müşahidəçilərin gəlişi bölgədə sabitliyə yox, sülhə və təhlükəsizliyə birbaşa zərbədir. Çünki müşahidəçi adı altında, əslində isə məkrli planlarla gələn avropalıların planı bölgədə qarşıdurma yaratmaqdır. Onların gəlişindən bir gün sonra Ermənistan ordsunun və Qarabağdakı qanunsuz silahlı dəstələrin Azərbaycan mövqelərini atəşə tutması buna sübutdur. Ermənistan hərbi siyasi rəhbərliyi anlamalıdır ki, növbəti hərbi təxribat törədilərsə, onları nə Rusiya, nə Fransa, nə də başqa bir Avropa ölkəsi xilas edə biləcək”.
Vəziyyətin bu həddə çatması deməyə əsas verir ki, Moskva ilə İrəvanın münasibətlərindəki gərginlik davam edəcək. Bir-birinə qarşı artıq diplomatlar səviyyəsində aqressiya nümayiş etdirən hər iki tərəf arasında bundan sonra siyasi əlaqələrin normal qalacağı ehtimalları hər gün azalır.
Belə bir vəziyyətdən biz maksimum öz xeyrimizə istifadə etməliyik. Rusiya sülhməramlı kontingenti hələ qarşıdakı 2 il ərzində Qarabağın dağlıq hissəsində fəaliyyətlərini davam etdirəcəklər, o zaman həmin ərazilərdə bir çox məsələləri Bakının istədiyi şəkildə həll etmək üçün münbit şərait ortaya çıxa bilər. Nikol Paşinyanın və komandasının apardığı siyasət Moskvanın Cənubi Qafqazda istəklərinə, maraqlarına maneə törədir, Rusiyanın Ermənistanda təsir imkanlarını zəiflədir, Qərbin isə bölgəyə təsir imkanlarını genişləndirir.
Məhəmmədəli QƏRİBLİ
