Ermənistan xarici işlər naziri Ararat Mirzoyan Cenevrədə İranın xarici işlər naziri Hüseyn Əmir Abdullahian ilə görüşüb.
Ermənistan və İran xarici işlər nazirləri ikitərəfli formatda, eləcə də çoxtərəfli platformalarda əməkdaşlıq məsələlərini müzakirə ediblər. Qarşılıqlı maraq doğuran sahələrdə, o cümlədən enerji, nəqliyyat və infrastruktur sahələrində əməkdaşlığın daha da inkişaf etdirilməsi üçün birgə səylərin vacibliyi vurğulanıb.
Ararat Mirzoyan Laçın dəhlizinin "blokadası" ilə bağlı Abdollahiana Azərbaycandan şikayət də etməyi unutmayıb. Mirzoyan 9 noyabr 2020-ci il tarixli üçtərəfli bəyanatın müddəalarına uyğun olaraq, Dağlıq Qarabağın blokadasının ilkin şərt olmadan dərhal aradan qaldırılmasının zəruriliyini vurğulayıb. Bu kontekstdə fevralın 22-də Beynəlxalq Ədalət Məhkəməsinin Azərbaycana qarşı müvəqqəti tədbirlərin tətbiqi ilə bağlı qəbul etdiyi qərarın icrası da vurğulanıb.
Aydın məsələdir ki, Ermənistanın Laçın yolu ətrafında baş verənlərə Ermənistanı ortaq etməyə cəhd etməsi yaxşı heç nə vəd etmir. O mənada ki, İkinci Qarabağ müharibəsindən sonra Ermənistanın sərgilədiyi destruktiv mövqe ortadadır. Bütün hallarda İran delimitasiya və sülh müqaviləsinə qarşı hansı pozucu rolu oynayır?
“Tehran istəyir ki, Azərbaycan Laçın yoluna nəzarət edə bilməsin və bu onların da işinə yarayır”
Məsələyə münasibət bildirən hərbi ekspert Ramil Məmmədlinin fikrincə, istənilən halda, Ermənistanın İranla bu yöndə müzakirələri proseslərə zərər vuracaq: “Ona görə ki, Tehran Azərbaycan-Ermənistan münasibətlərinin düzəlməsində maraqlı deyil. O üzdən, molla rejimi bununla bağlı nə mümkündürsə onu edir. İran 44 günlük Vətən müharibəsində Azərbaycanın qələbəsini önləmək üçün müxtəlif vasitələrə əl atdı. Ancaq bunun qarşısını ala bilmədi. Daha sonra məğlub Ermənistanda revanşist əhval-ruhiyəni körükləməkdən ötrü sistematik pozucu mövqedən çıxış etdi. Arazboyu ərazilərdə hərbi təlimlər keçirdi. Ancaq nədənsə, ərazilərimiz işğal altında olanda İranın yadına təlimlər düşmədi. İran beynəlxalq hüquqa zidd olaraq Laçın yolu ilə Qarabağa qanunsuz yüklərin daşınmasını təşkil etdi. Söhbət İran nömrəli avtomobillərin qanunsuz olaraq Xankəndiyə yanacaq və digər məhsullar daşımasından gedir. Tehran rejimi açıq şəkildə Zəngəzur dəhlizinə qarşı mövqe ortaya qoyur və iddia edir ki, guya bu, İranın Ermənistanla sərhədinin bağlanmasına gətirib çıxaracaq. Halbuki, bu tamamilə absurd yanaşmadır. Hansısa zərurət olmadığı halda İran Qafanda konsulluq açdı. Konsulluq o ölkələrdə açılır ki, orada buna zərurət olur. Məgər, Qafanda və ya Zəngəzurda farslar yaşayır? Təbii ki, yox. Belə olan halda buna nə zərurət var idi? Məsələ ondadır ki, İran Azərbaycan-Ermənistan münasibətlərinin daim gərgin qalmasında maraqlıdır. O cümlədən, İran Qarabağdan sərvətlərimizin qanunsuz olaraq talan edilməsində maraqlıdır. Tehran istəyir ki, Azərbaycan Laçın yoluna nəzarət edə bilməsin. Çünki bu onların da işinə yarayır”.
Vidadi ORDAHALLI
