Ermənistan parlamentinin mətbuat xidməti xəbər verir ki, Milli Assambleyanın sədri Alen Simonyan ABŞ-ın Ermənistana yeni təyin olunmuş səfiri Kristina Kuinni qəbul edib.
Parlamentin sədri fövqəladə və səlahiyyətli səfiri təbrik edərək, onun fəaliyyəti dövründə Ermənistan-Amerika əlaqələrinin bundan sonra da inkişaf edəcəyinə və genişlənəcəyinə əminliyini ifadə edib. Parlamentin sədri qeyd edib ki, ABŞ Ermənistanın siyasi və iqtisadi həyatında əsas yer tutur, erməni-amerikan dialoqu strateji xarakter daşıyır. Alen Simonyan ölkəsində demokratiyanın inkişafına və möhkəmlənməsinə töhfə verən sistemli islahatlara ABŞ-ın yardımının vacibliyini vurğulayıb.
Göründüyü kimi, Ermənistan özünün daxilindəki ictimai-siyasi proseslərdəki fəal mövqeyi Rusiyadan imtina edərək ABŞ-a verməyə hazırlaşdığını rəsmi səviyyədə bəyan edir.
Politoloq Rəşad Bayramov “Bakı-Xəbər”ə açıqlamasında bildirdi ki, Nikol Paşinyan hakimiyyətə gələndən sonra Ermənistanın xarici və daxili siyasətində müəyyən dəyişikliklərin baş verdiyini müşahidə etmək mümkündür: “Xüsusilə də Ermənistanın Avropa Birliyi və ABŞ-la münasibətlərini inkişaf etdirməyə cəhdlər etdiyini görürük. Ancaq bunu da qəbul etməliyik ki, müstəqilliyini elan edəndən sonra Rusiya həmin ölkənin təhlükəsizliyinin təminatında əvəzedilməz rol oynayır. Nikol Paşinyan nə qədər də özünü Qərbpərəst kimi göstərməyə çalışsa da, ölkənin son 30 il ərzində qəlibləşmiş xarici siyasətini və təhlükəsizlik anlayışını dəyişməyə gücü yetmir. Paşinyan gözəl bilir ki, proses olduqca çətindir. Hətta bu istiqamətdə edilə biləcək ciddi manevr onun hakimiyyətdən getməsi ilə nəticələnə bilər. Ona görə də Paşinyan bu yeniliyi Rusiya ilə münasibətlərə kölgə salmamaq şərtinə uyğun olaraq, ehtiyatla həyata keçirir. Bu xüsusda Ermənistan parlamentinin sədrinin verdiyi bəyanatı qeyd edə bilərik.
ABŞ-ın Ermənistandakı bundan əvvəlki səfiri maraqlı açıqlama verdi. O qeyd etdi ki, Ermənistan tarixi olaraq Rusiya ilə bağlı olsa da, gələcəyi Qərb və ABŞ-la əlaqəlidir. Belə çıxır ki, həm ABŞ, həm də parlamentin sədri Ermənistanın Rusiyaya daha çox bağlı olduğunu etiraf edir və İrəvanın meyllənmə işartıları özünü göstərir. Ermənistan hazırda Rusiyadan çox asılı olduğu üçün, prosesi yavaş-yavaş aparmağa çalışır. Çünki Rusiyanın bölgədəki mövcudluğu Ermənistanda özünü daha ciddi büruzə verir. Həmin ölkədə Rusiyanın hərbi bazaları mövcuddur. Bundan başqa, Ermənistan KTMT-nin üzvüdür. Düzdür, həmin qurumla aralarında ciddi problemlər olsa da, İrəvan yaxın illərdə həmin qurumu tərk etməyi planlamır. Bu baxımdan da Ermənistan, Rusiyaya bağlı və ondan asılı olmasına rəğmən, Qərb dünyası və ABŞ-la təmaslarını davam etdirməyə çox maraqlıdır. Hələlik ciddi bir qırılma nöqtəsi olmasa da, gələcək üçün belə niyyətin olduğu özünü göstərir. Ermənistanın iqtisadiyyatı da tam olaraq Rusiyanın əlindədir. Təbiidir ki, Ermənistanın bu cür demarşlarına Rusiya səssiz qalmayacaq və Ermənistanı yoluna qaytarmaq üçün bütün təzyiq vasitələrindən istifadə edəcək”.
Xatırladaq ki, ABŞ-ın ən böyük səfirliyi Ermənistanda yerləşir. Digər tərəfdən, ABŞ, Fransa və bəzi Avropa dövlətlərində ermənilərin ciddi diasporları var. Ermənistan bu diasporların üzərindən həmişə Qərblə əlaqədədir. Amma bilmək lazımdır ki, Ermənistanın Ukrayna kimi Qərblə sərhədi yoxdur, ondan uzaqdır, əslində, Rusiyaya daha yaxındır. Rusiyanın Ermənistana təsir mexanizmi Qərbdən daha çoxdur.
Əlbəttə, Qərb dövlətləri Ermənistandan faydalanmağa çalışırlar. Ermənistanın birdən-birə Qərbə və ABŞ-a doğru dönməsi və özünü bu çərçivəyə salması çətindir. Onu da unutmayaq ki, Qərb və ABŞ bu gün Ukraynanı qoruya bilmir, Ermənistanı necə qoruyacaq?!
Məhəmmədəli QƏRİBLİ
