Rusiya sülhməramlı qüvvələri komandanlığının bilavasitə iştirakı ilə Qarabağın erməni icması ilə Azərbaycan nümayəndələrinin görüşü keçirilib.
Bu barədə məlumatı Qarabağın dağlıq hissəsində müvəqqəti yerləşdirilmiş Rusiya sülhməramlı qüvvələrinin komandanlığı verib.
Məlumatda qeyd olunur ki, görüş zamanı Qarabağdakı istehlakçıların elektrik enerjisi və qaz təchizatının bərpası ilə bağlı razılıq əldə olunub. O da qeyd edilir ki, Rusiya sülhməramlı qüvvələrinin komandanlığı Laçın dəhlizi ilə avtomobil nəqliyyatının maneəsiz hərəkətinin bərpası ilə bağlı danışıqları davam etdirir.
Məlumat üçün qeyd edək ki, ötən ilin yayında Sərsəng su anbarı ilə bağlı tərəflər arasında təmaslar olub. Belə ki, “Azərbaycan Meliorasiya və Su Təsərrüfatı” ASC-nin nümayəndələri yerli mütəxəssislərin iştirakı ilə Qarabağ iqtisadi rayonunda yerləşən Sərsəng su anbarına baxış keçirib. Ancaq sentyabrda Ruben Vardanyan Qarabağa gələndən sonra bu kimi təmaslar tamamilə kəsildi. O baxımdan, Vardanyan “dövlət naziri” vəzifəsindən uzaqlaşdırılandan sonra artıq bunu təmasların başlanğıcı saymaq olarmı?
“Vardanyanın separatçı qurumda tutduğu “vəzifədən” uzaqlaşdırılması bu baxımdan uğurlu gözləntilər vəd edir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, bu kimi təmaslar müsbət haldır: “Əvvəla, 2016-cı ilin yanvarında Avropa Şurası Parlament Assambleyası (AŞPA) Sərsəng su anbarı ilə bağlı 2035 saylı qətnamə qəbul etdi. Layihənin də müəllifi millət vəkili Elxan Süleymanov idi. Həmin qətnamənin ikinci maddəsində göstərilmişdi ki, Dağlıq Qarabağ və digər işğal olunmuş ərazilərdən Ermənistan silahlı qüvvələri təcili çıxarılmalıdır. Ancaq BMT-nin 4 qətnaməsi kimi, AŞPA-nın bu qətnaməsi də kağız üzərində qaldı. Vətən müharibəsi zamanı ordumuz Suqovuşanı azad edəndə AVCİYA gözləyirdi ki, Sərsəng su anbarı da azad olunacaq. Ancaq əfsuslar olsun ki, Rusiya buna imkan vermədi. Deməyim odur ki, Sərsəng Azərbaycan üçün çox strateji obyektdir. Bu su anbarında təxribat yox, adi bir aşınmadan qəza baş verərsə, Azərbaycanın 6 rayonu su altında qalar. Bütün hallarda, Qarabağ erməniləri ilə təmasların qurulması müsbət haldır. Ən azından ona görə ki, biz Qarabağdakı etnik erməniləri ölkə vətəndaşı hesab ediriksə, onlarla təmasları qurmalıyıq. Mərhələli şəkildə onların ölkəmizə inteqrasiyasını təmin etməliyik. Vardanyan Qarabağ erməniləri ilə hər hansı təmasların qurulmasını pozan fiqur idi. Məhz bu məqsədlə o, Xankəndiyə göndərilmişdi. Çünki təmasların qurulması son nəticədə Qarabağda separatizmə son qoyulması anlamına gəlir. Bu da separatçıları himayə edən müəyyən beynəlxalq dairələrə sərf etmir. Ona görə ki, bəzi dövlətlər, əsasən də Rusiya Qarabağ separatçılarından Azərbaycan və Ermənistana qarşı bir təzyiq vasitəsi kimi istifadə edir. Uzun illərdir biz bunu müşahidə edirik. Belə olmasaydı, o zaman erməni separatçıları uzun illər Azərbaycanın qarşısında duruş gətirə bilməzdilər. Vardanyanın separatçı qurumda tutduğu “vəzifədən” uzaqlaşdırılması bu baxımdan uğurlu gözləntilər vəd edir”.
Bir sözlə, professor hesab edir ki, Azərbaycan bu istiqamətdə səylərini artırmalıdır.
Vidadi ORDAHALLI
