Xəbər verildiyi kimi, Qarabağda separatçı rejimin “dövlət naziri” kimi təqdim olunan Ruben Vardanyan fevralın 23-də tutduğu vəzifədən azad edilib. 2022-ci il sentyabrın 1-də Ruben Vardanyan Rusiya vətəndaşlığından çıxmaq üçün müraciət etdiyini, Qarabağa köçdüyünü açıqlayıb, işğalçı rejimin təhlükəsizliyi və inkişafı üzrə cəbhə yaradıldığını vurğulayıb, noyabrın 4-də “dövlət naziri” təyin olunub, dekabrın 22-də Rusiya vətəndaşlığından çıxarılıb.
Vəzifəsindən çıxarılandan sonra Vardanyan bəyan edib ki, vəzifədən getsə də Qarabağda qalır: “Bilirəm ki, mənim “Artsaxda” olmağımla bağlı təzyiqlər var, lakin qeyd edirəm ki, mən harasa getməyə hazırlaşmıram. Mən burada işləyəcəyəm. Həqiqətən də müxtəlif yanaşmalarda ziddiyyətlərimiz var, ancaq buna baxmayaraq, bizdə heç kimin keçməməli olduğu “qırmızı xətlər” mövcuddur. Bu baxımdan hansısa vəzifəni qəbul etmək və ya təhvil vermək, ola bilsin, asandır. Biz müharibə şəraitindəyik və bu istiqamətdə mübarizə aparmalıyıq. Hesab edirəm ki, mənim mübarizəm hansısa formada bu çətinlikləri birgə keçməyimizə yardım etdi. Biz səylərimizi davam etdirəcəyik və böyük iş görəcəyik ki, mümkün qədər çox erməni Qarabağa gəlsin”.
Nəzərə almaq lazımdır ki, Azərbaycan təkcə Vardanyanın vəzifədən getməsini qaldırmırdı. Söhbət həm də ondan gedir ki, Vardanyan ümumiyyətlə Qarabağdan çıxıb getsin. Çünki o gələndən Qarabağda pozuculuqla məşğuldur, yerli ermənilərlə təmasların qarşısını alır və s. O gələndən sonra Qarabağda təbii ehtiyatların talanması sürətlənib. Ona məxsus olan şirkətlər bu işdə fəal iştirak edirlər. Ona görə də Azərbaycanın tələbi təkcə onun vəzifədən yox, bütövlükdə Qatabağdan çıxıb getməsidir. Çünki o, Qarabağda qalsa yenə pozuculuqla məşğul olacaq, yerli ermənilərlə dialoqa mane olacaq və s.
“Əlində səlahiyyət olmasa belə, əlində olan kifayət qədər maliyyə imkanları vasitəsilə orada...”
Məsələyə münasibət bildirən AMİP-in sədr müavini Afsəddin Nəbiyev də hesab edir ki,Vardanyan Qarabağdan çıxmalıdır: “Hər birimizə məlumdur ki, Ruben Vardanyan rəsmi Kremlin Azərbaycana və Ermənistana "təzyiq aləti" olaraq göndərdiyi bir fiqurdur. Rəsmi Moskva Vardanyan üzərindən bu bölgədə varlığını qoruyub saxlamaq üçün bir çox "planlar" hazırlayıb. Son aylar Azərbaycanın yaratdığı reallıqlar Vardanyan üzərindən qurulan hiyləgər planların bir qismini üzə çıxardı. Ancaq bu hələ hamısı deyil. Məlumdur ki, Rusiya Vardanyanın Qarabağda reytinqini artırıb, həm də Qərbin proyekti Paşinyanı hakimiyyətdən uzaqlaşdırmağı düşünürdü. Görünən odur ki, bu siyasi gediş alınmadı. Paşinyan məsələnin mahiyyətini dərk etdikdən sonra Vardanyanı siyasi cəhətdən neytrallaşdırmağı bacardı. Paşinyanın bu addımına görə Kreml Vardanyanı yenidən təlimatlandıraraq Qarabağa qaytardı. Düşünürəm ki, Vardanyan bütün bunlardan sonra Qarabağa yenidən dönüş etməklə pozuculuq fəaliyyətini davam etdirəcək, Rusiyanın ona verilən təlimatlarını icra edəcək. Əlində səlahiyyət olmasa belə, əlində olan kifayət qədər maliyyə imkanları vasitəsilə orada yaşayan erməniləri ələ almağa çalışacaq. Bu hələlik Moskvanın Vardanyana verdiyi təlimatın bir hissəsidir. Görünən odur ki, rəsmi Moskva Ermənistanı hər vəchlə əldə saxlamaq məqsədini Qarabağdakı emissarının əli ilə həyata keçirməyi düşünür. Azərbaycan dövləti Rusiya ilə bu məsələdə açıq şəkildə danışaraq Vardanyanı Qarabağdan uzaqlaşdırmalıdır. Azərbaycanın beynəlxalq hüquq tərəfindən tanınmış ərazilərində nizam-intizamı Azərbaycan dövləti həyata keçirməlidir. Azərbaycan ərazisinə "Vardanyanların" icazəsiz daxil olmaması üçün təcili Laçın yolunda dövlətimiz gömrük postu, eyni zamanda Nəzarət Buraxılış Məntəqəsi qurmalıdır.Bundan sonra Qarabağda nizam - intizamı bərpa edə bilərik”.
Vidadi ORDAHALLI
