Ermənistan Respublika Partiyasının sədr müavini Armen Aşotyan Feysbuk səhifəsində “Sülh danışıqlarının başlanmasının elementləri” adlı sənəd paylaşıb. Onun yazısında qeyd edilir ki, sülh müqaviləsində Ermənistan ictimaiyyəti üçün ən gözlənilməz bənd Qarabağ ermənilərinin hüquqları və təhlükəsizliyinə dair məsələ oldu. Bu faktorlar birbaşa Azərbaycan konstitusiyası ilə bağlı olacaq:
“Paşinyan Qarabağı tam şəkildə təslim etmək istəyir. Sülh mətnində iki ölkənin bir-birinin ərazi bütövlüyünü tanıması, Azərbaycanın konstitusiyasına, beynəlxalq öhdəliklərinə uyğun olaraq Qarabağ ermənilərinin hüquqları və təhlükəsizliyinə dair bənd var. İrəvan açıq bəyanatla çıxış edəcək ki, Qarabağ ermənilərinin təhlükəsizliyini və hüquqlarını təmin etmək üçün lazım olan hər şey danışıqlar başa çatana qədər edilməlidir. Bakı Qarabağ ermənilərinin hüquqları və təhlükəsizliyi ilə bağlı qarşılıqlı anlaşmanın təmin edilməsi üçün danışıqlara başlayacaq”.
Ermənistan cəmiyyətinin indidən sülh danışıqlarının detalları ilə bağlı belə narahatlıq keçirməsinin kökündə hansı amillər durur?
Siyasi şərhçi Sahil Kərimli “Bakı-Xəbər”ə bildirdi ki, Qarabağ məsələsi, orada yaşayan erməni əsilli vətəndaşlarımızın təhlükəsizliyi və hüquqlarının təmin edilməsi Azərbaycanın daxili işidir: “Bu məsələyə istər Ermənistanın, istərsə də havadarlarının qarışması, müxtəlif manipulyasiyaların edilməsi yolverilməzdir. Ermənistan siyasi dairələrinin son günlər səsləndirdiyi bəyanatlara gəldikdə isə, bu ucuz avantüradan başqa bir şey deyil. Ermənistanın siyasiləri bilməlidir ki, rəsmi İrəvan 44 günlük Vətən müharibəsi nəticəsində yalvararaq kapitulyasiya aktına imza atdığı andan Qarabağ məsələsinə nöqtə qoyulub. Yəni Ermənistanın Qarabağa, suveren Azərbaycan ərazisi olan Xankəndi və ətraf ərazilərə heç bir dəxli yoxdur. Xüsusilə də bu ərazilərdə yaşayan etnik ermənilərin taleyindən narahat olmasınlar. Çünki qüdrətli Azərbaycan dövləti öz vətəndaşlarının təhlükəsizliyinə ən yüksək səviyyədə qarant verir. Ölkəmizin istənilən yerində yaşayan, istənilən etnik azlıqların hüquqları, sosial rifahı dövlətimiz tərəfindən necə təmin edilirsə, Qarabağ ermənilərinin də vətəndaş hüquqları eyni səviyyədə qorunacaq. Buna heç kimin şübhəsi olmasın. Görünən odur ki, Ermənistandakı qüvvələr bu kimi yersiz və lüzumsuz çıxışlar etməklə vəziyyəti gərginləşdirməyə, sülh danışıqları prosesinə mane olmağa çalışır. Son günlər Avaropa İttifaqı səviyyəsində Ermənistana xüsusi missiyanın yerləşdirilməsi də bölgədə ciddi gərginlik yaradıb. Ermənistan avropalı nümayəndələrə güvənərək atəşkəsi pozub. Bütün bunlar sülhə və təhlükəsizliyə zərbədir”.
Təbiidir ki, Ermənistan cımiyyətində bu cür informasiyalarla ictimai rəyi öyrənməyə çalışırlar. Artıq bunlar keçərli deyil. Çünki Ermənistan bu mövzuda kifayət qədər manevrlər edib. Artıq dalana dirənmiş vəziyyətdədir. Anlayırlar ki, sülh sazişini imzalamasalar vəziyyət daha da gərginləşə bilər. Hətta Ermənistanın bir dövlət kimi var opması sual altına düşər. Ermənistan siyasiləri qəti təəccüblənməsinlər. Çünki ölkəmizin bütün ərazisində öz suverenliyini təmin etmək kimi hüququ var və biz bunsuz heç bir müqavilə imzalamarıq. Ermənistanın ictimai rəyi sülh istəməsəydi, müharibədə uduzan Paşinyanı yenidən baş nazir seçməzdi.
Məhəmmədəli QƏRİBLİ
