Ermənistanın baş naziri Nikol Paşinyan BMT-nin baş katibi Antonio Quterreşlə telefon danışığı aparıb. Tərəflər bir sıra məsələləri müzakirə ediblər.
Ermənistan hökumətinin yaydığı məlumata görə, Paşinyanla Quterreş arasında Qarabağa və Laçın dəhlizinə BMT-nin faktaraşdırıcı missiyasının göndərilməsi ilə bağlı məsələlər müzakirə olunub. Tərəflər arasında Laçın yolunda blokadanın aradan qaldırılmasının zəruriliyi qeyd edilib. BMT missiyasının göndərilməsi məsələsi ətrafında müzakirələrin davam etdirilməsi barədə razılıq əldə olunub. Quterreş qeyd edib ki, məsələni diqqət mərkəzində saxlamağa davam edəcək. Tərəflər, həmçinin, Ermənistan və Azərbaycan arasında münasibətlərin tənzimlənməsi, Dağlıq Qarabağ əhalisinin təhlükəsizliyi və hüquqlarının müdafiəsi məsələlərini də müzakirə ediblər.
Ermənistanın çağırışı ilə BMT-nin Laçın yoluna və Qarabağa faktaraşdırıcı missiya göndərməsinin müzakirə olunması nə məsələdir? Azərbaycan buna getməlidir, yoxsa getməməlidir? Burada nə planlaşdırılır?
“Azərbaycanın razılığı olmadan ora hansısa faktaraşdırıcı missiyanın göndərilməsi qeyri-mümkündür”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, təkcə Ermənistanın istəyi ilə bu məsələlər həll olunmur: “Əvvəla, Laçın yolu ətrafında baş verənlər oranın bloklanması demək deyil. Yol, erməni tərəfinin iddia etdiyi kimi, humanitar yüklər üçün bağlanmayıb. Bu, Azərbaycanın öz suveren ərazisində, öz suveren hüquqlarının bərpasına yönəlik bir siyasətdir. Bu yöndə görülən dinc tədbirlərdən biridir. Bu heç də blokada xarakteri daşımır. Aksiya orada keçə-keçə Qarabağa yüklər daşınır. Həmin yüklərin içində hərbi xarakterli məhsullar da var. Çünki aksiya keçirilsə də, həmin maşınlar yoxlanılmır. Hətta Vardanyanla Araiki kontrabanda yolu ilə aparıb-gətirirlər. Məgər blokada belə olur? Əlbəttə ki, yox. Sadəcə olaraq, Ermənistan çalışır ki, Azərbaycana qarşı təzyiq vasitəsi kimi bundan istifadə etsin. Ona görə də bütün beynəlxalq təşkilatlara müraciət edib şou yaradır. Beynəlxalq etika elədir ki, bu cür müraciətlərə baxılacağı ilə bağlı ümumi vəd verilir. O baxımdan hesab etmirəm ki, Laçın yolunda baş verənlər BMT-nin diqqət mərkəzində olacaq. BMT-nin ora faktaraşdırıcı missiya göndərəcəyini düşünmürəm. Çünki BMT-nin qayğıları, müzakirə olunası məsələlər həddən artıq çoxdur. Bir məsələni xüsusi olaraq nəzərə almaq lazımdır ki, istər Laçın yolu, istərsə də Qarabağ Azərbaycan ərazisidir. Azərbaycanın razılığı olmadan ora hansısa faktaraşdırıcı missiyanın göndərilməsi qeyri-mümkündür. Ermənistan bu kimi siyasi oyunlarla prosesi uzatmağa, öhdəliklərini yerinə yetirməkdən yayınmağa çalışır. Çünki Azərbaycanın daxili məsələsinə beynəlxalq qurumların cəlb olunması bizim ziyanımızadır. Biz bunu ötən 30 ildə gördük və aparılan danışıqlar heç bir nəticə vermədi. Ona görə də rəsmi Bakı əsla belə məsələlərə ortaq olmamalıdır”.
Vidadi ORDAHALLI
