Azərbaycan Xarici İşlər Nazirliyi İrqi Ayrı-Seçkiliyin Bütün Formalarının Ləğv Edilməsi haqqında beynəlxalq konvensiyanın tətbiqi ilə bağlı məhkəmə işlərində Beynəlxalq Ədalət Məhkəməsinin 22 fevral 2023-cü il tarixli qərarına münasibət bildirib:
“…Həmçinin Azərbaycan tərəfindən etirazların “təşkili və dəstəkləməsini dayandırması” və Qarabağa “təbii qaz və digər kommunal xidmətlərin verilməsini dərhal bərpa etməsi” iddiaları ilə bağlı Ermənistanın müvəqqəti tədbirlər tələblərinin Məhkəmə tərəfindən rədd edilməsini alqışlayırıq.
Məhkəmə öz qərarında Azərbaycanın səlahiyyətləri daxilində Laçın yolu boyunca təhlükəsiz hərəkəti təmin etmək üçün sərəncamında olan bütün addımları atdığı və atacağına dair, habelə 10 Noyabr 2020-ci il tarixli Üçtərəfli Bəyanatın şərtlərini yerinə yetirdiyi barədə Azərbaycanın səylərini nəzərə alıb”.
Göründüyü kimi, ermənilərin Laçın yolundakı vəziyyəti blokada kimi təqdim etməsi cəhdləri daha bir uğursuzluğa uğradı. Bu dəfə onları Beynəlxalq Məhkəmə məyus etdi.
Ermənilər beynəlxalq hüquq müstəvisindəki bu məğlubiyyətdən hansı nəticələri çıxarmalıdırlar?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın Laçın yolundakı vəziyyətdən öz xeyrinə istifadə etmək istəməsi cəhdi davam edir: “Biz belə cəhdləri Münhen görüşündə də gördük. Görüşdən sonra keçirilən plenar iclasda səslənən fikirlər də xüsusi diqqət çəkdi, xüsusilə müharibədən sonra regiondakı real vəziyyətin beynəlxalq ictimaiyyətə çatdırılması baxımından. Paşinyan Laçın yolundakı aksiyadan bəhs edərək, Qarabağdakı ermənilərin blokadaya düşdüyünü iddia etdi, Əliyev isə onun bu iddiasını faktlarla təkzib etdi. Ermənistan blokada iddiaları ilə Bakıya qarşı beynəlxalq təzyiqə nail olmaq istəyir, Münhen konfransına fürsətlərdən biri kimi baxırdılar, lakin Azərbaycan prezidenti beynəlxalq ictimaiyyət qarşısında bu iddiaların yalan olduğunu isbat etdi. Beləliklə, Ermənistan informasiya müharibəsində növbəti dəfə məğlub oldu”.
Politoloqun sözlərinə görə, Ermənistan bu istiqamətdə növbəti məğlubiyyətə beynəlxalq hüquq müstəvisində rast gəldi: “Beynəlxalq Ədalət Məhkəməsinin qərarı yerinə düşür. İddia ondan ibarət idi ki, bu aksiya saxtadır və iştirakçılar guya Azərbaycan hökuməti tərəfindən öyrədilmiş şəxslərdir. Bununla bağlı Ermənistan məhkəməyə müraciət edərək aksiyanın süni şəkildə təşkil olunmasının təsdiqini tapmaq istəyirdi. Biz isə həmin aksiyaların həqiqətən ekofəallar tərəfindən keçirildiyi, ekofəalların adları və foto-video sübutlar məhkəməyə təqdim etmişdik. Dünən açıqlanan qərarda məhkəmə Ermənistanın vəsatətini ləğv edib və aksiyanın Azərbaycan hökuməti tərəfindən təşkil olunması ilə bağlı fərziyyəni əsassız sayıb. Laçın yolundakı aksiyalar artıq dünyaya səs salıb. Aksiya iştirakçıları kifayət qədər mütəşəkkil şəkildə öz tələblərini dünyaya çatdırırlar. Biz bu aksiya ilə həm də Ermənistana deyirik ki, biz ekoloji terrora sakit yanaşa bilmərik. Beynəlxalq ictimaiyyət ermənilərə Azərbaycanın tələblərinin haqlı olduğunu başa salmağa çalışır. Amma bəzi xarici qüvvələr konstruktiv siyasət yeritmək üçün Ermənistana imkan vermir. Görünən budur ki, Azərbaycanın addımları beynəlxalq hüquq baxımından da doğru sayılıb. Gərək ki, Ermənistan bundan sonra öz “blokadanı” bəhanə edib, öz öhdəliklərindən yayınmasın. Beynəlxalq Məhkəmə qəbul etdiyi qərarlardan bu nəticəyə gəlirik ki, Ermənistanın yalanları artıq ifşa olunur”.
Mıhəmmədəli QƏRİBLİ
