Ləğv olunmuş Milli Təhlükəsizlik Nazirliyinin hazırda həbsdə olan sabiq şöbə rəisi Sahib Ələkbərov Bakı Apellyasiya Məhkəməsindəki çıxışı zamanı Baş Prokurorluğun keçmiş rəhbərliyinə bir sıra ittihamlar səsləndirib.
Sahib Ələkbərov deyib ki, onunla bərabər Zakir Qaralov və Rüstəm Usubov da cinayət məsuliyyətinə cəlb olunmalıdır.
Ələkbərov Prokurorluqda ona qarşı ittihamların arxasında qisasçılıq hissinin olduğunu deyib. Əlavə edib ki, baş prokurorun birinci müavini Rüstəm Usubov vaxtilə Hacı Məmmədov cinayətlərində ondan ifadə aldığı üçün ondan qisas alır.
Sahib Ələkbərovun müstəntiq kimi Rüstəm Usubovdan aldığı ifadədə olduqca maraqlı məqamlar var.
Rüstəm Usubov 13 mart 2002-ci ildə Respublika Baş Prokurorluğunun İstintaq idarəsinin Kriminalistika şöbəsinin rəisi Rövşən Əliyevin qətlə yetirilməsi ilə bağlı bildiklərini belə nəql edir: “Rəhbərlik tərəfindən həmin işin istinatıqının aparılması mənə həvalə edilmiş, Prokurorluq və əməkdaşlarından ibarət əməliyyat-istintaq qrupu yaradılmışdır. Həmin işin DİN-in istintaqı zamanı ortaya bir sıra fərziyələr çıxmış və həmin fərziyələrlə əlaqədar istintaq-əməliyyat tədbirləri həyata keçirilmişdir. 11 avqust 2003-cü ildə Prokurorluğun rəhbərliyi məni mərkəzi aparata dəvət etmiş və bildirmişlər ki, bir qadın məxfi olaraq Rövşən Əliyevin qətli və digər hadisələrlə bağlı məlumat vermək istəyir. Dəvət olunmuş otaqda prokurorluğun digər əməkdaşları da vardı. Həmin otaqda sonradan bildiyim 1970-ci il təvəllüdlü, Bakı şəhərində «Knauf» firmasında menecer vəzifəsində işləyən, boşanmış, bir uşaq anası, Fatmayı kəndindəki bağ evlərində müvəqqəti yaşayan Nəsibova Rəna Yusif qızıdır. Rǝna Nəsibova bildirdi ki, Bakı şəhərində törədilən bir çox cinayətlərin başında DİN-in əməkdaşı Hacı Məmmədov durur. Hacı Məmmədovun bir neçə cinayətkar dəstəsi vardır. Bir cinayətkar dəstənin üzvləri digər dəstənin üzvlərini tanımırlar…”
Maraqlıdır ki, bu qədər sübut və dəlillərin olmasına baxmayaraq, nə keçmiş MTN rəhbərliyi, nə də Sabiq baş prokuror və onun tabeçiliyində olan Rüstəm Usubov qanqsterlik edən Hacı Məmmədovla bağlı heç bir tədbir görməyib.
Buna görə həmin adamlar hüquqi məsuliyyət daşıyırlarmı?
Müvəkkil Hüquq Mərkəzinin sədri Səməd Vəkilov “Bakı-Xəbər”ə açıqlamasında bildirdi ki, Azərbaycan Respublikasının Cinayət Məcəlləsinin 307-ci maddəsində cinayət barəsində xəbər verməmə və qabaqcadan vəd etmədən cinayəti gizlətmə adlı cinayət nəzərdə tutulub: “Həmin maddəyə görə, ağır və ya xüsusilə ağır cinayətin hazırlanmasını və ya törədilməsini bilərək, cinayət barəsində xəbər verməmə 1500 manatdan 2500 manata kimi cərimə, iki ilə qədər islah işləri, ya da iki ilə qədər müddətə azadlıqdan məhrum etməylə cəzalandırılır. Həmçinin, qabaqcadan vəd etmədən ağır cinayəti gizlətmə 307-ci maddənin ikinci hissəsinə görə cərimə cəzasından başqa, həm də üç ilə qədər müddətə azadlıqdan məhrum etmə ilə cəzalandırılır. Qabaqcadan vəd etmədən ağır cinayəti gizlətmədə söhbət xüsusilə adam öldürülməsindən gedir. İki ildən beş ilə kimi azadlıqdan məhrum edilməylə cəzalandırılır. Burada yalnız istisna hal ondan ibarətdir ki, həmin maddənin qeyd hissəsində qeyd olunub ki, arvadı, əri, övladları, valideynləri və qanunvericiliklə qəbul edilmiş digər yaxın qohumlar tərəfindən hazırlanmış və törədilmiş cinayətin xəbər verilməməsi cinayət məsuliyyətindən kənarda qalır. Digər hallarda şəxsin borcu həmin cinayət barədə məlumat verməkdir. Sizin dediyiniz məsələ əgər istintaqda öz təsdiqini taparsa, qəsdən adam öldürmə cinayətini bilib, gizlədən şəxs cinayət məsuliyyətinə cəlb edilməlidir”.
Bu şərhdən belə qənaətə gəlmək olur ki, adlarını qeyd etdiyimiz şəxslər Cinayət Məcəlləsinin müvafiq maddəsi ilə məsuliyyətə cəlb edilməlidir. Çünki həmin vəzifəli şəxslərin Hacı Məmmədovla heç bir qohumluq əlaqəsi olmayıb ki, məsuliyyətdən azad olunma ilə bağlı qeyd onlara şamil olunsun. Bəs onda sual olunur: Hacı Məmmədovla bağlı bir çox mətləblər əvvəlcədən bəlli olsa da, niyə onunla bağlı heç bir hüquqi addım atılmayıb? Təbiidir ki, bütün bunların cavabı istintaqın gedişində bəlli ola bilər. Təəssüf ki, hələlik belə bir istintaq aparılmır. Zamanında alınmış izahatın üzə çıxması və oradakı detallar belə bir istintaqın aparılmasını zəruri edir. Çünki zamanında Rüstəm Usubov kimilər doğru addım atsaydı Hacı Məmmədovun qarşısı alınardı və o, silsilə cinayətləri törədə bilməzdi.
Məhəmmədəli QƏRİBLİ
