Prezident İlham Əliyevin Münhen Təhükəsizlik Konfransında Zəngəzur və Laçın dəhlizlərində nəzarət-buraxlış məntqələrinin yaradılması ilə bağlı bəyanatına Ermənistandan cavab gəlib. Belə ki, erməni tərəfi Laçın dəhlizində nəzarət-buraxlış məntqəsi yaradılmasına qarşı çıxıb.
Ermənistanın xarici işlər naziri Ararat Mirzoyan buna münasibət bildirərək bəyan edib ki, İrəvan Laçında nəzarət-buraxılış məntəqəsinin yaradılması ideyasına qarşıdır: “Bizim cavabımız birmənalıdır və Laçın dəhlizinin bağlanmasından dərhal sonra bunu bəyan etdik. Laçın dəhlizinin fəaliyyəti Azərbaycan prezidentinin də imzaladığı üçtərəfli sənəddə razılaşdırılıb. Laçın dəhlizilə bağlı güc tətbiqilə və ya onun tətbiqinə dair hədələrlə yeni danışıqlar bizim üçün qəbuledilməzdir. Ermənistan istənilən an yolları aça bilər, ancaq bu, bütün yolların keçdiyi ölkələrin suverenliyi və qanunvericiliyi çərçivəsində fəaliyyət göstərməsi razılaşdırıldıqdan sonra baş verə bilər”.
Lakin o izah etməyib ki, niyə Laçın yolunda Azərbaycan qanunları qüvvədə olmamalıdır. Halbuki, bu, Azərbaycanın suveren ərazisidir. Zəngəzur Ermənistanın suveren ərazisi ola bilər, Laçın yolu Azərbaycanın yox?
“Azərbaycan öz suveren ərazilərində istənilən nəzarət-buraxılış məntəqələri quraşdıra bilər”
Məsələyə münasibət bildirən politoloq Tural İsmayılovun fikrincə, Mirzoyanın məlum açıqlaması ağılsızlıq və sərsəmlikdən başqa bir şey deyil: “Çünki məsələ ondadır ki, bu gün təkcə Azərbaycan deyil, dünyadakı bütün suveren ölkələrin öz ərazilərində nəzarət-buraxlış məntqələri quraşdırması onların birbaşa suveren hüquqlarından biridir. O cümlədən, beynəlxalq hüquq tərəfindən dövlətlərin öz əraziləri ilə bağlı qərarlar qəbul etmək və eyni zamanda öz ərazilərində nəzarət-buraxılış məntəqələri quraşdırmaq hüquqları tanınır. Ancaq buna baxmayaraq, Ermənistan utanmadan Azərbaycanın ərazi bütövlüyünə qarşı növbəti təxribat həyata keçirir. Ermənistanın heç bir haqqı yoxdur ki, Azərbaycanın ərazilərində hansı formada ölkəmizin davranacağını bizə öyrətməyə çalışsın. Bu gün Azərbaycan diqtə edən tərəf statusundadır. Çünki biz müharibədə qalib gəldik və 30 ilə yaxın formalaşan status-kvonu darmadağın etdik. Belə bir vəziyyətdə Ermənistanın bizlə şərtlə danışması absurddur. Ona görə də Ermənistanın bu gün belə ağılsız və sərsəm iddialarının heç bir əsası yoxdur. Azərbaycan öz suveren ərazilərində istənilən nəzarət-buraxılış məntəqələri quraşdıra bilər və kimsə bunu bizə qadağan edə bilməz. Bu baxımdan hesab edirəm ki, Ermənistan ilk növbədə özü Zəngəzur dəhlizi ilə bağlı həyata keçirdiyi provokasiyalara son qoymalıdır. Bu gün Zəngəzurda Ermənistanın gömrük postunu tələb edən Paşinyan hakimiyyətinin Azərbaycan əraziləri ilə bağlı belə ikiyüzlü və riyakar bir mövqe ortaya qoymağı qəbuledilən deyil. Bu, Ermənistanın havadarlarının bu ölkəni qızışdırması nəticəsində ortaya çıxan idbar bir mövqesizlikdir. O üzdən bu, Azərbaycan tərəfindən əsla qəbul oluna bilməz”.
Vidadi ORDAHALLI
