Almaniyadan Ermənistana gözlənilməz zərbə. Belə ki, martın 7-9-da Berlində dünyanın ən böyük turizm sərgilərindən biri keçiriləcək. Sərginin Təşkilat Komitəsi “arsaxla” bağlı xəbərdarlıq edib.
Erməni mediası yazır ki, Sərginin Təşkilat Komitəsi Ermənistanın İqtisadiyyat Nazirliyinə məktub göndərib və orada açıq mətnlə xəbərdarlıq edib ki, sərgiyə siyasi xarakterli hər hansı informasiya materialı, plakat, buklet təqdim etmək qəti qadağandır. Üstəlik, BMT Təhlükəsizlik Şurasının Qarabağa dair 4 qətnaməsinə (822, 853, 874, 884) istinadla Dağlıq Qarabağla (qondarma qurum) bağlı də material olmamalıdır tövsiyəsi xüsusi qeyd olunub. Halbuki, indiyə qədər Almaniyada separatçıların keçirdiyi sərgilərə belə məhdudiyyətlər tətbiq olunmurdu. Heç bir sərgidə, o cümlədən turizmlə bağlı sərgilərdə erməni şirkətlərinə “artsax”ı təmsil etmək qadağan edilməyib. O da məlum olub ki, diplomatik korpusda yuxarıdakı xəbərdarlıq məktubu ilk növbədə Ermənistanın Almaniyadakı səfiri Viktor Yengibaryanın böyük uğursuzluğu hesab edilir. Ermənistan səfirliyi əslində sərginin təşkilat komitəsi ilə işləməyib və s.
“BMT qətnamələrinə istinad edərək belə bir mövqe ortaya qoyması o deməkdir ki, ərazi bütövlüyümüz birmənalı tanınır”
Məsələyə münasibət bildirən İdarəçilik Akademiyasının müəllimi, sosioloq Hüseyn İbrahimovun fikrincə, Almaniyanın bu addımı erməni separatçılarına güclü zərbə oldu: “Ona görə ki, Almaniyadan ermənilər bunu gözləmirdilər. Onlar elə hesab edirdilər ki, Almaniya hər zaman erməni separatizmini görməzdən gələcək. Ona görə də bu, Azərbaycanın postkonflikt dövrünün uğurlarından biridir. Prezident İlham Əliyevin ardıcıl və düşünülmüş xarici siyasəti bu sahədə öz səmərəsini verir. Ümumən, Almaniyada Ermənistan tərəfə Qarabağla bağlı olan turizm, mədəniyyət, təhsil və digər bu kimi mövzularda qadağa qoyulması birinci hal deyil. Ancaq 44 günlük Vətən müharibəsindən sonra bu məsələ daha da aktuallaşıb. Hiss olunur ki, Almaniya bu məsələlərə daha diqqətli yanaşmaqla erməni lobbisinə alət olmaq istəmir. Ermənilər uzun illər müəyyən boşluqlardan məharətlə istifadə edərək separatçıları təbliğ ediblər. Artıq Azərbaycan öz diplomatik imkanlarından maksimum istifadə edərək belə hallara imkan vermir. Ona görə də bu, həm də bizim diplomatik uğurumuzdur. Almaniyanın erməni separatçılarına belə bir şəraiti yaratmaması önəmli hadisədir. Bu onu göstərir ki, rəsmi Berlin separatizmin çox təhlükəli bir bəla olduğunun fərqindədir. Almaniya tərəfinin BMT qətnamələrinə istinad edərək belə bir mövqe ortaya qoyması o deməkdir ki, ərazi bütövlüyümüz birmənalı tanınır. Vətən müharibəsindən sonra yaranan yeni reallıqları Almaniya da qəbul edir. Çünki Azərbaycan ərazilərini işğaldan azad etməklə, BMT qətnamələrini yerinə yetirmiş oldu. Bu onu göstərir ki, Almaniya beynəlxalq hüquqa önəm verir. Bu kimi mədəniyyət sərgiləri adı altında separatçılara təbliğat üçün meydan verilmir. Əksinə, onlar ifşa edilir. Bununla demək istəyirlər ki, Ermənistanın Qarabağ məsələsində sərgilədiyi mövqe haqsızdır”.
Bir sözlə, sosioloq bunu Azərbaycanın siyasi uğuru kimi dəyərləndirdi.
Vidadi ORDAHALLI
