“Fevralın 23-nə qədər Ruben Vardanyan istefa verməlidir”. Bunu Ermənistan parlamentinin hakim “Vətəndaş müqaviləsi” fraksiyasının sədr müavini, müdafiə nazirinin keçmiş müavini Qaqik Melkonyan bildirib. Lakin o, Qarabağdakı separatçı rejimin “dövlət nazirinin” postunu tərk edəcəyi barədə məlumatı haradan aldığını açıqlamayıb: “İndi mən dedim ki, məndə məlumat var, amma onu haradan və necə əldə etdiyimi izah etməyəcəyəm”.
Bununla belə, iqtidarı təmsil edən deputat Azərbaycan prezidenti İlham Əliyevin bu xüsusda tələbinin də yerinə yetiriləcəyini, eyni zamanda Vardanyanın gedişinin elə Ermənistanda da düzgün hesab edildiyini bildirib. Xatırladaq ki, prezident İlham Əliyevin Münhendə keçirilən təhlükəsizlik konfransında verdiyi bəyanatın ardınca Qarabağın separatçı siyasətçiləri arasında “dövlət naziri” kimi təqdim olunan Ruben Vardanyanın istefası məsələsi qızğın müzakirələrə səbəb olub. Həmin konfransda keçirilən müzakirə zamanı isə prezident İlham Əliyev Azərbaycanın Qarabağ erməniləri ilə danışıqlara hazır olduğunu bildirmişdi: “Bizim beynəlxalq tərəfdaşlarımızla razılaşdırılıb ki, Qarabağdakı erməni azlığın hüquqları və təhlükəsizliyi ilə bağlı müzakirələr aparılacaq. Biz bunu etməyə hazırıq, lakin erməni icmasının Qarabağda doğulmuş və bütün ömrü boyu orada yaşamış nümayəndələri ilə, Qarabağda Rusiyadan rəhbər mövqe tutmaq üçün ixrac edilmiş şəxslə deyil. Ola bilsin ki, “ixrac edilmiş” düzgün ifadə deyil, mən yəqin ki, “gizli yolla keçirilmiş” ifadəsini üstün tutardım. Çünki heç kim onun Qarabağda necə peyda olduğunu, Yerevana qayıtmağa, oradan Moskvaya və yenidən İrəvana, sonra isə Qarabağa qayıtmağa necə çalışdığını və buna nail olduğunu bilmir. Təkcə bu fakt blokadanın olmadığını göstərir... Beləliklə, yol açıq olduğu halda biz bunu necə blokada adlandıra bilərik?! Əgər Qarabağdakı ermənilər bu yoldan istifadə etməyə çalışsalar, əminəm ki, onları heç kim dayandırmayacaq”. Məsələ ilə bağlı Qaqik Melkonyan bildirir: “Ruben Vardanyana deyin: Ruben can, hardan gəldin geri qayıt. Təbii ki, əgər Laçın yolunun bağlı qalması Rubenin orada olması ilə də bağlıdırsa, “Qarabağ hakimiyyəti” Rubenə deməlidir ki, bu “vəzifədən” getsin”. Qaqik Melkonyan hesab edir ki, Ruben Vardanyanın gedişi təkcə Laçın yolunun açılmasına kömək etməyəcək, həm də Qarabağda “hakimiyyət” parçalanması məsələsini həll edəcək: “Ruben Vardanyanın orada olması “hakimiyyətdə” fikir ayrılığına səbəb oldu. Ondan soruş: səni kim göndərib və niyə Qarabağa gəlmisən? Qarabağın “hakimiyyətini” niyə böldülər? Təbii ki, ruslar göndərib”. Hakimiyyət təmsilçisi olan deputat əmindir ki, Ruben Vardanyan rusların dediyini edib. Onun sözlərinə görə, son vaxtlar Ermənistan hakimiyyəti ilə Qarabağ arasında münasibətlərin gərginləşməsinin səbəbi də bu olub və Vardanyanın gedişi ilə Qarabağla Ermənistan arasında sıxışdırılan “paz” aradan qalxacaq.
Hakim partiyanın nümayəndəsinin sözlərinə görə, Qarabağda ikili “hakimiyyət” – Arayik Arutyunyanın “hakimiyyəti” və Ruben Vardanyanın “hakimiyyəti” yaradılıb. Lakin “Qarabağ prezidenti”nin Moskvaya səfərindən sonra vəziyyət dəyişib: “Arutyunyan Moskvaya gedib qayıdanda başa düşdü ki, nəyisə qaçırıbsa, işini bitirib, ona görə də yenidən nəzarəti ələ keçirib”. Erməni mediası yazır ki, prezident İlham Əliyevin irəli sürdüyü ilkin şərtdən sonra üç aya yaxın “dövlət naziri” işləmiş Ruben Vardanyanın işdən çıxarılması ilə bağlı müzakirələr Qarabağda yenidən qızışıb. Qarabağ müxalifətçisi Tiqran Petrosyan da daha əvvəl vardanyanla bağlı qərar qəbul edildiyini bildirib. Sonuncu iddia edib ki, Arayik Arutyunyan Qarabağın “baş prokuroru” Qurgen Nersisyana “dövlət naziri” postunu təklif edib:
“Əvvəla, Qurgen Nersisyanla görüş oldu, o mənə bildirdi ki, qərar artıq qəbul olunub və Ruben Vardanyan getməlidir. Onun necə gedəcəyi məlum deyil, amma o, gedəcəyini deyib və Arayik Arutyunyan ona “dövlət naziri” vəzifəsini təklif edib”. “Baş prokurora” “dövlət naziri” vəzifəsi təklif olunubmu və o, təklifi qəbul edibmi? “Baş Prokurorluq” bu suallara yazılı cavab verəcəyini vəd etsə də, hələ ki, cavab açıqlanmayıb. Bundan əvvəl Qarabağın “baş prokuroru” Qurgen Nersisyan “Mediahab”a müsahibəsində ona “dövlət naziri” vəzifəsinin təklif olunduğunu təsdiqləsə də, hələlik qərar verməyib.
Qarabağda müxalif qüvvələrin təmsilçisi Metaxe Akopyan əmindir ki, Ruben Vardanyanın özü “istefa verməyəcək” və Arayik Arutyunyan onu “istefaya”göndərməli olacaq. Metaxe Akopyan bildirib ki, Arutyunyan bu addımı atarsa, bu, Əliyevin tələbini yerinə yetirməsi demək olacaq. Akopyanın sözlərinə görə, Ruben Vardanyan Bakının Qarabağ erməniləri ilə azlıq kimi dialoq aparmasının əleyhinədir. Lakin Vardanyanın bu mövqeyini Qarabağ erməniləri arasında ciddiyə alan yoxdur. Metaxe Akopyan əmindir ki, Arayik Arutyunyan Ruben Vardanyanı “işdən çıxarsa”, bu, Qarabağ ermənilərinin qəzəbinə səbəb olacaq. Vardanyanın özü və komandasının üzvləri fevralın 23-də gözlənilən “istefası” ilə bağlı xəbərlərə hələ də reaksiya vermirlər, yeri gəlmişkən, həmin gün prezident Arayik Arutyunyan Qarabağ ermənilərinə müraciət edəcək. Bu fonda erməni ekspert Artur Osipyan qeyd edib ki, Ruben Vardanyanın “komandası” təslim olub: “Vardanyanın “komandası”nın üzvləri hazırdırlar ki, Ruben gedir. Ruben Vardanyan gedirsə, hər şey ikinci plana keçir. Belə çıxır ki, İlham Əliyev Münhenə gəlir və Rubenin getməli olduğu şərtini qoyur, Qarabağ erməniləri də buna tabe olurlar. Heç bir böhran da olmur. Əgər İrəvan böhran olmadığına qərar veribsə, deməli böhran olmur. Vardanyanın uzaqlaşması barədə Qarabağda da müəyyən söz-söhbətlər var: “Hər kəs bilir ki, o, çantalarını yığıb”.
Nahid SALAYEV
