“Bu məsələdə Rusiya ilə müttəfiq olub Avroittifaqı küsdürmək olmaz”
Məlum olduğu kimi, bu ilin yanvarından Avropa İttifaqının müşahidə missiyası Ermənistanda fəaliyyətə başlayıb. Sözügedən missiya 2 il orada olacaq. Avroittifaqın bu qərarı ən çox Rusiyanı narahat edir və bunu öz maraqları üçün potensial təhdid hesab edir.
Bu və digər məsələlərlə bağlı Böyük Azərbaycan Partiyasının sədri Elşad Musayevə bir sıra suallar ünvanladıq:
- Rusiya Paşinyanın Avropa İttifaqı missiyasını pozmaq üçün nələr edəck, bununla bağlı hansı vasitələrə əl atacağı güman olunur?
- Əvvəla, Aİ-nin müşahidə missiyası Ermənistan hakimiyyətinin dəvəti ilə sərhədə gəlib. Aydın məsələdir ki, uzun müddət regionu öz nəzarətində saxlayan Rusiyada bu yaxşı qarşılanmayıb. Moskva açıq bəyan edir ki, bu, onların xoşuna gəlmir. Bununla bağlı Rusiya müxtəlif səviyyələrdə öz etirazını bildirib. O üzdən, Rusiya Ermənistana qarşı müxtəlif təzyiq mexanizmlərini işə salacaq. Ayrı variant yoxdu. Çünki Rusiya razı ola bilməz ki, ona müttəfiq olan bir ölkədə hansısa ölkələrin xüsusi missiyası fəaliyyət göstərsin. Təbii ki, onların əksəriyyəti hərbçi və kəşfiyyatçıdır. Onlar xüsusi missiya ilə bura gəlib və Kreml də bunun fərqindədir. Çox güman ki, Rusiya onlara qarşı müəyyən diversiyalar törədəcək.
- Aİ missiyasının fəaliyyəti fonunda, Xankəndi erməniləri ilə Rusiyanın münasibəti necə olacaq? Bu, oradakı ermənilərin Moskvaya olan münasibətinə təsir edə bilərmi?
- Bildiyiniz kimi, Xankəndi ermənilərinin, Ermənistan ermənilərindən fərqli olaraq, Rusiyaya xüsusi münasibəti var. Ermənistan müəyyən məsələlərdə açıq-aşkar onlara dəstək verə bilməyəndə o zaman onlar birbaşa Moskvaya yönəlirlər. Zatən, Xankəndi ermənilərinə Rusiyanın hər zaman dəstəyi var. Separatçılar əsasən Rusiya ilə hesablaşırlar. Dəfələrlə separatçı qurumun “rəhbər”ləri Moskvaya gedib və orada Rusiya rəsmilərindən təlimat alıblar. Orada təlimat aldıqdan sonra geri qayıdıblar. Bu indi də belədir. Bu baxımdan Aİ missiyasının fəaliyyəti Rusiyanın Qarabağ ermənilərinə münasibətinə təsir etməyəcək. Çünki Rusiya Qarabağdakı separatçıların arxasındadır.
- Aİ missiyası Xankəndi erməniləri ilə necə işləyəcək? İşləyəcəksə, bu hansı plan əsasında olacaq?
- Hesab edirəm ki, Aİ missiyası Qarabağ erməniləri ilə yox, daha çox Ermənistan erməniləri ilə işləyəcək. Onların Xankəndi erməniləri ilə birbaşa işləməsi aydın görünmür. Çünki bu məsələlərdə Azrbaycan amili var. Azərbaycan açıq bəyan edir ki, Xankəndi bizim ərazilərin bir hissəsidir. Oradakı ermənilər bizim vətəndaşlardır. Ehtimal ki, Aİ missiyası Ermənistan vasitəsilə Xankəndi ermənilərinə təsir etməyə çalışacaq.
- Hiss olunur ki, Rusiya Ermənistanda olan Aİ missiyasına qarşı aparacağı mübarizəyə Azərbaycanı da cəlb etmək istəyir. Yəni Azərbaycan Avroittifaqa qarşı kəskin mövqe tutsun. Azərbaycan buna niyə dəstək versin ki?
- Bəllidir ki, Rusiya bu məsələlərdən narazıdır. Təbii ki, bu mübarizədə Rusiya Azərbaycanın da köməyindən istifadə etməyə çalışacaq. Məlum olduğu kimi, Azərbaycan dövlət olaraq sözügedən missiyanın sərhəddə yerləşdirilməsindən narazıdır. Rəsmi Bakı açıq-aşkar bildirir ki, bu, tərəf tutmaq deməkdir. Bunun da arxasında dayanan və təşkil edən Fransadır. Bir sıra Aİ dövlətləri uzun illərdir Ermənistanın tərəfini tutur. Konkret Avropa Parlamenti ermənipərəst mövqeyi ilə seçilir. Açıq-aşkar ermənilərin tərəfini tutur. O baxımdan təbii ki, bizim də narazılığımız var. Lakin bu kimi məsələlərdə biz Moskvanın aləti ola bilmərik. Biz etirazımızı bildiririk və Azərbaycan icazə verməyəcək ki, həmin missiya namayəndələri torpaqlarımıza ayaq bassın. Dövlət olaraq öz siyasətimiz var və biz Avroittifaqla işləməliyik. Onsuz da iqtisadi sahədə iş gedir. Bizim bir sıra Aİ ölkələri ilə iqtisadi əlaqələrimiz mövcuddur. Düzdür, Fransa bizə qarşı fəaliyyət göstərir. Ancaq Azərbaycan bizə qarşı olan dövlətlərlə işləməyi bacarmalıdır. Müəyyən manevrlərlə və ağıllı siyasətlə öz siyasətimizi həyata keçirməliyik. Hadisələri tələsdirməməklə öz yolumuzla getməliyik. Bu məsələdə Rusiya ilə müttəfiq olub Avroittifaqı küsdürmək olmaz. Qoy, Rusiya Ermənistanı özü cəzalandırsın.
Vidadi ORDAHALLI
