“Qarabağ erməniləri Azərbaycan vətəndaşlarıdır, azlıqdır. Azərbaycan çoxmillətli ölkədir və Azərbaycanda bütün azlıqlar mədəniyyət, dil, həmçinin təhlükəsizlik də daxil olmaqla, eyni hüquq və üstünlüklərdən faydalanırlar. Biz Qarabağdakı erməni icmasının nümayəndələri ilə praktiki təmaslara başlamağa hazırıq. Bu gün Dövlət katibi Blinkenin qarşısında mən Ermənistandan olan həmkarıma bu barədə dedim. Lakin biz bunu o zaman edə bilərik ki, Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs - Vardanyan bizim ərazimizi tərk etsin”.
Bu fikirləri Münhen Təhlükəsizlik Konfransı çərçivəsində "Dağları aşmaq? Cənubi Qafqazda təhlükəsizliyin qurulması" mövzusunda keçirilən plenar iclasda çıxışı zamanı prezident İlham Əliyev bildirib.
Beləliklə, Azərbaycan Ermənistanı, Qarabağda qalan erməniləri fakt qarşısında qoyub. Ruben Vardanyan Qarabağda olduğu müddət ərzində Azərbaycanın Qarabağ erməniləri ilə danışıqlar aparması mümkün deyil. Əslində, bunu ermənilər də qəbul edir. Elə bu fonda Ruben Vardanyanın tezliklə Qarabağdan qovulacağına dair məlumatlar yayılır. “Azatutyun” radiosu bildirir ki, Ermənistanın baş naziri Nikol Paşinyan prezident İlham Əliyevin Ruben Vardanyana ünvanlanmış ittihamlarına reaksiya verməyib, buna baxmayaraq, Qarabağda “dövlət nazirinin” istefası söhbəti yeni vüsət alıb. Qarabağ müxalifətçilərindən Tiqran Petrosyan iddia edib ki, yaxın günlərdə “Qarabağ prezidenti” Arayik Arutyunyan “dövlət naziri” Ruben Vardanyanı vəzifəsindən azad edəcək və onun yerinə “baş prokuror” Qurgen Nersisyan təyin olunacaq: “Mən düşünürəm ki, Arayik Arutyunyan doğrudan da Ruben Vardanyanı yığışdıracaq və xalq arasında böyük məyusluq olacaq”. Müxalifətçi iddia edir ki, bu məlumatı Qurgen Nersisyanla, Arayik Arutyunyanla və Ruben Vardanyanın özü ilə söhbətlərindən əldə edib: “Əvvəlcə Qurgen Nersisyanla söhbətim oldu. O mənə dedi ki, artıq qərar qəbul olunub və Ruben Vardanyan getməlidir. Onun hansı üsulla gedəcəyi məlum deyil. Amma o dedi ki, “gedəcək və Arayik Arutyunyan Nersisyana dövlət naziri vəzifəsini təklif edib”. Tiqran Petrosyanın sözlərinə görə, o, daha sonra Ruben Vardanyanla danışıb və belə başa düşüb ki, onun “istefası məsələsi kənardan sırınır”. Amma o, bu “kənarın” hara olduğuna aydınlıq gətirməyib: “Mən sonra Ruben Vardanyanla görüşdüm və belə başa düşdüm ki, kənardan Arayik Arutyunyana deyiblər ki, Ruben Vardanyan getməlidir, amma Arayik Arutyunyan özü qalmalıdır. Mən xırdalıqlara getməyəcəyəm, çünki çox şeylərdən agah deyiləm. Bilirəm ki, Ruben Vardanyan istefaya gedəcəyini, Arayik Arutyunyanın onu işdən çıxarmalı olacağını deyib”.
Bunlarla yanaşı, separatçıların rəhbərliyindən başqa bəyanatlar da səslənir. Məsələn, Arayik Arutyunyan bu günlərdə “Facebook”da çıxış edərək, ciddi daxili ziddiyyətləri etiraf edib: “Erməni icmasının idarəetmə orqanları ictimai əhval-ruhiyyəni tam əks etdirmirlər, bəzi hallarda isə lazımi səviyyədə etimada malik deyillər ki, bu da bugünkü qeyri-müəyyənlik və daim inkişaf edən hadisələr şəraitində çox vaxt obyektiv və subyektiv narazılığa səbəb olur, daxili sarsıntılara gətirib çıxarır”. Onu da xatırladaq ki, Xankəndidəki separatçı rejimin rəhbəri fevralın 23-də sakinlərə müraciət edəcəyini açıqlayıb. Onun müraciətinin rejimin daxilində yaşanan siyasi intriqalarla bağlı olacağı gözlənilir. Ermənistan mediası məhz fevralın 23-də Vardanyanın “dövlət naziri” vəzifəsindən çıxarılacağını yazır. Gözləniləndir ki, Arayik Arutyunyan müraciətində bunu elan edəcək. “İravnuk” nəşri mənbələrə istinadən bildirir ki, fevralın 23-də Vardanyanla bağlı qərar veriləcək, o, “vəzifəsindən” uzaqlaşdırılacaq. Vardanyanın “vurulması”nda əsas həlledici amilin Bakının tələbi olduğuna dair fikirlər var. Ermənilər hesab edir ki, bu tələb icra edilməsə, Bakının təzyiqləri güclənə bilər. bu da Qarabağda qalan ermənilər üçün müsbət heç nə vəd etmir. Bu fonda Qarabağdakı qondarma qurumun “nümayəndəsi” Artur Arutyunyan da etiraf edir ki, Vardanyanın uzaqlaşdırılması üçün müzakirələr gedir: “Hazırda Ruben Vardanyanın istefası barədə heç nə deyə bilmərəm, lakin təbii olaraq müəyyən müzakirələr var ki, onların nəticələri yaxın günlərdə bəlli olacaq”. O qeyd edib ki, bu proseslərin əsasında hər hansı şəxsi fikir ayrılıqları və ya gərginlik axtarmağa ehtiyac yoxdur: “Vardanyan istefa versə belə, bu, Azərbaycanın tələbinin yerinə yetirilməsinin nəticəsi olmayacaq, ancaq sırf “Qarabağ hakimiyyəti”nin situasiyanın imperativindən irəli gələn qərarı ilə şərtlənəcək”. Amma əslində, bunun Bakının tələbi ilə olması artıq danılmaz həqiqətdir. Ermənistanın “Qraparak” nəşri də məsələyə eyni prizmadan yanaşır: “Qarabağda “daxili siyasi həyat” sakit deyil. Yaxın vaxtlarda “kadr dəyişiklikləri” olacaq. Ruben Vardanyanın “vəzifə”dən uzaqlaşdırılması qaçılmazdır. Rusiya tərəfi də bunu bəyənərək təklif edib ki, Qarabağ sakinləri həll yolunu özləri tapsın”. Erməni ekspert Artur Osipyan vurğulayır ki, Ruben Vardanyanın meydana çıxması Qarabağda “parçalanma”ya səbəb olub: “Qarabağda korrupsiya “rejimi”ndən xilas olmaq mümkün deyil. Korrupsioner “rejim” məsuliyyətə cəlb olunmayana qədər Qarabağda həmrəylik olmayacaq. Qarabağda məsələnin həlli oradakı “hakimiyyət”dən qurtulmaqdır, mübarizə gedir”.
Tahir TAĞIYEV
