İran hakimiyyəti Güney Azərbaycanda yeni doğulan körpələrə türk mənşəli adın qoyulmasına icazə vermir. Bu barədə "Mouze İran" teleqram kanalı məlumat yayıb. Bildirilib ki, Təbriz şəhərində yeni doğulmuş körpəyə türk adı qoyulduğu üçün doğum haqqında sənədin verilməsindən imtina edilib.
Molla rejimi azərbaycanlı körpələrə qoyulacaq adın əcnəbi (türk) olduğunu əsas gətirərək ona doğum haqqında şəhadətnamə verməkdən imtina edir. Son zamanlar İranda bu mövzu ilə bağlı narazılıqlar artıb. Lakin molla rejimi Güney Azərbaycanda yeni doğulan körpələrə türk mənşəli adı deyil, fars adların qoyulmasını tələb edir.
“…Azərbaycan türkcəsində olan insan adı, yer, tarixi, coğrafi, şəhər adlarını dəyişməklə türklərin izini İran ərazisindən silmək istəyir”
Mövzu ilə bağlı fikir bildirən Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə açıqlamasında qeyd etdi ki, İranda yeni doğulan körpəyə türk adının qoyulmasına icazə verilməməsi artıq ənənə halı alıb. Bu, türklərin assimilyasiyası, türklərin etnos olaraq tanınmaması üçün atılan addımdır. Həmçinin, türkü görməzdən gələn fars şovinizminin davranış formasıdır: “İran hakimiyyəti Azərbaycan türkcəsində olan yer, tarixi, coğrafi, şəhər adlarını dəyişməklə türklərin izini İran ərazisindən silmək istəyir”.
Həmsöhbətimiz onu da əlavə eydi ki, insanların öz ana dilində adının olması ona milli şüurun qayıtması kimi bir əlamət verir: “Məsələn, bu yaxınlarda İranda yeni doğulan körpəyə “Vulkan” adı vermək istəyiblər. İran hakimiyyəti də bu adın əcnəbi, türk adı olduğunu əsas gətirərək uşağa kimlik verməyib. “Vulkan” türk sözüdür və bu adı daşıyacaq şəxslər öz milli kimliklərini qoruyacaq. İran hakimiyyəti isə Azərbaycan türkünün milli kimliyini tanımaq, bilmək istəmir. Bu səbəbdən də molla rejimi Azərbaycan türklərini assimilyasiya etməklə onları fars dilinin, mədəniyyətinin, etnosunun bir qolu saymağa çalışırlar. Bu, fars şovinist düşüncəsinin tərkib hissəsidir. Ona görə də Güney Azərbaycanda ana dilində adların qoyulması qadağan olunub. Buna qarşı çıxanlar molla rejimi tərəfindən cəzalandırılır”.
Günel CƏLİLOVA
